ހިޔާލުތަފާތުވުން އުފެދިފައިވާ ދެ ތެޔޮހޮޅިއެއްގެ މަސައްކަތް ކުރިޔަށް ގެންދިއުމުގެ އަމުރުގައި އެމެރިކާގެ ރައީސް ޑޮނަލްޑް ޓްރަމްޕް ސޮއިކުރައްވައި އެންވައަރަމެންޓަލިސްޓުން ރުޅިއަރުވާލައިފިއެވެ.
ރިޕަބްލިކަން ޕާޓީއަށް ނިސްބަތްވެ ވަޑައިގަންނަވާ އާ ރައީސް ޑޮނަލްޑް ޓްރަމްޕް ވަނީ ކީސްޓޯން އެކްސެލް އަދި ޑަކޯޓާ އެކްސެސް މަޝްރޫއަށް ތާއީދު ކުރައްވާފައެވެ.
ރައީސް ބަރަކް އޮބާމާގެ ސަރުކާރުން 2015 ވަނަ އަހަރުގެ ފަހުކޮޅުވަނީ ކީސްޓޯން ހުއްޓުވާލާފައެވެ. މިއީ ކެނެޑާއިން ޓެކްސަސް އަށް ސާފުނުކުރާ ތެޔޮފޯރުކޮށްދިނުމަށް އަޅާފައިވާ ހޮޅިއެކެވެ.
އާއްމުން ބޮޑެތި މުޒާހަރާތަކެއް ކުރަމުންދަނިކޮށް ވެސް އަސްކަރިއްޔާއިން ވަނީ ޑަކޯޓާ ޕައިޕްލައިންއަށް އިތުރު ރޫޓްތަކެއް ހޯދުމަށް ނިންމާފައެވެ.
ވައިޓްހައުސްގައި އަންގާރަ ދުވަހު ހެނދުނު ޓްރަމްޕް ވިދާޅުވީ ދެ މަޝްރޫއާ މެދު ވެސް އަލުން މަޝްވަރާ ކުރަން ހަމަޖެހިފައިވާ ކަމަށެވެ.
ކީސްޓޯން އެކްސެލް މައްސަލައިގެ ގަރާރުގައި ސޮއިކުރައްވަމުން ޓްރަމްޕް ވިދާޅުވީ އެ މަޝްރޫއުއިން 28،000 ވަޒީފާ އުފެދިގެންދާނެ ކަމަށެވެ.
