ސުލްހަ ހޯދައިދޭން ޓްރަމްޕް ފަލަސްތީނާއި އިޒްރާއީލަށް!

ފަލަސްތީނުގެ ބިންތަކަށް އިސްރާއީލުން ވެރިގަތުމާ ގުޅިގެން އުފެދިފައި ހަމަނުޖެހުމާއި ނުތަނަވަސް ކަމަށް ސުލްޙަ ހޯދައިދިނުމަށް އެމެރިކާގެ ރައީސް ޑޮނަލް ޓްރަމްޕް އެ ދެގައުމަށް ދަތުރުފުޅެއް ފައްޓަވައިފިއެވެ.

ސައުދީ އަރަބިއްޔާގެ ރަސްގެފާނުގެ ދައުވަތަކަށް އެގައުމަށް ވަޑައިގަންނަވާ މުސްލިމު ގައުމުތަކާއި އެމެރިކާގެ ސަމިޓުގައި ބައިވެރިވެވަޑައިގަތުމަށް ފަހު ހޯމަ ދުވަހުގެ ވަގުތެއްގައި ޓްރަމްޕް އިޒްރާއީލަށް ވަޑައިގަންނަވާނެއެވެ.

ޓްރަމްޕްގެ މި ދަތުރުފުޅާ ގުޅިގެން ސަލާމަތީ ކަންކަން ވަރަށް ވަރުގަދަ ކުރެވިފައިވާއިރު، މި ދަތުރުފުޅުގައި އިސްރާއީލްގެ ބޮޑު ވަޒީރު ބެންޖަމިން ނަތަންޔާހޫ އާއި ފަލަސްތީނުގެ ރައީސް މަހްމޫދު އައްބާސްއާ ބައްދަލު ކުރައްވާނެއެވެ.

އެގޮތުން ނަތަންޔާހޫއާ އެއްކޮށް ގުދުސްގައި ބާއްވަވާ ބައްދަލުވުންތައް ހޯމަ ދުވަހު (މިއަދު) ބާއްވަވާއިރު، މަހްމޫދު އައްބާސް އާ ބައްދަލުކުރައްވާނީ އަންގާރަ ދުވަހު (މާދަމާ) ހުޅަނގު އައްސޭރީގެ ބައިތުލެހަމްގައި އެވެ.

މި ދަތުރުފުޅާ ގުޅިގެން އިޒްރާއީލާއި ފަލަސްތީނަށް ސުލްހަ ހޯދޭނެ ކަމަށް ޓްރަމްޕް ގަބޫލް ކުރައްވައެވެ.

އިސްރާއީލާއި ފަލަސްތީނުގެ ލީޑަރުންނާ ޓްރަމްޕް ބައްދަލު ކުރައްވާއިރު، ސުލްހައިގެ އެއްބަސްވުމުގެ ކަރުދާސް އެކުލަވާލަން ޖެހޭނީ އިޒްރާއީލާއި ފަލަސްތީނުން ކަމަށް ޓްރަމްޕް ވިދާޅުވެފައި ވެއެވެ.

ދެ ގައުމު ސުލްޙަ ކުރުމަށް ހޯމަ ދުވަހު ޓްރަމްޕް އިޒްރޭލަށް ވަޑައިގަންނަވާއިރު، އިސްރާއީލުން އިރުމަތީ ގުދުސް ހިފިތާ 50 އަހަރު ފުރުން ފާހަގަ ކުރުމުގެ ގޮތުން އާދިއްތަ ދުވަހު އިސްރާއީލުން ބޭއްވި ރަސްމިއްޔާތެއްގައި ވާހަކަ ދައްކަވަމުން ނަތަންޔާހޫ ވިދާޅުވީ އިސްރާއީލުން ގުދުސަށް ވެރިވެގަތީ ނޫން ކަމަށާއި އެގައުމުން އެސަރަހައްދު މިނިވަން ކުރީ ކަމަށެވެ.

"އަޅުގަނޑު މުޅި ދުނިޔެއަށް ވަރަށް ސާފުކޮށް ބުނެލަން އޮތީ ގުދުސް އަބަދުވެސް އޮތީ އިސްރާއީލުގެ ވެރިރަށުގެ ގޮތުގައި ކަމަށް. އަދި އޮންނާނީ ވެސް އެގޮތުގައި ކަމަށް،" ނަތަންޔާހޫ ވިދާޅުވި އެވެ.

މި ދަތުރުފުޅާ ގުޅިގެން، ފަލަސްތީނާއި އިޒްރާއީލާއި ދެމެދު ސުލްހައިގެ މަޝްވަރާތައް ކުރުމުގައި މެދުވެރިއެއްގެ ބައި މީގެ ކުރިން އަދާކުރެއްވި މުޙައްމަދު ޝްތައްޔާހް ވިދާޅުވީ މި ސުލްހައިގެ ވާހަކަ ދައްކާއިރު މުހިންމު ނުކުތާއަކަށް ވަނީ ފަލަސްތީނުގެ އިމުގައި އިޒްރާއީލުން ޔަހޫދިންނަށް ގެދޮރު އަޅާ މައްސަލަ ކަމަށެވެ.

"މި މައްސަލައިގައި ޓްރަމްޕަށް ނަތަންޔާހޫއާ އެއްވެސްވަރެއްގެ މަޝްވަރާއެއް ކުރެވިއްޖެ ނަމަ، ރަނގަޅު އަލިމަގެއް ފެނިދާނެ، އެހެން ނޫން ނަމަ މުޅި ޕްލޭން ފުޑުފޑުވާނެ" ޝްތައްޔާހް ވިދާޅުވިއެވެ.

ޝްތައްޔާހް ވިދާޅުވީ ފަލަސްތީނުގެ އިމުގައި އިޒްރޭލުން ޔަހޫދިންނަށް ގެދޮރު އަޅާ މައްސަލަ ހުއްޓުވުމަށް ޓްރަމްޕަށް އެއްވެސް މަސައްކަތެއް ކުރެއްވިދާނެ ކަމާ މެދު ސުވާލު އުފެދޭ ކަމަށެވެ.

މި ދަތުރުފުޅާ ގުޅޭ ގޮތުން ހަމާސް ޖަމާއަތުގެ ވިސްނުން ވެސް ވަރަށް ތަފާތެވެ. އެ ޖަމާއަތުގެ ތަރުޖަމާނު ފައުޒީ ބަރްހޫމް ވިދާޅުވީ، މުސްތަގްބަލުގައި ވެސް ފަލަސްތީނާއި އިޒްރޭލާ ދެމެދު ބާއްވާ މަޝްވަރާތަކުގައި ބައިވެރިކުރުމަށް ޓްރަމްޕްއަކީ ތެދުވެރި ރަނގަޅު މެދުވެރިއެއް ނޫން ކަމަށެވެ.

ބަރްހޫމް ވިދާޅުވީ މިހާރު ޓްރަމްޕްއަކީ ވަކިއަތަކަށް ޖެހިވަޑައިގެން ހުންނެވި ފަރާތެއް ކަމަށާއި އެގޮތުން މިހާރު ވެސް ޓްރަމްޕް ގެންދަވަނީ ފަލަސްތީނުގެ ނިކަމެތި ރައްޔިތުންނަށް ދެރަލިބޭ ގޮތަށް އަމަލު ކުރައްވަމުން ކަމަށެވެ.

އިޒްރާއީލާ ގާތް ގުޅުމެއް ބާއްވަވާ ޓްރަމްޕް އިޒްރޭލަށް މި ވަޑައިގަންނަވަނީ ރިޔާސީ އިންތިޚާބުގެ ކެމްޕޭންތެރޭގައި އެމެރިކާ އެމްބަސީ ގުދުސް އަށް ބަދަލު ކުރާނެ ކަމަށް ޓްރަމްޕް ވިދާޅުވެފައި ވަނިކޮށެވެ.

ވެރިކަމަށް ވަޑައިގަތުމަށް ފަހު ޓްރަމްޕް ގައުމުން ބޭރަށް ކުރައްވާ މި ދަތުރުފުޅުގައި ސައުދީއަށް ވަޑައިގަންނަވާފައި އިރު، ފަލަސްތީނާއި އިޒްރާއީލުގެ އިތުރުން ދެން ވަޑައިގަންނަވާނީ ބެލްޖިއަމް، ވަޓިކަން އަދި ސިސިލީ އަށެވެ.