އއ. އުކުޅަހު މަގުމަތީ މަހާނަ ހަދައިގެން ހައްޔަރުކުރި މީހުން ދޫނިދޫގައި ތިބީ އަންނައުނު ބަދަލުކުރާނެ ގޮތެއް ނެތިފައި ކަމަށް ގާނޫނީ ވަކީލް ނާޒިމް އަބްދުއް ސައްތާރު ވިދާޅުވެއްޖެއެވެ.
ސިހުރާއި ފަންޑިތަ ހަދައި، ރައްޔިތުންގެ ހިތްތަކުގައި ބިރުވެރިކަން އުފައްދަން އުޅުނު ކަމުގެ ތުހުމަތުގައި އުކުޅަހުން ހައްޔަރު ކުރި ހަ މީހުންނަން ކުރިމިނަލް ކޯޓުން ވަނީ 15 ދުވަހުގެ ބަންދުގެ މުއްދަތު ޖަހާފައެވެ.
ހައްޔަރުގައި ތިބި މީހުންނާއި ބައްދަލުކުރުމަށް ފަހު ރާއްޖެއެމްވީއަށް މައުލޫމާތު ދެއްވަމުން ގާނޫނީ ވަކީލް ނާޒިމް އަބްދުއް ސައްތާރު ވިދާޅުވީ އެމީހުން ފުލުހުންގެ ބެލުމުގެ ދަށުގައި ތިބީ، އަންނައުނު ބަދަލުކުރެވޭނެ ގޮތެއް ނެތިފައި ކަމަށެވެ.
"އެމީހުން ރަށުން އައީ ހެދުން ހިފައިގެން، އަތޮޅުވެހީގައި ބައިތިއްބުމަށް ފަހު، ދޫނިދޫއަށް ބަދަލުކުރީ، މީހާރު އަންނައުނެއް ނުލިބޭ" ރާއްޖެއެމްވީއަށް މައުލޫމާތު ދެމުން ނާޒިމް ވިދާޅުވިއެވެ.
ފުލުހުންގެ ހާއްސަ ޓީމެއް އުކުޅަހަށް ގޮސް ހައްޔަރުކޮށްފައި ވަނީ އެރަށު ފުސްވިލާގޭ، އިބްރާހިމް ސުޒެއިނާއި، ރަތްވިލާގޭ އަބްދުﷲ ވާހިދު އަލީ، ވިންޓަރ ވިލާ، ސައުދުﷲ އިބްރާހިމް، ފެންފިޔާޒުގެ، ފިކުރީ ހަނިފްގެ އިތުރުން ފިނިފެން ބަގީޗާ، އަބްދުﷲ ސައީދެއެވެ.
ނާޒިމް ވިދާޅުވީ ބުދަ ދުވަހު (މިއަދު) ފުލުހުންގެ ތަޙްގީގަށް އެމީހުން ބަޔާން ދީފި ކަމަށެވެ. އެހެންނަމަވެސް އެކަމާ ގުޅިގެން ފުލުހުންގެ ބަހެއް ވަނީ ލިބޭ ގޮތް ނުވެފައެވެ.
އއ. އަތޮޅު ކައުންސިލްގެ ނައިބް ރައީސް މޫސާ ނައީމްގެ އިތުރުން ފަސް މީހުން ހައްޔަރުކުރީ އެމްޑީޕީގެ އެކްޓިވިސްޓް މެމްބަރު ޝިނާޒު މޫސާ ޕީޕީއެމަށް ސޮއިކުރުމުން، އެ ގޭގެ ދޮރުމަތީގައި މަހާނައެއް ހެދި މައްސަލައާ ގުޅިގެނެވެ.
ރާއްޖެއެމްވީއަށް މައުލޫމާތު ދެމުން އުކުޅަހު ކައުންސިލް މެމްބަރު އަލީ ޒަމީރު ވިދާޅުވީ ކުރިއަށް އޮތް ލޯކަލް ކައުންސިލް އިންތިހާބުގައި އެރަށުގެ މެޖޯރޓީ ވެރިކަން ކުރާ ޕީޕީއެމުން ހޯދުމަށްޓަކައި ރައްޔިތުންނަން ބިރުދައްކަމުން އަންނަ ކަމަށެވެ. އެރަށު އެމްޑީޕީގެ ހަ މެމްބަރުން ފުލުހުން ހައްޔަރުކުރީ ސީދާ ލޯކަލް ކައުންސިލް އިންތިހާބުގެ މެޖޯރިޓީ ހޯދުމަށްޓަކައި އިތުރު ގޮތެއް ނެތުމުން ކަމަށް ޒަމީރު ވިދާޅުވިއެވެ.
