ސީރިއާގައި ހިނގަމުންދާ ހަނގުރާމައަށް ސުލްހަ ގެނައުމަށް ކަޒަކަސްތާނުގެ ވެރިރަށް އަސްތަނާގައި އާ މަޝްވަރާތަކެއް ބޭއްވުމަށް ނިންމާފައިވާ ކަމަށް ރިޕޯޓުތައް ބުނެފިއެވެ.
ސުލްހައިގެ މަޝްވަރާތަކުގައި މެދުވެރިއެއްގެ ރޯލް އަދާކުރަނީ ރަޝިއާ އާއި އިރާން ކަމަށްވާއިރު އެދެގައުމަކީ ސީރިޔާގެ ސަރުކާރަށް ވާގިވެރިވާ ދެގައުމު ކަމަށްވާއިރު ސީރިޔާގެ ހަނގުރާމަވެރިންނަށް ތާއިދު ކުރަނީ ތުރުކީންނެވެ.
މިއީ އދ އިން އިސްނަގައިގެން މިދިޔަ އަހަރު ޖެނީވާގައި ބޭއްވުނު ސުލްހައިގެ މަޝްވަރާތައް މިދިޔަ އަހަރު ކުރީކޮޅު ސަސްޕެންޑް ކުރިފަހުން ބާއްވާ މިފަދަ ފުރަތަމަ ސުލްހައިގެ މަޝްވަރާތަކެވެ.
މިހާރު ބާއްވަން އުުޅޭ މަޝްވަރާތަކުގައި އިސްލާމިކް ސްޓޭޓް (އައިއެސް) ނުހިމެނެއެވެ. ސީރިޔާގައި ހިނގަމުންދާ ދާޚިލީ ހަނގުރާމައަށް ހައަހަރުވާން ގާތްވެފައިވާ އިރު މިހާތަނަށް 310،000 މީހުން މަރުވެފައިވާ ކަމަށް ރިޕޯޓުތައް ބުނެއެވެ. އަދި އެތައް ބަޔަކު ރެފިއުޖީންގެ ގޮތުގައި ވެފައިވެއެވެ.
