ޑރ ޖަމީލާމެދު މައްސަލައެއް ނެތް، އޮތީ ވަރަށް ގާތް ގުޅުމެއް:ރައީސް ނަޝީދު
ޑރ. ޖަމީލަކީ ދިވެހިރާއްޖޭގެ ސިޔާސީ ލީޑަރުންގެ ތެރެއިން ވަރަށް ބޮޑެތި ކާމިޔާބީތަކެއް ހޯއްދަވާފައި ހުންނެވި ބޭފުޅެއް
ރައީސް ނަޝީދު ރާއްޖެ ޓީވީއަށް އިންޓަވިއު ދެއްވަނީ
އިދިކޮޅު އިއްތިހާދު މޯލްޑިވިއަން ޔުނައިޓެޑް އޮޕްޒިޝަން (އެމްޔޫއޯ) ގެ ލީޑަރ ޑރ މުހައްމަދު ޖަމީލް އަހުމަދާ އެއްވެސް މައްސަލައެއް ނެތް ކަމަށާއި ދެބޭފުޅުންގެ މެދުގައި އޮންނަނީ ވަރަށް ގާތް ގުޅުމެއްކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ އަވައްޓެރި ސްރީ ލަންކާގައި ހުންނަވައިގެން ރާއްޖެ ޓީވީގެ ފަލަސުރުޚީ ޕްރޮގްރާމަށް ދެއްވި ޚާއްޞަ އިންޓަވިއުއެއްގައެވެ.
ރައީސް ނަޝީދު ސްރީ ލަންކާއަށް ކުރިންވެސް އަދި މިފަހަރުވެސް ސްރީ ލަންކާއަށް ވަޑައިގެންނެވއިރު ޑރ ޖަމީލް ބައިވެރިވެވަޑައި ނުގެންނެވީ ދެބޭފުޅުންގެ ދެމެދުގައި މައްސަލައެއް އުޅެނީތޯ ދެންނެވުމުން އެމަނިކުފާނު ވިދާޅުވީ އެފަދަ ކަމެއް ނޫޅޭ ކަމަށެވެ.
އެސުވާލަށް ޖަވާބު ދެއްވަމުން ރައީސް ނަޝީދު ވިދާޅުވީ އެއްވެސް މައްސަލައެއް ޑރ. ޖަމީލާ ދެމެދު ނެތްކަމަށާއި ދެބޭފުޅުންގެ ދެމެދުގައި އޮންނަނީ ވަރަށް ގާތް ގުޅުމެއް ކަމަށެވެ. އަދި ގިނަގިނައިން ބައްދަލުވެ މަޝްވަރާތައް ކުރައްވަމުން ގެންދަވާ ކަމަށްވެސް އެމަނިކުފާނު ވިދާޅުވިއެވެ.
"އެއްވެސް މައްސަލައެއް އުޅެނީ އެއް ނޫން، އަޅުގަނޑު މިތަނަށް އައި އިރުވެސް ޑރ. ޖަމީލާ ބައްދަލުކޮށްފައި އަޅުގަނޑު މި އައީ އަދި އަޅުގަނޑުމެން އިނގިރޭސީވިލާތުގައި އުޅޭ އިރުގައި މަދުވެގެން ހަފްތާއަކު ދެ ފަހަރު އަޅުގަނޑުމެން ދެ މީހުން ބައްދަލުވެ މަޝްވަރާކޮށް ހަދަން، އަޅުގަނޑާ ޖަމީލާ ދޭތެރޭގައި އޮންނަނީ ވަރަށް ގާތް ގުޅުމެއް، ހަމަގައިމުވެސް އަޅުގަނޑު ވަރަށް އިޚްތިރާމްކުރަން ޖަމީލަށް، އަޅުގަނޑު ދެކޭ ގޮތުގައި ޑރ. ޖަމީލަކީ ދިވެހިރާއްޖޭގެ ސިޔާސީ ލީޑަރުންގެ ތެރެއިން ވަރަށް ބޮޑެތި ކާމިޔާބީތަކެއް ހޯއްދަވާފައި ހުންނެވި ބޭފުޅެއް، އެހެންވީމަ އަޅުގަނޑުމެން އިރާދަކުރެއްވިއްޔާ ޑރ. ޖަމީލާއެއްކޮށް މަސައްކަތް ކުރަމުން ކުރިއަށް އޮތްތަނުގައި ވެސް ދާނަން" ރައީސް ނަޝީދު ވިދާޅުވިއެވެ.
ރައީސް ނަޝީދު ވިދާޅުވީ އެމްޔޫއޯއަކީ އެމްޑީޕީއަށް ވަރަށް މުހިއްމު އިއްތިހާދެއް ކަމަށާއި އެންމެބޮޑު ބޭނުމަކީ އެހެން ސިޔާސީ ޕާޓީތަކާ އެކުގައި އެމްޑީޕީ މަސައްކަތްކުރުމުގެ ތަރުތީބުތަކެއް ހޯދުން ކަމަށެވެ.
ރައީސް ނަޝީދު ވިދާޅުވީ ޖުމްހޫރީ ޕާޓީވެސް އަދި ރައީސް މައުމޫން ވެސް އިއްތިހާދާގުޅި މި ސިޔާސީ އެކުވުމުގައި މިހާރަށް ވުރެ މާބޮޑަށް ބައިވެރިވެވަޑައިގެން މަސައްކަތް ކުރައްވާނެ ކަމަށް އުއްމީދު ކުރައްވާކަމަށެވެ.
"އެމްޔޫއޯގެ އެންމެ ބޮޑު ބޭނުމަކީ އެހެން ސިޔާސީ ޕާޓީތަކާ އެކުގައި އެމްޑީޕީ މަސައްކަތްކުރުމުގެ ތަރުތީބުތަކެއް ހޯދުން، އަޅުގަނޑުމެންނަށް ވަރަށް ދަތިވެފައި އޮންނަނީ އެހެން ޕާޓީއަކާ އެކުގައި މަސައްކަތް ކުރަން، އަޅުގަނޑު ދުށް ގޮތުގައި އަދި މިހާރު ވެސް އަޅުގަނޑު ދެކޭ ގޮތުގައި ޑިމޮކްރަސީގެ ވަރަށް މުހިންމުކަމެއް އެއީ ތަފާތު ފިކުރުތަކުގެ ޕާޓީތަކާއެކުގައި މަސައްކަތްކުރުމުގެ ތަޖުރިބާތަކެއް ހޯދުން، އެމްޔޫއޯ އިން އަޅުގަނޑުމެންނަށް އެ ފުރުސަތު ވަރަށް ފުޅާކޮށް ލިބިގެންދޭ، އަޅުގަނޑުމެންނަށް އެބަ ލިބޭ އަދާލަތު ޕާޓީއާއެކުގައި މަޝްވަރާކޮށްގެން އަދާލަތު ޕާޓީއާއެކުގައި މަސައްކަތްކުރުމުގެ ވަރަށް ބޮޑު ޖާގަ، ހަމައެއާއެކީގައި ކާނަލް ނާޒިމާއި ޑރ. ޖަމީލަށް ތާއީދުކުރާ ފަރާތްތަކާ އެކީގަވެސް މަސައްކަތް ކުރުމުގެ ފުރުސަތު އަޅުގަނޑުމެންނަށް ލިބިގެންދޭ، އަޅުގަނޑު އަދިވެސް އުންމީދު ކުރަނީ ޖުމްހޫރީ ޕާޓީ ވެސް އަދި ރައީސް މައުމޫން ވެސް އަޅުގަނޑުމެން މި ސިޔާސީ އެކުވުމުގައި މިހާރަށް ވުރެ މާބޮޑަށް ބައިވެރިވެވަޑައިގެން މަސައްކަތް ކުރައްވާނެ ކަމަށް" ރައީސް ނަޝީދު ވިދާޅުވިއެވެ.
ލޯކަލް ކައުންސިލް އިންތިހާބުގައި ބައިވެރިނުވަން އަދާލަތު ޕާޓީން ނިންމިޔަސް، އެ ޕާޓީއާ ވެސް ގުޅުން ގޯސްނުވާ ކަމަށެވެ. ލޯކަލް ކައުންސިލް އިންތިހާބުގައި އެމްޑީޕީން ވާދަކުރުމަކީ މުހިންމު ކަމެއް ކަމަށާއި ސިޔާސީ ކަންކަމުގައި "މޫނުމަތީގެ އަގަށް" ބަލަންޖެހޭނެ ކަމަށެވެ.
