ޖީއެސްޓީ ސިޔާސަތަށް ސަރުކާރުން ބަދަލު ގެންނަން ޖެހުނީ ރާއްޖެ ބޮއިކޮޓް ކޮށްފާނެ ކަމުގެ ބިރު އޮތުމުން: ޚަލީލް
19 ނޮވެމްބަރު 2026 | ބުރާސްފަތި 09:18ޖީއެސްޓީއަށް ގެންނަން އުޅުނު ބަދަލުތަކަކީ އަމަލީގޮތުން ތަންފީޒުކުރަން ދަތި އަދި ބައިނަލްއަގުވާމީ ޓުއާ އޮޕަރޭޓަރުންގެ ބޮޑު ކަންބޮޑުވުމެއް އޮތް ކަމެއްކަމަށް މުޙައްމަދު ޚަލީލް ވިދާޅުވެއްޖެ. މި ނިންމުންތަކުގެ ސަބަބުން ރާއްޖޭގެ ފަތުރުވެރިކަމުގެ އިތުބާރު ގެއްލި މާކެޓަށް ނޭދެވޭ އަސަރުކޮށްފައިވާތީ، މިހާރު އެންމެ މުހިންމީ އެ އިތުބާރު އަލުން އާލާކުރުން ކަމަށް އޭނާ ފާހަގަކުރެއްވި

ޗައިނާގެ ފަތުރުވެރިންގެ ގްރޫޕަކުން ލޯންޗަކަށް އަރަނީ | ގެޓީ އިމޭޖަސް
ޖީއެސްޓީ ސިޔާސަތަށް ސަރުކާރުން ބަދަލު ގެންނަން ޖެހުނީ ބައިނަލްއަގުވާމީ ޓުއާ އޮޕަރޭޓަރުންގެ ޕްރެޝަރާއި، ރާއްޖެ ބޮއިކޮޓް ކޮށްފާނެ ކަމުގެ ބިރު އޮތުމުން ކަމަށް ޕަލްސް ހޮޓެލްސް އެންޑް ރިސޯޓްސްގެ މެނޭޖިންގ ޑިރެކްޓަރު އަދި ރާއްޖޭގެ ދެވަނައަށް އެންމެ ބޮޑު އެތެރޭގެ އުދުހުންތަކުގެ އެއާލައިން ކަމަށްވާ މަންޓާ އެއާގެ ސީއީއޯ މުޙައްމަދު ޚަލީލް ވިދާޅުވެއްޖެ އެވެ.
އޭނާ މިހެން ވިދާޅުވީ، ލަންޑަނުގައި އޮތް ޑަބްލިއުޓީއެމް ފެއާގައި ރާއްޖޭގެ ފަތުރުވެރިކަމުގެ ސިނާއަތަށް އަސަރުކުރާ ސިޔާސީ ނިންމުންތަކާއި، ބަހުސް ކުރެވެމުންދާ ޓެކްސްގެ އިސްލާހުތަކާ ގުޅޭގޮތުން ދެއްވި ބަސްދީގަތުމެއްގަ އެވެ.
ރާއްޖޭގެ ފަތުރުވެރިކަމާއި، ރިސޯޓް އަދި އޭވިއޭޝަން ދާއިރާގައި 25 އަހަރުގެ ތަޖުރިބާ ހުރި ޚަލީލަކީ ފަތުރުވެރިކަމުގެ ސިނާއަތަށް ސަރުކާރުގެ ސިޔާސަތުތަކުގެ ސަބަބުން ލިބެމުންދާ ގެއްލުންތަކާ ބެހޭ ގޮތުން ފުޅާ ދާއިރާއެއްގައި ފާޑުވިދާޅުވަމުން ގެންދަވާ ބޭފުޅެކެވެ. ރިސޯޓްތަކަށް ލިބޭ ބޭރު ފައިސާގެ އާމްދަނީގެ 40 އިންސައްތަ ދިވެހި ރުފިޔާއަށް މާރުކުރަން މަޖުބޫރުވާ ގޮތަށް ހުށަހެޅި އިސްލާހާ މެދު އޭނާ ދެއްވި ލަފާ ސަރުކާރުން ގަބޫލުނުކުރުމާ ގުޅިގެން، 2026 ވަނަ އަހަރުގެ އޯގަސްޓް މަހު އޭނާ ވަނީ ރައީސުލްޖުމްހޫރިއްޔާގެ ޓޫރިޒަމް އެޑްވައިޒަރުގެ މަގާމުން އިސްތިއުފާ ދެއްވާފަ އެވެ.
އޮންލައިން ނޫހެއް ކަމަށްވާ ޓްރެވަލް މޯލްގައި ޝާއިއުކޮށްފައިވާ ޚަލީލުގެ ބަސްދީގަތުމުގައި "ވިޒިޓް މޯލްޑިވްސް އިޔަރ" އަށް އަމާޒުކޮށްގެން އެކުލަވާލާފައިވާ ހަރުދަނާ ސްޓްރެޓެޖީއެއް އަދި ފެނިފައި ނުވާ ކަމަށް އޭނާ ވިދާޅުވި އެވެ. އެހެންކަމުން، މިއީ ކާމިޔާބު ކަމެއްތޯ ނުވަތަ ނޫންތޯ ސީދާ ދަންނަވަން ދަތި ކަމަށްވެސް އޭނާ ވިދާޅުވި އެވެ.
މުދަލާއި ހިދުމަތުގެ އަގުން ނަގާ ޓެކްސް (ޖީއެސްޓީ) އަށް ސަރުކާރުން ގެންނަން އުޅުނު ބަދަލުތަކާ ގުޅިގެން ބޮޑެތި ބަހުސްތަކެއް އުފެދުނު މައްސަލައާ ގުޅިގެން ސަރުކާރުގެ ސިޔާސަތަށް ބަދަލު ގެންނަން ޖެހުނީ ބައިނަލްއަގުވާމީ ޓުއާ އޮޕަރޭޓަރުންގެ ޕްރެޝަރާއި، ރާއްޖެ ބޮއިކޮޓް ކޮށްފާނެ ކަމުގެ ބިރު އޮތުމުން ކަމަށް ދެކެވަޑައިގަންނަވަންތޯ ދެންނެވުމުން ޚަލީލް ވިދާޅުވީ، ސަރުކާރުން މި ހުށަހެޅުން އަލުން މުރާޖައާ ކުރި ދެ މައިގަނޑު ސަބަބެއް އޮތް ކަމަށް ގަބޫލު ކުރައްވާ ކަމުގަ އެވެ. ފުރަތަމަ ކަމަކީ، އެ ބަދަލު އަމަލީ ގޮތުން ތަންފީޒުކުރުމަކީ ކުރެވޭނެ ކަމެއް ނޫންކަން ސަރުކާރަށް ވިސްނުން ކަމަށާއި ދެވަނަ ކަމަކީ، ޓުއާ އޮޕަރޭޓަރުންގެ ފަރާތުން އައި ޕްރެޝަރުގެ ސަބަބުން ކަމުގަ އެވެ.
ޚަލީލް ވިދާޅުވީ، މީގައި އޮތް އަސާސީ މައްސަލައަކީ، ރާއްޖެއިން ބޭރުގައި ހިނގާ ވިޔަފާރީގެ މުއާމަލާތަކުން ޓެކްސް ނަގަން ސަރުކާރުން މަސައްކަތް ކުރުން ކަމަށާއި ރާއްޖޭގެ ހޮޓާތަކުންދޭ ހިދުމަތްތަކާއި، ބައިނަލްއަގުވާމީ ޓުއާ އޮޕަރޭޓަރުން އަމިއްލައަށް ތައްޔާރުކޮށްގެން ވިއްކާ ޕެކޭޖުތަކާ ދެމެދު ހުރި ތަފާތަށް ސަރުކާރުން އެކަށީގެންވާ ވަރަށް ބަލާފައެއް ނުވާ ކަމަށެވެ.
"ހޮޓާ ހިންގާ މީހުންގެ ހައިސިއްޔަތުން އަޅުގަނޑުމެން މި ވިއްކަނީ ކޮޓަރި. އަޅުގަނޑުމެން ފޯރުކޮށްދެނީ ރާއްޖޭގައި ހުރުމުގެ އިންތިޒާމް. މުޅި ޗުއްޓީ ޕެކޭޖެއް ނުވަތަ ބައިނަލްއަގުވާމީ ފްލައިޓް ޓިކެޓެއް ނުވަތަ ބޭރުގެ އޮޕަރޭޓަރަކު އެމީހުންގެ ޕެކޭޖުގައި ހިމަނާ އެހެން ހިދުމަތްތަކެއް އަޅުގަނޑުމެންނެއް ނުވިއްކަން،" ޚަލީލް ވިދާޅުވި އެވެ.
"މިސާލަކަށް އިނގިރޭސިވިލާތުގެ ޓުއާ އޮޕަރޭޓަރަކު ވިއްކަނީ މުޅި ޗުއްޓީ ޕެކޭޖެވެ. އޭގައި ފްލައިޓް ޓިކެޓާއި، ހޮޓަލާއި، އަދި އެހެނިހެން ހިދުމަތްތައް އެއްކޮށްލައިގެން އާ އުފެއްދުމެއްގެ ގޮތުގައި ވިއްކަނީ. އެއީ ހަމައެކަނި ހޮޓާ ކޮޓަރިއެއް ނުވަތަ އެއާލައިން ޓިކެޓެއް އަލުން ވިއްކާލުމެއް ނޫން. އެ އޮޕަރޭޓަރު އެ ޕެކޭޖް ތައްޔާރުކޮށް، އިޝްތިހާރުކޮށް، ކުރިއެރުވުމަށް އަމިއްލަ ވަސީލަތްތައް ބޭނުންކޮށްގެން ބޮޑު އިންވެސްޓްމަންޓެއް ކުރޭ."
އޭނާ ވިދާޅުވީ މި ތަފާތު ދެނެގަތުން ވަރަށް މުހިންމު ކަމަށާއި އަދި އެ ޓުއާ އޮޕަރޭޓަރަކީ އެ ގައުމެއްގެ ޓެކްސް ގަވާއިދުތަކުގެ ދަށުން، އެ ގައުމެއްގައި ކުރާ ވިޔަފާރިއަށް ޓެކްސް ދައްކަންޖެހޭ ފަރާތެއް ކަމަށެވެ.
މީގެ އިތުރުން ޚަލީލް ވިދާޅުވީ، މީގައި ގާނޫނީ ސުވާލެއް ވެސް އެބައޮތް ކަމަށެވެ. އެ ގޮތުން ރާއްޖޭގެ ސަރަހައްދުން ބޭރުގައި ހިނގާ ވިޔަފާރީގެ މުއާމަލާތްތަކުން ޓެކްސް ނެގުމުގެ ހައްގު ރާއްޖެއަށް އެބައޮތްތޯ އޭނާ ވަނީ ސުވާލު އުފައްދަވާފަ އެވެ.
"މިސާލަކަށް، އިނގިރޭސިވިލާތާއި ރާއްޖެއާ ދެމެދު މިފަދަ ހާލަތްތަކުގައި އަމަލުކުރާނެ ޓެކްސް އެއްބަސްވުމެއް (ޓެކްސް ޓްރީޓީ) އެއް ނެތް،"
މީގެ ސަބަބުން އެއް މުއާމަލާތަކުން ދެ ފަހަރަށް ޓެކްސް ދައްކަންޖެހޭ (ޑަބަލް ޓެކްސޭޝަން) ހާލަތެއް މެދުވެރިވެދާނެ ކަމަށާއި، އަޅުގަނޑު ދެކޭގޮތުގައި، މި ހުށަހެޅުމުގެ ސަބަބުން ގާނޫނީ އަދި އަމަލީ ގޮތުން ބޮޑެތި މައްސަލަތަކެއް ކުރިމަތިވާނެ ކަމަށް ކަމުގައި ޚަލީލް ފާހަގަ ކުރެއްވި އެވެ. އަދި މިއީ ތަންފީޒުކުރަން އިންތިހާއަށް އުނދަގޫވާނެ ކަމެއް ކަމުގައި އޭނާ ވިދާޅުވި އެވެ.
ޖީއެސްޓީއަށް ގެންނަން ސަރުކާރުން އުޅުނު ބަދަލުތަކުގެ ސަބަބުން ޔޫރަޕްގެ މާކެޓްތަކުގައި ސެޕްޓެމްބަރު މަހުގެ "ޕީކް ސީޒަން" އަށް އަމާޒުކޮށްގެން ހިންގި ކެމްޕޭންތަކަށް ބޮޑު އަސަރެއް ކުރި ކަމަށް ޚަލީލް ވިދާޅުވި އެވެ.
"އެ ފުރުސަތު އަޅުގަނޑުމެންނަށް ގެއްލިއްޖެ. ގޯސް ހެދިއްޖެއެވެ، އަދި ގެއްލުން ވެސް ވެއްޖެއެވެ. މިހާރު އޮތް ކަމަކީ އެ ލިބުނު ގެއްލުންތަކުން އަރައިގަނެ، ރާއްޖެއާ މެދު އޮތް އިތުބާރު އަލުން އާލާކުރުމަށް މަސައްކަތް ކުރުމެވެ.









