މުސްލިމުން އެމެރިކާއަށް އެރުން މަނާކޮށް ޓްރަމްޕް އަނެއްކާވެސް އައު ގަރާރެއް ނެރުއްވައިފި
މިފަހަރުގެ ލިސްޓުގައި އިރާޤު ނުހިމެނޭ
ރައީސް ޑޮނާލްޑް ޓްރަމްޕް
މުސްލިމު މެޖޯރިޓީ އޮންނަ 6 ޤައުމެއްގެ ރައްޔިތުން އެމެރިކާއަށް އެރުން މަނާކޮށް އެމެރިކާގެ ރައީސް ޑޮނާލްޑް ޓްރަމްޕް އަނެއްކާވެސް ރިޔާސީ ޤަރާރެއް ނެރުއްވައިފިއެވެ.
90 ދުވަހުގެ މުއްދަތަކަށް އަމަލު ކުރުމަށް ހަމަޖައްސާފައިވާ މި އަމުރުގައި 120 ދުވަހުގެ މުއްދަތަކަށް އެމެރިކާއަށް ރެފިއުޖީން އެތެރެވުންވެސް މަނާކޮށްފައިވާއިރު، މި އަމުރަށް އަމަލުކުރަން ފަށާނީ މި މާރިޗުމަހުގެ 16 ވަނަ ދުވަހުން ފެށިގެންނެވެ.
މުސްލިމު މެޖޯރިޓީ 7 ޤައުމެއް ހިމެނޭ ގޮތަށް، މމި އަހަރުގެ ޖަނަވަރީ މަހުގެ 27 ވަނަ ދުވަހުވެސް ރައީސް ޓްރަމްޕް މީގެ ގަރާރެއް ނެރުއްވާފައިވާއިރު އެ ގަރާރު އެމެރިކާގެ ފެޑެރަލް ކޯޓުތަކުން ވަނީ ބާޠިލް ކޮށްފައެވެ. ކޯޓުތަކުން ބާޠިލް ކުރި އަމުރުގައި އިރާޤާއި، އީރާނާއި، ލީބިޔާ އާއި، ސޯމާލިއާގެ އިތުރުން ސޫދާނާއި ޔަމަނު ހިމެނޭއިރު ހޯމަ ދުވަހު ޓްރަމްޕް ނެރުއްވި ޤަރާރުގައި އިރާޤެއް ނުހިމެނެއެވެ.
ރިޕޯޓްތައް ބުނާގޮތުގައި، ވިސާދިނުމުގައި އިތުރު ސަލާމަތީ ފިޔަވަޅުތަކެއް އެޅުމަށް ޝަރުތުކޮށް، އިރާޤު މި ލިސްޓުން އުނިކޮށްފައިވަނީ، ހަނގުރާމަވެރި އައިސިސް ޖަމާޢަތާއި ކުރިމަތިލުމުގައި އިރާޤުން އެމެރިކާއަށްދޭ އެއްބަރުލުމުގެ ސަބަބުން، ޕެންޓަގަން އާއި ސްޓޭޓް ޑިޕާޓްމަންޓުން ރައީސް ޓްރަމްޕަށް ޕްރެޝަރ ކުރުމުންނެވެ.
މި އަމުރު ނެރުނު ނަމަވެސް އަމުރުގައި ހިމެނޭ، އީރާނާއި، ލީބިޔާ އާއި، ސޯމާލިއާގެ އިތުރުން ސޫދާނާއި ޔަމަނުގެ ރައްޔިތުންގެ ތެރެއިންވެސް، އެމެރިކާއަށް އެތެރެވުމުގެ ވިސާ މިހާރު ލިބިފައިވާ ރައްޔިތުންނަށް އެމެރިކާއަށް ދަތުރުކުރުމުގެ ފުރުސަތު އޮންނާނެއެވެ.
އަލަށް ނެރުނު ގަރާރުގައި މި އަހަރު އެމެރިކާއަށް އެތެރެވެވޭނެ ރެފިއުޖީންގެ އަދަދު ފަންސާސް ހާހަށް ލިމިޓުކޮށްފައިވާއިރު، އެމެރިކާގެ ސްޓޭޓް ޑިޕާޓްމަންޓުން މި އަހަރު އެމެރިކާގައި ވަޒަންވެރިވުމުގެ ހުއްދަ ދީފައިވާ ރެފިއުޖީންވެސް މި އަދަދުގެ ތެރޭގައި ހިމެނޭނެ ކަމަށް އެ ގަރާރުގައި ވެއެވެ. ނަމަވެސް އެގޮތަށް ހުއްދަ ދީފައިވާ ރެފިއުޖީންގެ އަދަދު އެމެރިކާއިން ހާމަކޮށްފައެ ނުވެއެވެ.
ކުރީގެ އަމުރުގައި ކްރިސްޓިއަނުންނަށް އިސްކަންދީ، ބައެއް ހާލަތްތަކުގައި އެ އަމުރުގައިވާ ކަންކަމުން ކްރިސްޓިއަނުން އިސްތިސްނާ ވާނެ ކަމަށް ބުނެފައި ވީނަމަވެސް، އެ އަމުރާއި ޚިލާފަށް ހޯމަ ދުވަހުގެ އަމުރުގައި ވަކި ދީނެއްގެ މީހުންނަށް އިސްކަން ދީފައެއް ނުވެއެވެ.
