ހޫޘީންނާ ދެކޮޅަށް އެހީވާން އިސްރާއީލުން ހުށަހެޅުމުން ސައުދީ އަރަބިއްޔާއިން ބުނީ ނޫނެކޭ!

ސައުދީ އަރަބިއްޔާއިން އިސްވެ އުފައްދާފައިވާ އަސްކަރީ އިއްތިހާދުން ޔަމަނުގެ ހަތިޔާރުއެޅި ހޫޘީ ޖަމާއަތާ ދެކޮޅަށް ހިންގަމުންދާ އަސްކަރީ ކެމްޕޭނުގައި ބައިވެރިވެ އަސްކަރީ އެހީތެރިކަން ފޯރުކޮށްދިނުމަށް ޔަހޫދީ އިސްރާއީލުން ހުށަހެޅުމުން ސައުދީ އަރަބިއްޔާގެ ވަލީއަޙުދު މުޙައްމަދު ބިން ސަލްމާން އެ ކަމަށް އިންކާރު ކުރައްވައިފި އެވެ. އެމެރިކާ މެދުވެރިވެގެން ރިޔާޟުގެ ރުހުން ހޯދުމަށް އިސްރާއީލުން މަސައްކަތްކުރި ނަމަވެސް، މި ހުށަހެޅުން ވަލީއަޙުދު ގަބޫލުފުޅު ނުކުރެއްވި ކަމަށް، އިސްރާއީލްގެ ނޫހެއް ކަމަށްވާ ހައާރެޓްޒްއިން ހޯމަ ދުވަހު ރިޕޯޓުކޮށްފައިވެ އެވެ.

އިސްރާއީލްގެ އަސްކަރީ އެހީތެރިކަމަށް ވަލީއަޙުދު ޝައުގުވެރިވެވަޑައިނުގަންނަވަނީ، އިސްރާއީލާއެކު ގުޅުން ބަދަހިކޮށްފިނަމަ ސައުދީ ރައްޔިތުންގެ ފަރާތުން ނުރަނގަޅު އަސަރުތަކެއް ކުރިމަތިވެދާނެ ކަމުގެ ބިރު އޮތުމުން ކަމަށް، ނަން ހާމަކޮށްފައިނުވާ ޑިޕްލޮމެޓިކް މަސްދަރަކާ ހަވާލާދީ އެ ނޫހުގައި ބުންޏެވެ. އަދި، ސައުދީ އަރަބިއްޔާއާއެކު އަސްކަރީ ގޮތުން ގުޅުން ބަދަހިކުރުމަކީ ދެ ޤައުމުގެ ދެމެދުގައި އޮންނަ ގުޅުން ވަރުގަދަވެ، މުސްތަގުބަލުގައި ގުޅުން ގާއިމުކުރުމުގެ އެއްބަސްވުމަކަށް މަގުފަހިވެގެންދާނެ ކަމެއް ކަމަށް އިސްރާއީލުން އުއްމީދުކުރާ ކަމަށް، މިކަމުގެ މައުލޫމާތު އެނގޭ އެހެން މަސްދަރަކުން ބުންޏެވެ.

Advertisement

މި ރިޕޯޓާ ގުޅިގެން ސައުދީގެ ކަމާބެހޭ ފަރާތްތަކުން އެއްވެސް އެއްޗެއް ބުނެފައެއް ނުވެ އެވެ. ސައުދީ އަރަބިއްޔާއިން އިސްރާއީލާއެކު އެއްވެސް ޑިޕްލޮމެޓިކް ގުޅުމެއް ގާއިމުކޮށްފައެއް ނުވެ އެވެ. އަދި، ދެ ޤައުމުގެ ދެމެދުގައި ގުޅުން ގާއިމުކުރުން ބިނާވެފައި ވަނީ ފަލަސްތީންގެ މައްސަލަ ހައްލުކުރުމާއި، ފަލަސްތީންގެ މިނިވަން ދައުލަތެއް ގާއިމުކުރުމުގެ މައްޗަށް ކަމަށް، ސައުދީން ދަނީ ބުނަމުންނެވެ.

މި ރިޕޯޓު އާންމުވެފައި މި ވަނީ، ސައުދީ އަރަބިއްޔާއަށް އަމާޒުކޮށް ހޫޘީން ދެމުންގެންދާ ހަމަލާތައް އިތުރުކޮށްފައިވާ ދަނޑިވަޅެއްގަ އެވެ. މި ގޮތުން، އެއާޕޯޓުތަކަށް ތަކުރާރުކޮށް ދެމުންދާ ހަމަލާތަކުގައި މީހުންގެ ފުރާނަ ގެއްލި، މީހުންނަށް އަނިޔާވެ، ފްލައިޓްތަކަށް ވަނީ ބުރޫއަރާފަ އެވެ. ހޮނިހިރު ދުވަހު ރިޔާޟުގެ ކިންގް ޚާލިދު އިންޓަނޭޝަނަލް އެއާޕޯޓަށް ހޫޘީން ދިން ހަމަލާއެއްގައި 13 މީހުން މަރުވެ، 300 އަށްވުރެ ގިނަ މީހުންނަށް ވަނީ އަނިޔާވެފަ އެވެ. އާދީއްތަ ދުވަހު ހަމަ އެ އެއާޕޯޓަށް ދިން އިތުރު ހަމަލާއެއްގައި ޕާކިސްތާނުގެ ރައްޔިތަކު މަރުވެ، އިތުރު 11 މީހަކަށް އަނިޔާވެފައިވާ ކަމަށް، ސައުދީ އަރަބިއްޔާގެ ޖެނެރަލް އޮތޯރިޓީ އޮފް ސިވިލް އޭވިއޭޝަނުން ބުންޏެވެ.

މި ހަމަލާތައް އިތުރުވާން ފަށާފައި ވަނީ، 2022 ވަނަ އަހަރުގެ އެޕްރީލު މަހު އދ. މެދުވެރިވެގެން ގެނައި ހަމަލާބަދަލުކުރުން ހުއްޓާލުމުގެ އެއްބަސްވުމަށްފަހު، ޖުލައި މަހު ހޫޘީންގެ އަސްކަރީ ހަރަކާތްތައް އަނެއްކާ ވެސް ވަރުގަދަކުރުމުންނެވެ. ޔަމަނުގައި އަހުލީހަނގުރާމަ ފެށިފައި ވަނީ، 2014 ވަނަ އަހަރުގެ ސެޕްޓެންބަރު މަހު ހޫޘީން ވެރިރަށް ޞަންޢާއާއި އިތުރު ބައެއް ޕްރޮވިންސްތައް ހިފުމާ ގުޅިގެންނެވެ. އޭގެ ފަހުން، 2015 ވަނަ އަހަރުގެ މާރިޗު މަހު ސައުދީ އަސްކަރީ އިއްތިހާދުން ވަނީ، ބައިނަލްއަގުވާމީ ގޮތުން ބަލައިގަނެފައިވާ ޔަމަނުގެ ސަރުކާރަށް ތާއީދުކޮށް، މި ހަނގުރާމައިގެ ތެރެއަށް ވަދެފަ އެވެ.