އިންތިހާބުގައި ގަވާއިދާ ހިލާފަށް ވޯޓުލާފައިވާ ކަމަށް ޓްރަމްޕް ގަބޫލުކުރައްވާ: ވައިޓް ހައުސް
25 ޖެނުއަރީ 2017 | ބުދަ 10:11ގަވާޢިދާއި ހިލާފަށް ވޯޓުލާފައިވާ ކަމުގެ ހެކި، ލިޔުންތައް ހުރި ކަމަށް ޓްރަމްޕް ވިދާޅުވޭ
އެމެރިކާގެ ރައީސް ޑޮނަލްޑް ޓްރަމްޕް
ނިމިދިޔަ ރިޔާސީ އިންތިޚާބުގައި އެތައް މިލިއަން ބަޔަކު ގަވާއިދާ ހިލާފަށް ވޯޓު ލާފައިވާ ކަމަށް އެމެރިކާގެ ރައީސް ޑޮނަލްޑް ޓްރަމްޕް ގަބޫލުކުރައްވާ ކަމަށާއި އެކަމުގެ ހެކި ލިބިފައިވާ ކަމަށް ވައިޓް ހައުސް އިން ބުނެފި އެވެ.
ޓްރަމްޕްގެ ޕްރެސް ސެކެޓްރީ ޝޯން ސްޕައިސަރ އިއްޔެ ބޭއްވި ނޫސްވެރިންގެ ބްރީފިންގއެއްގައި ބާތިލް ވޯޓު ލާފައިވާ ކަމުގެ ހެކި ލިބިފައިވާ ކަމަށް ވިދާޅުވި ނަމަވެސް، އެކަމާ ބެހޭ އިތުރު ތަފްސީލެއް ދެއްވާފައެއް ނުވެ އެވެ.
ނޮވެމްބަރު މަހުގެ އާންމު އިންތިހާބުގައި އާންމުންގެ ވޯޓުގައި، ތިން މިލިއަން މީހުންގެ ވޯޓާއެކު ކުރި ހޯއްދެވީ ޑިމޮކްރެޓިކް ޕާޓީގެ ހިލަރީ ކްލިންޓަނެވެ. ޓްރަމްޕަށް އިންތިހާބު ކާމިޔާބުވެފައި ވަނީ އިލެކްޓޯރަލް ކޮލެޖުގެ ވޯޓުންނެވެ.
އިއްޔެ ބޭއްވި ނޫސްވެރިންގެ ބައްދަލުވުމުގައި ސްޕައިސަރ ވިދާޅުވީ ކޮންގްރެސްގެ އިސްވެރިންނާއި ޓްރަމްޕް ބައްދަލުކުރައްވާފައިވާ ކަމަށާއި، އެ ބައްދަލުވުމުގައި އެމެރިކާގައި ގަވާއިދާއި ހިލާފަށް އުޅޭ، އިންތިހާބުގައި ވޯޓުލާފައިވާ މީހުންގެ މައްސަލައާ ބެހޭ ގޮތުން ވާހަކަ ދައްކަވާފައިވާ ކަމަށެވެ. އެމެރިކާގައި ގަވާއިދާއި ހިލާފަށް އުޅޭ މީހުންގެ އަދަދަކީ ތިން މިލިއަނާއި ފަސް މިލިއަން ކަމަށް ވެސް ސްޕައިސަރ ވިދާޅުވި އެވެ. އަދި މިކަމަށް ފިޔަވަޅު އަޅާނޭ ކަމަށް އޭނާ ވިދާޅުވި އެވެ.
އިންތިހާބުގައި ގަވާއިދާ ހިލާފަށް ބަޔަކު ވޯޓުލާފައިވާ ކަމަށް ޓްރަމްޕް އެންމެ ފުރަތަމަ ވިދާޅުވީ ނޮވެމްބަރު މަހު ކުރެއްވި ޓްވީޓެއްގަ އެވެ. ނަމަވެސް އެކަމާ ބެހޭ ގޮތުން، އިތުރު ވާހަކަ ދައްކަވާފައެއް ނުވެ އެވެ.
ޓްރަމްޕް މިހެން ވިދާޅުވި ނަމަވެސް، އިންތިހާބުގައި އޮޅުވާލުމާއި މަކަރު ހެދުމުގެ މައްސަލަތަކެއް ކުރިމަތިނުވާ ކަމަށް އިންތިހާބީ އޮފިޝަލުން ބުނެފައި ވެއެވެ. އެގައުމުގެ އިންތިހާބީ ނިޒާމަކީ ފުރިހަމަ ނިޒާމެއް ކަމަށާއި އެފަދަ ބޮޑު އޮޅުވާލުމެއް ކުރިމަތިނުވާނޭ ކަމުގެ ޔަގީންކަން އޮތް ކަމަށް ނެޝަނަލް އެސޯސިއޭޝަން އޮފް ސެކެޓްރީސް އޮފް ސްޓޭޓުން ވަނީ ބުނެފަ އެވެ.
