ސީރިޔާގެ ސުލްހައިގެ މަޝްވަރާތައް ފެށިއްޖެ

ސިރިޔާގެ ސުލްހައިގެ މަޝްވަރާތަކުގައި އެގައުމުގެ ސަރުކާރުގެ އެއްވެސް ފަރާތަކާ އެކު މަޝްވަރާ ކުރަން ބޭނުންނުވާ ކަމަށް ސަރުކާރާޢި އިދިކޮޅު ޖަމާއަތްތަކުން އިއުލާންކޮށްފި އެވެ.

ސީރިޔާގެ ސުލްހައިގެ މަޝްވަރާތައް ކުރިއަށްދަނީ ކަޒަކިސްތާނުގެ ވެރިރަށް އާސްތާނާގަ އެވެ. މިއީ، ޑިސެމްބަރ 30ގައި ހަމަލާތައް ހުއްޓާލުމަށް އެއްބަސްވުމަށް ފަހު، ރަޝިޔާ، އިރާން އަދި ތުރުކީ މެދުވެރިވެގެން ބާއްވާ ފުރަތަމަ މަޝްވަރާތަކެވެ.

މި މަޝްވަރާގައި ސޫރިޔާގެ ސަރުކާރު ތަމްސީލުކުރާ ބައްޝާރު އަލް ޖާފަރީ ވަނީ އިދިކޮޅު ޖަމާއަތްތަކަކީ ޓެރަރިސްޓުން ކަމަށް ސިފަކުރައްވާފަ އެވެ. އަދި، ޓެރަރިސްޓުންނާއެކީ މަޝްވަރާކުރުމަކީ ސީރިޔާ ސަރުކާރުގެ އުސޫލެއް ނޫން ކަމަށް ވެސް އޭނާ ވިދާޅުވި އެވެ.

ސީރިޔާގެ ދާހިލީ ހަނގުރާމައަށް ހަ އަހަރުވެފައިވާ އިރު، މިހާތަނަށް ކުރިއަށް ގެންދިޔަ ސުލްހައިގެ މަޝްވަރާތަކުން އެއްވެސް ހައްލެއް ހޯދިފައެއް ނުވެ އެވެ. އަދި، ހަމަލާތައް ހުއްޓާލުމަށް އެއްބަސްވާ އެއްބަސްވުންތަކުން ވެސް އެކަށީގެންވާ ހައްލެއް ލިބިފައެއް ނުވެ އެވެ. މީގެ އިތުރުން، ހަމަލާތައް ހުއްޓާލުމަށް އެކުލަވާލާ އެއްބަސްވުންތަކާއި ދެ ފަރާތުން ވެސް ހިލާފުވަމުންދާ ކަމަށް ވެސް ގިނަ ރިޕޯޓުތައް ބުނެ އެވެ.

މިހާރު ކުރިއަށްދާ މަޝްވަރާތައް ދެ ދުވަހަށް ކުރިއަށް ގެންދިޔުމަށް ނިންމާފައިވެ އެވެ. މި މަޝްވަރާތަކަށް އައިއެސް އާއި އަލް ނުސްރާ ފްރަންޓް ފިޔަވާ އެހެން ޖަމާއަތްތަކަށް ވަނީ ދައުވަތު އަރުވާފަ އެވެ.

އދ. އިން ކުރިއަށް ގެންދާ މަޝްވަރާތައް ފެށުމަށް ހަމަޖެހިފައިވަނީ ފެބްރުއަރީ 8 ގައެވެ.