މުސްލިމުން އެހެން ދީންތަކުގެ މީހުންނަށް އިހްތިރާމް ކުރަން ޖެހޭނެ: މައުމޫން
އެންމެންގެ މެދުގައި ހަމަޖެހުމާއި ސުލްހަވެރިކަމާއި އެކަކު އަނެކަކަށް އިހްތިރާމް ކުރުން އޮންނަން ޖެހޭނެ
ކުރީގެ ރައީސް މައުމޫން އަބްދުލް ޤައްޔޫމް އިހްޔާ ފޯރަމްގައި ވާހަކަފުޅު ދައްކަވަނީ
މުސްލިމުން އެހެން ދީންތަކުގެ މީހުންނަށް އިހްތިރާމް ކުރަން ޖެހޭނެ ކަމަށް ކުރީގެ ރައީސް މައުމޫން އަބްދުލް ޤައްޔޫމް ވިދާޅުވެއްޖެއެވެ.
ބުރާސްފަތި ދުވަހުގެ އިސްލާމީ މަރުކަޒުގައި އޮތް އިހްޔާ ފޯރަމްގައި ވާހަކަ ދައްކަވަމުން މައުމޫން ވިދާޅުވީ އިންސާނުން ދުނިޔޭގައި އުޅެންޖެހޭނީ އެންމެން އެކީގައި އެއްބާރުލުންކަންމަތީގައި ކަމަށް ޤުރުއާނުގައި ބަޔާންކޮށްފައިވާ ކަމަށާއި އެންމެންގެ މެދުގައި ހަމަޖެހުމާއި ސުލްހަވެރިކަމާއި އެކަކު އަނެކަކަށް އިހްތިރާމް ކުރުން އޮންނަން ޖެހޭނެ ކަމަށެވެ.
އެކަކު އަނެކަކަށް އިހްތިރާމް ކުރުމޭ ބުނެވޭ ބަހުގެ މާނައަކީ ހަމައެކަނި މުސްލިމުންނަށް އިހްތިރާމް ކުރުން ނޫން ކަމަށާއި މުސްލިމުން އެހެން ދީންތަކުގެ މީހުންނަށް ވެސް އިހްތިރާމް ކުރަން ޖެހޭނެ ކަމަށް މައުމޫން ވިދާޅުވިއެވެ.
"އިހްތިރާމް ކުރުމޭ ބުނީމަ އޭގެ މާނަ އަކީ ހަމައެކަނި އަޅުގަނޑުމެން މުސްލިމުންނަށް އިހްތިރާމްކުރާ ވާހަކައެއް ނޫން. މުސްލިމުން އެހެން ދީންތަކުގެ މީހުންނަށް ވެސް އިހްތިރާމް ކުރަން ޖެހޭނެ. މި ދެންނެވީ ދުނިޔޭގައި އުޅޭ މަސީހީންނާއި އަދި ޔަހޫދީންނާއި އަދި އެ ނޫން ދީންތަކުގެ މީހުންނަށް ވެސް އަޅުގަނޑުމެން އިހްތިރާމް ކުރަންޖެހޭ، އެކަން އެގޮތަށް ކުރައްވަން ޖެހޭނީ ރަސޫލާ އެގޮތަށް އެކަން ކުރައްވާފައިވާތީ" މައުމޫން ވިދާޅުވިއެވެ.
ކީރިތި ޤުރުއާން ބާއްވާލައްވާފައިވަނީ މުޅި އިންސާނިއްޔަތަކަށް ތެދުމަގު ދެއްކެވުމަށްކަން ފާހަގަކުރައްވާ މައުމޫން ވިދާޅުވީ ކީރިތި ޤުރުއާން ބާއްވާލެއްވީ އެންމެނަށް ރަހުމަތެއްގެ ގޮތުގައި ކަމަށެވެ.
ރަސޫލާ ހެދުން އެޅުއްވި ގޮތަށް ހެދުން އަޅަން މަސައްކަތް ކުރުމުގެ ބަދަލުގައި މުސްލިމުން ކުރަންޖެހޭ ކަމަކީ ރަސޫލާގެ އަމަލުފުޅުތަކުން މިސާލުން ލިބިގަތުން ކަމަށް މައުމޫން ފާހަގަކުރެއްވިއެވެ.
"އެހެންވީމަ ކޮންމެ އިންސާނަކު ވެސް އެމީހަކު ދިރިއުޅޭ މާހައުލުގައި ހެދުން ލާ ގޮތަށް ހެދުން ލުމަކީ އެންމެ ރަނގަޅު ގޮތް، އެއީ އަސްލު ސުންނަތަކީ، އިސްލާމްދީނުގައި އޮންނަނީ އިންސާނާގެ ޢައުރަ ނިވާކުރަން ޖެހޭނެ ކަމަށް، ތޯހިރު ހެދުން ލާން ޖެހޭނެ. އެގޮތުގެ މަތިން ލާ ކޮންމެ ހެދުމަކީ އެމީހާގެ މާހައުލަށް ކަމުދާ ކޮންމެ ހެދުމެއްކަމުގައިވާނަމަ އެއީ އެންމެ ރަނގަޅު ގޮތް. އެހެންވީމާ އަޅުގަނޑުމެން ނުޖެހޭ ވަކި ކަހަލަ ޖުއްބާއެއް ލާކަށް، ވަކި ކަހަލަ އެއްޗެއް ބޮލުގައި އަޅާކަށް ރަސޫލާ އެޅުއްވިއޭ ކިޔާފައި މައުމޫން ވިދާޅުވިއެވެ.
ކީރިތި ޤުރުއާނަކީ ހިދާޔަތެއް، އިންޒާރެއް، ރަހުމަތެއް އަދި ޝިފާއެއްކަން ޤުރުއާނުގައި ބަޔާންކޮށްފައިވާ ކަމަށް މައުމޫން ވިދާޅުވިއެވެ.
