ވިންޑްސަރ ގަނޑުވަރުގައި ރަސްގެފާނު ޗާލްސް އަރަބި ބަހުން ވިދާޅުވީ މާތް ނަބިއްޔާގެ ހަދީސްފުޅެއް!
22 އޮކްޓޯބަރު 2026 | ބުރާސްފަތި 09:56އޮމާނުގެ ރަސްގެފާނު އިނގިރޭސިވިލާތަށް ކުރައްވާ ރަސްމީ ދަތުރުފުޅުގެ ތެރެއިން ވިންޑްސަރ ގަނޑުވަރުގައި ބޭއްވި ޖާފަތުގައި، ރަސްގެފާނު ޗާލްސް ވަނީ އޮމާނުގެ ރައްޔިތުންގެ ހިތްހެޔޮކަމާ ގުޅޭގޮތުން ކީރިތި ރަސޫލާގެ ހަދީސްފުޅެއް އަރަބި ބަހުން ވިދާޅުވެފައި. ދެ ޤައުމުގެ ދެމެދުގައި އޮތް ޒަމާންވީ ގުޅުން ފާހަގަކުރައްވަމުން، ސަރަހައްދީ ހަމަޖެހުން ގާއިމުކުރުމަށް އޮމާނުން ކުރާ މަސައްކަތްތަކަށް ޗާލްސް ވަނީ ތައުރީފު ކުރައްވާފައި
އިނގިރޭސިވިލާތުގެ ރަސްގެފާނު ޗާލްސް ކީރިތި ރަސޫލާގެ (ސއވ) ހަދީސެއް އަރަބި ބަހުން ވިދާޅުވަނީ | އެކްސް
އޮމާނުގެ ރަސްގެފާނު ސުލްޠާން ހައިޘަމް ބިން ޠާރިޤްގެ ޝަރަފުގައި ވިންޑްސަރ ގަނޑުވަރުގައި ބޭއްވެވި ރަސްމީ ޖާފަތެއްގައި، އިނގިރޭސިވިލާތުގެ ރަސްގެފާނު ޗާލްސް އަރަބި ބަހުން ކީރިތި ރަސޫލާގެ ހަދީސްފުޅެއް ވިދާޅުވެއްޖެ އެވެ. މިއާއެކު، އެ މަންޒަރުގެ ވީޑިއޯ މީސްމީޑިއާގައި ވަނީ ހަލުވިކަމާއެކު ފެތުރެމުން ފަށާފަ އެވެ.
ފާއިތުވި 44 އަހަރުގެ ތެރޭގައި އޮމާނުގެ ވެރިއަކު އިނގިރޭސިވިލާތަށް ކުރައްވާ ފުރަތަމަ ރަސްމީ ދަތުރުފުޅުގައި، ތިން ދުވަހުގެ މުއްދަތަކަށް އެ ޤައުމަށް ވަޑައިގެންނެވި ސުލްޠާން ހައިޘަމްއަށް އަންގާރަ ދުވަހު މަރުހަބާ ދެންނެވީ ރަސްގެފާނު ޗާލްސް އަދި ރާނީ ކެމީލާ އެވެ. މި ޒިޔާރަތުގެ ތެރެއިން އަންގާރަ ދުވަހުގެ ރޭގަނޑުގެ ވަގުތެއްގައި، ސުލްޠާން ހައިޘަމްގެ ޝަރަފުގައި ރަސްގެފާނާއި ރާނީ ވަނީ ވިންޑްސަރ ގަނޑުވަރުގައި ރަސްމީ ޖާފަތެއް ބާއްވަވާފަ އެވެ.
މި ޖާފަތުގައި އޮމާނުގެ ރައްޔިތުންނަށް ތައުރީފުކުރައްވަމުން އިނގިރޭސިވިލާތުގެ ރަސްގެފާނު ކީރިތި ރަސޫލާގެ ބަސްފުޅެއް ވިދާޅުވެފަ އެވެ. އެއީ، އޮމާނުގެ ރައްޔިތުންގެ ހިތްހެޔޮކަމާ ގުޅޭ ހަދީސެއް ކަމަސް ރިޕޯޓުތައް ބުނެ އެވެ. ރަސްގެފާނު ޗާލްސް އެ ހަދީސްފުޅު އަރަބި ބަހުން ވިދާޅުވާ މަންޒަރު ފެންނަ ވީޑިއޯ ކްލިޕެއް މިހާރު ވަނީ މީސްމީޑިއާގައި ވަރަށް ބޮޑަށް އާންމުވެފަ އެވެ.
އިނގިރޭސިވިލާތާއި އޮމާނާ ދެމެދު އޮތް ޒަމާންވީ ގުޅުމާއި، ހަމަނުޖެހުންތަކުގެ މި ދަނޑިވަޅުގައި ޤައުމުތަކުގެ މެދުގައި ގުޅުން ބަދަހިކުރުމަށް އޮމާނުން ކުރަމުންދާ މަސައްކަތްތަކުގެ މުހިންމުކަން، ރަސްގެފާނު ޗާލްސް ދެއްކެވި ވާހަކަފުޅުގައި ފާހަގަކުރެއްވި އެވެ. "އެއް ޖީލުން އަނެއް ޖީލަށް ވާރުތަވަމުންދާ މި ފަދަ ދިރިހުރި ގުޅުމަކަށްވުރެ ކާމިޔާބީގެ އުފާވެރި ރަމްޒެއް ވަކި މަދުވާނެ،" ޗާލްސް ވިދާޅުވި އެވެ.
މަސްދަރު: އަނަދޮލު އޭޖެންސީ
