ސީރިޔާގެ ހަނގުރާމައަށް ސުލްހަ ގެނައުމަށް ސީރިޔާ ސަރުކާރާއި، އިދިކޮޅު ހަނގުރާމަވެރިންނާ ދެމެދު ކަޒަކިސްތާނުގެ ވެރިރަށް އަސްތާނާގައި ދާދިފަހުން ބޭއްވުނު މަޝްވަރާތަކަކީ ފެބްރުއަރީ 8 ގައި ޖެނިވާގައި ބާއްވާ މަަޝްވަރާތަކުގައި ބޭނުން ކުރެވިދާނެ އަސާސެއް ކަމަށް ރަޝިއާގެ ރައީސް ވްލަޑީމިއާ ޕުޓިން ވިދާޅުވެއްޖެއެވެ.
ރައީސް ޕުޓިންގެ ތަރުޖަމާނު ޕުޓިންއާ ހަވާލާދީ މިހެން ވިދާޅުވި އިރު އަސްތަނާގައި ބޭއްވުނު މަޝްވަރާތަކުން އަލިމަގެއް ފެނިފައި ނުވާ ކަމަށް ރިޕޯޓުތައް ބުނެއެވެ.
އެގޮތުން، ގިނަ އަހަރުތަކެއް ވެފައިވާ ސީރިޔާ ހަނގުރާމަ އަށް ސުލްހަ ގެނައުމަށް އިދކޮޅު ހަނގުރާމަވެރިންނާއި ސަރުކާރު ބައިވެރިގެން ކުރިޔަށްގެންދިޔަ މަޝްވަރާތަކުގެ ފުރަތަަމަ ދުވަހު ވެސް މަޝްވަރާތައް ފެށިތާ މާގިނައިރުތަކެއް ނުވެ އެއް ފަރާތުން އަނެއް ފަރާތަށް ބަހުގެ ހަމަލާތައް ރައްދުކޮށް ތަފާތު ތުހުމަތުތަކެއް ކުރިތަން ފެނިގެން ދިޔައެވެ.
ސުލްހައިގެ މަޝްވަރާތަކުގައި މެދުވެރިއެއްގެ ރޯލް އަދާކުރީ ރަޝިއާ އާއި އިރާން ކަމަށްވާ އިރު އެދެގައުމަކީ ސީރިޔާގެ ސަރުކާރަށް ވާގިވެރިވާ ދެގައުމެވެ. ސީރިޔާގެ ހަނގުރާމަވެރިންނަށް ތާއިދު ކުރަނީ ތުރުކީންނެވެ.
ސީރިޔާގައި ހިނގަމުންދާ ދާޚިލީ ހަނގުރާމައަށް ހަ އަހަރުވާން ގާތްވެފައިވާ އިރު މިހާތަނަށް 310،000 މީހުން މަރުވެފައިވާ ކަމަށް ރިޕޯޓުތައް ބުނެއެވެ. އަދި އެތައް ބަޔަކު ރެފިއުޖީންގެ ގޮތުގައި ވެފައި ވެއެވެ.
