ގައިދީންގެ އަދަބު ލުއިކޮށްދިނުމަށްޓަކައި ގާނޫނީ ގޮތުން ކުރަންޖެހޭ ކަންކަން އޮތީ ނިމުމުގެ މަރުހަލާގައި: އަޒްލީން
ދެތިން ސަތޭކަ ގައިދީންނަށް އަދަބު ލުއިކޮށްދެވޭނެ
މޯލްޑިވްސް ކަރެކްޝަނަލް ސާރވިސްއިން ހިންގި ކޯސްތަކުގެ ދަސްވެނިންނަށް ސެޓްފިކޭޓް ހަވާލު ކުރުމުގެ ރަސްމިއްޔާތުގެ ތެރެއިން
ގައިދީންނަށް އަދަބު ލުއިކޮށްދިނުމަށްޓަކައި ގާނޫނީ ގޮތުން ކުރަންޖެހޭ ކަންކަން މިހާރު ވަނީ ނިމުމުގެ މަރުހަލާގަ ކަމަށް ހޯމް އެފެއާރޒް މިނިސްޓަރު އަޒްލީން އަހުމަދު ވިދާޅުވެއްޖެ އެވެ.
މިނިސްޓަރު އަޒްލީން އެގޮތަށް ވިދާޅުވީ މޯލްޑިވްސް ކަރެކްޝަނަލް ސާރވިސް (ކަރެކްޝަންސް)ގެ އިންސްޓިޓިއުޓް ފޮރ ކަރެކްޝަނަލް ސްޓަޑީޒްއިން ހިންގި ކޯސްތަކުގެ ދަސްވެނިންނަށް ސެޓްފިކެޓާއި މެޑަލް ދިނުމަށް އާދިއްތަ ދުވަހުގެ ރޭ ކ. މާފުށީ ޖަލުގައި ބޭއްވި ހާއްސަ ޖަލްސާގަ އެވެ.
އަޒްލީން ވިދާޅުވީ ދެ ތިން ސަތޭކަ ގައިދީންނަށް އަދަބު ލުއިކޮށްދެވޭނެ ކަމަށް ރައީސުލްޖުމްހޫރިއްޔާ އަބްދުﷲ ޔާމީން ވިދާޅުވެފައިވާ ކަމަށާއި އެހެންކަމުން އެމަސައްކަތް މިހާރު ކަމާބެހޭ ފަރާތްތަކާއެކު ކުރަން އަންނަ ކަމަށެވެ. އެގޮތުން އެޓަރނީ ޖެނަރަލްގެ ލަފާ އެކަމަށް ވަރަށް މުހިއްމު ކަމަށާއި މިހާރު ގާނޫނީ ގޮތުން ކުރަންޖެހޭ ކަންކަން ވަނީ ނިމުމުގެ މަރުހަލާގަ ކަމަށް އަޒްލީން ވިދާޅުވި އެވެ.
އެ ޖަލްސާގައި ވަނީ ކެރެކްޝަންސް އިން ހިންގި ކޯސްތަކުގައި ފާސްވި ގައިދީންނަށް ސެޓްފިކެޓް އަދި ހަޔަރ ޑިސްޓިންކްޝަން ހޯދި ގައިދީންނަށް ސެޓްފިކެޓާއި މެޑަލް ވެސް ދީފަ އެވެ.
ކަރެކްޝަންސްއިން ހިންގި ކޯސްތަކުގެ ތެރޭގައި ޤުރްއާނުގެ އުނގެނުމުގެ ކޯސްތަކާއި ފަހާ ކޯސްތަކާއި ސްޓާރޓިންގ އެގްރިކަލްޗަރ ކޯސްތަކާއި ހައުސް ވަޔަރިން އެންޑް އިލެކްޓްރިޝަން ކޯސްތަކުގެ އިތުރުން ކޮމްޕިއުޓަރ އެޕްލިކޭޝަން ފަދަ ކޯސްތައް ހިމެނެ އެވެ.
