ހެއިޓީގައި ތިބި އދ.ގެ ސުލްހަ ބަލަހައްޓާ ފައުޖުތައް ބޭލުމަށްފަހު މަދު ފުލުހުން ކޮޅެއް ބޭނުންކުރުމަށް އދ.ގެ ސަލާމަތީ މަޖިލީހުގެ އިއްތިފާގުން  ބުރާސްފަތި ދުވަހު ފާސްކޮށްފިއެވެ.

އެގައުމުން އދ.ގެ ސިފައިން ބޭލުމަށް ނިންމާފައި އެވަނީ ތޭރަ އަހަރަށްފަހުއެވެ.

މި ފިޔަވަޅަކީ ކެރީބިއަންގައި ހިމެނޭ މިގައުމަށް ކާމިޔާބު އިންތިޚާބަކަށްފަހު ހަމަޖެހުން އަންނަމުންދާކަން ބައިނަލްއަގުވާމީ ފަރާތްތަކުން ގަބޫލު ކުރާކަމުގެ ނިޝާނެކެވެ.

އެންމެ ގިނަ ދުވަސްވަންދެން އދ.ގެ ފައުޖުތައް ތިބި އެއްގައުމު ކަމަށްވާ ހެއިޓީގައި އެ ފައުޖުތަކާމެދުވަނީ ބޮޑެތި ތުހުމަތުތަކެއް ކުރެވިފައެވެ.

އޭގެ ތެރޭގައި އެގައުމަށް ކޮލެރާ ފެތުރުވުމާއި ހެއިޓީގެ ރައްޔިތުންނާމެދު ޖިންސީ ފުރައްސާރަ ކުރުމުގެ ތުހުމަތު ހިމެނެއެވެ. އެ ގައުމުގައި ކޮލެރާ ފެތުރި އެތައް ހާސް ބަޔަކު މަރުވިއެވެ.

ފަނަރަ މެމްބަރުންގެ މައްޗަށް އެކުލެވިގެންވާ ސަލާމަތީ މަޖިލީހުން ފާހަގަކުރި ގޮތުގައި ރިޔާސީ އިންތިޚާބެއް ފުރިހަމަކޮށް އާ ރައީސަކު ހުވާކުރުމަކީ އެ ގައުމުގެ ހަމަޖެހުމަށް ހޯދުނު އެންމެ ބޮޑު ކާމިޔާބެވެ.

ޖުމްލަ 346 މިލިއަން ޑޮލަރުގެ މިޝަން ނިންމާލާފައި މިވަނީ އދގެ ސުލްހަ ބަލަހައްޓާ ފައުޖުތަކަށް އެމެރިކާއިން އދ އަށް ދޭ މާލީ އެހީތެރިކަން ހުއްޓާލުމަށް އެ ގައުމުން ބަލަމުންދާތީ މިޝަން ހުއްޓާލުމަށް އދގެ ސެކްރެޓަރީ ޖެނެރަލް އެންޓޯނިއޯ ގުޓަރެސް ލަފާ ދެއްވާފައިވަނިކޮށެވެ.