މާލޭ ސަރަހައްދަށް މުޅި އާބާދީ ޖަމާކޮށްފަ، ޗައިނާ މީހުންނަށް ރަށްތަށް ދޫކޮށްލަން ދިވެހިން ބޭނުންމެއް ނުވާނެ: ހަސަން ލަތީފް

މާލޭ ސިޓީ ހިމެނޭ ސަރަހައްދަށް މުޅި ރާއްޖޭގެ އާބަދީ ޖަމާކޮށްފަ، ރާއްޖޭގެ ރަށްތައް ޗައިނާއަށް ދޫކޮށްލަން ދިވެހި ރައްޔިތުން ބޭނުން ނުވާ ކަމަށް ގާނޫނީ ވަކީލު އަދި އެމްޑީޕީގެ ޗެއާޕާސަން ކަމުގެ މަގާމަށް ކެމްޕެއިން ކުރައްވާ ހަސަން ލަތީފް ވިދާޅުވެއްޖެ އެވެ.

ލޯކަލް ކައުންސިލް އިންތިހާބުގެ މާލޭ ސިޓީއަށް ވާދަކުރައްވާ އެމްޑީޕީގެ ކެންޑިޑޭޓުންނަށް ހާއްސަކޮށް އަންގާރަ ދުވަހުގެ ރޭ އެމްޑީޕީގެ ހަރުގޭގައި ބޭއްވި ކެމްޕެއިން ޖަލްސާގައި ހަސަން ލަތީފް ވިދާޅުވީ އާ ގާނޫނުއަސާސީއާއެކު ލާމަރުކަޒީ ނިޒާމު އެކުލަވާލުމުގެ ކުރިން ވެސް، އެމްޑީޕީގެ ވިސްނުން ހުރީ ލާމަރުކަޒީ ނިޒާމަށް ކަމަށެވެ. އެއީ އެ ޕާޓީން ބޭނުންވަނީ ރައްޔިތުން ބާރުވެރިކޮށްގެން ރައްޔިތުންނާ ގާތުން، ފާސޭހައިން ހިދްމަތް ފޯރުކޮށްދެވޭނެ ނިޒާމެއް ގާއިމުކުރަން ކަމަށް ވާތީ ކަމުގައި ހަސަން ލަތީފު ވިދާޅުވި އެވެ.

އެފޮނި އުއްމީދުގައި ރައްޔިތުންގެ މަޖިލީހުގައި އޭރު މަސައްކަތް ކުރެއްވި މެމްބަރުން ވުޖޫދަށް ގެނައި ލާމަރުކަޒީ ގާނޫނު މިސަރުކާރުން ކޮށާމަށައި މުޅި ނިޒާމު ނައްތާލާފައިވާ ކަމަށް ހަސަން ލަތީފު ވިދާޅުވި އެވެ.

"އަޅުގަނޑުމެންގެ ތަސައްވުރަކީ ރައީސް ނަޝީދު އެވިދާޅުވާ ގޮތަށް، ތިމާކުރާ ހަލާލު މަސައްކަތުން ލިބޭ އާމްދަނީން އަނބިދަރީންނާއެކު ތިމާގެ ރަށުގައި ވަޒީފާއެއް އަދާކޮށްގެން އުޅެވޭނެ ތާހިރު ރީތި އަބުރުވެރި ދިރިއުޅުމެއް ހޯދުން،" ހަސަން ލަތީފް ވިދާޅުވި އެވެ.

މިރާއްޖެ ސިންގަޕޫރަށް ހަދަން ރައީސް އަބްދުﷲ ޔާމީން ބޭނުންފުޅުވިޔަސް އެކަން ދިވެހި ރައްޔިތުން ބޭނުން ނުވާ ކަމަށާއި އެ ވިސްނުމުގައި މިރާއްޖެ ތަރައްގީ ކުރަށް ދޫކޮށްލަން އެމްޑީޕީން ބޭނުން ނުވާކަމަށް ވެސް ހަސަން ލަތީފު ވިދާޅުވި އެވެ.

ހަސަން ލަތީފް ވިދާޅުވީ ރާއްޖެ ތަރައްގީ ކުރެވޭނީ އަދި ތަރައްގީ ކުރާނީ ވެސް އެމްޑީޕީގެ ސަރުކާރުން ކަމަށާއި، ނަމަވެސް އެމްޑީޕީން އެކަން ކުރާނީ ކޮންމެހެން ރާއްޖެ ސިންގަޕޫރަށް ހަދަން ނޫން ކަމަށެވެ.

ސިންގަޕޫރަކީ ކުޑަކުޑަ އެންމެ ރަށެއްކަން ފާހަގަ ކުރައްވައި، ހަސަން ލަތީފު ވިދާޅުވީ މި ޖަޒީރާ ރާއްޖެ ތަރައްގީ ކުރުމުގެ ވިސްނުން ސިންގަޕޫރުގެ ތަރައްގީގެ ޕްލޭނާ އެއްގޮތަށް ގެންގުޅެގެން ނުވާނެ ކަމަށެވެ.

"އަޅުގަނޑުމެންނަށް މިރާއްޖެ ދޫކޮށެއް ނުލެވޭނެ، މާލެއާއި ހުޅުމާލެއާއި ވިލިމާލެ ހިމެނޭ ސަރަހައްދުގައި ދިވެހިން އާބާދު ކޮށްގެން، އެހެން ހުރިހާ ރަށްރަށް އެއީ ޗައިނާ މީހުންނަށް ވިއްކާލާ ގައުމެއްގެ ގޮތުގައި ދޫކޮށްލައިގެން ތިބެވޭކަށް،" އޭނާ ވިދާޅުވި އެވެ.

ހަސަން ލަތީފް އެގޮތަށް ވިދާޅުވިއިރު، ރާއްޖޭގެ ބައެއް ފަޅުރަށްރަށާއި ބައެއް އަތޮޅުތައް ބޭރުގެ ބައެއް ގައުމުތަކަށް ވިއްކާލާފައިވާ ކަމަށް ދެކެވޭ ވާހަކަތަކަށް ބާރު ލިބޭ ގޮތަށް ރައީސް ޔާމީން ވަނީ މިހަފްތާގައި، ފ. އަތޮޅު މަގޫދޫއަށް ވަޑައިގެން އެރަށުގައި ބޭއްވި ޖަލްސާގައި ވާހަކަފުޅު ދައްކަވާފަ އެވެ. ފ. އަތޮޅު ވަނީ ސައުދީއަރަބިއްޔާގެ ސަރުކާރުގެ އިސްފަރާތްތަކަށް ވިއްކާލާފައިވާ ކަމުގެ އިޝާރާތެއް އެ ޖަލްސާގައި ރައީސް ޔާމިން ވަނީ ދެއްވާފަ އެވެ. އަދި މިސަރުކާރުން ވަނީ ޗައިނާގެ ބައެއް ފަރާތްތަކަށް ބައެއް ފަޅު ރަށްރަށް ވެސް ވިއްކާފަ އެވެ.