ސީރިޔާ ހަނގުރާމައިގެ ސުލްހައިގެ މަޝްވަރާތައް: ފުރަތަމަ ދުވަސް ކޮޅެއްގައި ނުޖެހުނު
ސީރިޔާގައި ހިނގަމުންދާ ދާޚިލީ ހަނގުރާމައަށް ހައަހަރުވާން ގާތްވެފައިވާ އިރު މިހާތަނަށް 310،000 މީހުން މަރުވެފައިވާ ކަމަށް ރިޕޯޓުތައް ބުނޭ
މަޝްވަރާތައް ކުރިއަށް ދަނީ
ސީރިޔާގެ ހަނގުރާމައަށް ސުލްހަ ގެނައުމަށް ސީރިޔާ ސަރުކާރާއި، އިދިކޮޅު ހަނގުރާމަވެރިންނާ ދެމެދު ކަޒަކިސްތާނުގެ ވެރިރަށް އަސްތާނާގައި ހޯމަދުވަހު ފެށި މަޝްވަރާތަކުގެ ފުރަތަމަ ދުވަސް ކޮޅެއްގައި ނުޖެހި ނިމިއްޖެއެވެ.
ގިނަ އަހަރުތަކެއް ވެފައިވާ ސީރިޔާ ހަނގުރާމަ އަށް ސުލްހަ ގެނައުމަށް އިދކޮޅު ހަނގުރާމަވެރިންނާއި ސަރުކާރު ބައިވެރިގެން ކުރިޔަށްދާ މަޝްވަރާތަކުގެ ފުރަތަަމަ ދުވަހު، މަޝްވަރާތައް ފެށިތާ މާގިނައިރުތަކެއް ނުވެ އެއް ފަރާތުން އަނެއް ފަރާތަށް ބަހުގެ ހަމަލާތައް ރައްދުކޮށް ތަފާތު ތުހުމަތުތަކެއް ކުރިތަން ފެނިގެން ދިޔައެވެ.
އިދިކޮޅު ހަނގުރާމަވެރިންގެ ތަރުޖަމާނު އުސާމާ އަބޫ ޒައިދު އޭއެފްޕީއާ ވާހަކަ ދައްކަމުން ބުނީ މަޝްވަރާތައް ކާމިޔާބު ވެއްޖެ ނަމަ މަޝްވަރާއާ ގުޅޭ ކަން ކަމަށް ކަމަށް އަމަލު ކުރާނެ ކަމަށެވެ.
ސުލްހައިގެ މަޝްވަރާތަކުގައި މެދުވެރިއެއްގެ ރޯލް އަދާކުރަނީ ރަޝިއާ އާއި އިރާން ކަމަށްވާ އިރު އެދެގައުމަކީ ސީރިޔާގެ ސަރުކާރަށް ވާގިވެރިވާ ދެގައުމެވެ. ސީރިޔާގެ ހަނގުރާމަވެރިންނަށް ތާއިދު ކުރަނީ ތުރުކީންނެވެ.
މިއީ އދ. އިން އިސްނަގައިގެން މިދިޔަ އަހަރު ޖެނީވާގައި ބޭއްވި ސުލްހައިގެ މަޝްވަރާތައް މިދިޔަ އަހަރު ކުރީކޮޅު ސަސްޕެންޑް ކުރި ފަހުން ބާއްވާ މިފަދަ ފުރަތަމަ ސުލްހައިގެ މަޝްވަރާތަކެވެ.
މިހާރު ބާއްވަން އުުޅޭ މަޝްވަރާތަކުގައި އިސްލާމިކް ސްޓޭޓް (އައިއެސް) ނުހިމެނެއެވެ.
ސީރިޔާގައި ހިނގަމުންދާ ދާޚިލީ ހަނގުރާމައަށް ހައަހަރުވާން ގާތްވެފައިވާ އިރު މިހާތަނަށް 310،000 މީހުން މަރުވެފައިވާ ކަމަށް ރިޕޯޓުތައް ބުނެއެވެ. އަދި އެތައް ބަޔަކު ރެފިއުޖީންގެ ގޮތުގައި ވެފައިވެއެވެ.
