މާލީގެ "ޓެރެރިސްޓް ގްރޫޕްތަކުން" ސީރިއަސް ކަމާއެކު ސުލްހައިގެ ވާހަކަތަކުގައި ބައިވެރި ނުވާހާ ހިނދު އެ ޖަމާއަތްތަކާ ދެކޮޅަށް ހަމަލާތައް ދެމުންގެންދާނެ ކަމަށް އެ ގައުމުގެ ރައީސް އިބްރާހިމް ބޫބަކްރް ކީޓާ ވިދާޅުވެއްޖެއެވެ.

ފަރަންސޭސި ފައުޖުތަކާއި އދގެ ސުލްހަބަލަހައްޓާ ފައުޖުގެ 11،000 ސިފައިންނާއިއެކު އަދި އަހަރުތަކަކަށް ދެމިގެން ގޮސްފައިވާ ސުލްހައިގެ ވާހަކަތަކާއެކު މާލީ އޮތީ ސިޔާސީ އަދި ދީނީ ހަމަނުޖެހުން ތަކާ ދުރުގައެވެ.

އަލްޖަޒީރާގެ ބިލާ ހުދޫދު ޕްރޮގްރާމްގައި ކީޓާ ވިދާޅުވީ ސުލްހަމަސަލަސްކަން ދެމެހެއްޓުމަށް އެކުވެރި ފައުޖުތައް އެގައުމުގައި ދެމިތިބޭ މުއްދަތު އިތުރުކުރުމަށްވެސް ތައްޔާރަށް ހުންނެވި ކަމަށެވެ.

"އަޅުގަނޑުމެން އެމީހުންނާއެކު ސުލްހައިގެ ވާހަކަތައް ކުރިޔަށް ގެންދެވޭތޯ ބަލާއިރު، އެމީހުން ދަނީ އަޅުގަނޑުމެންނާ ދެކޮޅަށް ހަމަލާތައް ދެމުން" ކީޓާ ވިދާޅުވިއެވެ.

މާލީގެ ރައީސްކަން 2013 ވަނަ އަހަރުންފެށިގެން ކުރައްވަމުން ގެންދަވާ ކީޓާ ވަނީ 2018 ވަނަ އަހަރު ބާއްވާ އިންތިޚާބުގައި ދެވަނަ ދައުރަކަށް ކުރިމަތި ލައްވަފާނެ ކަމުގެ އިޝާރާތެއް ދެއްވާފައެވެ.

ނޭޝަނަލް މޫވްމެންޓް ފޮރ ދި ލިބަރޭޝަން އޮފް އަޒްވަޑް(އެންއެމްއެލްއޭ) ކިޔާ ހަތިޔާރު އެޅި ޖަމާއަތަކުން 2012 ވަނަ އަހަރުވަނީ ފްރާންސަށްވުރެ ބޮޑު ސަރަހައްދެއް މާލީގެ ބިމުން ހިސާރުކޮށް އެމީހުންގެ ކޮންޓްރޯލްގެ ދަށަށް ގެންގޮސްފައެވެ.

އެ ޖަމައާތުގެ ބާރުގެދަށުން އެ ސަރަހައްދުތައް އަތުލާފައިވަނީ އިސްލާމީ ޝަރީއަތް ހަރުކަށިކޮށް މާނަކޮށް އެކަންކަން އެގައުމުގެ ބޮޑު އާބާދީއެއްގެ މައްޗަށް ތަންފީޒު ކުރި އަލްގައިދާއި ގުޅިފައިވާ ހަނގުރާމަވެރި ޖަމާއަތްތަކުންނެވެ.

އެ އަހަރުގެ ޖެނުއަރީ މަހު ފްރާންސުންވަނީ އެގަމުގެ ހަނގުރާމަވެރި ޖަމާއަތްތަކާ ދެކޮޅަށް އަސްކަރީ އޮޕަރޭޝަނެއް ފަށާފައެވެ.

 މާލީއަކީ ކުރިން ފްރާންސްގެ އަޅުވެތިކަމުގެ ދަށުގައި އޮތްގައުމެކެވެ.

ކީޓާ ވިދާޅުވީ އެގައުމުގައި އެމެރިކާގެ ސިފައިން ގާއިމްވެ ނެތްނަމަވެސް އެ ގައުމުގެ ސަރުކާރަށް އެމެރިކާއަސްކަރިއްޔާއިންނާއި އިންޓެލިޖެންސުން އެހީތެރިވަމުންދާކަމަށެވެ.