ޖިންސީ ކުށުގެ ޝިކާރައަކަށްވާ މީހުންނަށް މާލީ އެހީ ދޭނެ އުސޫލެއް ކަނޑައަޅައިފި
ނަފްސާނީ އެހީ ހޯދުމަށް މާލީ އެހީ ފޯރުކޮށްދެވޭނީ 17 ކުށަކަށް
ޖިންސީ ޝިކާރަ އަށް ހޭލުންތެރި ކުރުވުމުގެ ޕޯސްޓަރެއް
ޖިންސީ ކުށުގެ ޝިކާރައަކަށްވާ މީހުންގެ ތެރެއިން ނަފްސާނީ އެހީތެރިކަން ބޭނުންވާ މީހުންނަށް ޖިންސީ ކުށުގެ ގާނޫނުގެ ދަށުން މާލީ އެހީތެރިކަން ދިނުމުގައި ބަލާނެ މިންގަނޑުގެ އުސޫލް ފެމެލީ ޕްރޮޓެކްޝަން އޮތޯރިޓީން އެކުލަވާލައިފިއެވެ.
މި އުސޫލްގެ ދަށުން ނަފްސާނީ އެހީހޯދުމަށް މާލީ އެހީތެރިކަން ފޯރުކޮށްދިނުމުގައި ބަލާނެ ކަންތައްތައް ކަމުގައި ގަވާއިދުގައި ބުނެފައި ވަނީ ޖިންސީ ކުށުގެ ޝިކާރައަކަށްވީ މީހާ އަށް ލިބިފައިވާ އަނިޔާގެ ކުޑަބޮޑުމިން، ޖިންސީ ކުށުގެ ޝިކާރައަކަށް ވީ މީހާ މިހާރު ހުރި ހާލަތު ވަޒަން ކުރިން، މީގެއިތުރުން ޖިންސީ ކުށުގެ ޝިކާރައަކަށް ވީ މީހާގެ މާލީ ހާލަތު، ބެލޭނެ ކަމަށް ގަވާއިދުގައި ބުނެފައިވެއެވެ.
ފެމެލީ ޕްރޮޓެކްޝަން އެޖެންސީން އެކުލަވާލި އުސޫލުގައި ބުނެފައިވާ ގޮތުގައި ނަފްސާނީ އެހީ ހޯދުމަށް މާލީ އެހީ ފޯރުކޮށްދެވޭނީ 17 ކުށަކަށެވެ. އެއީ
1 ރޭޕްކުރުމުގެ ކުށް
2 ރޭޕްކުރަން އުޅުމުގެ ކުށް
3 ޖިންސީ އަނިޔާގެ ކުށް
4 ޖިންސީ އަނިޔާކުރަން އުޅުމުގެ ކުށް
5 ޖިންސީ ގޯނާގެ ކުށް
6 މަޙްރަމަކާއެކު ޖިންސީ ޢަމަލު ހިންގުމުގެ ކުށް
7 އެއްޖިންސުން ޖިންސީ ޢަމަލު ހިންގުމުގެ ކުށް
8 ނުކުޅެދުންތެރިކަމެއް ހުރި މީހަކާއެކު ޖިންސީ ޢަމަލެއް ހިންގުމުގެ ކުށް
9 ހަށިވިއްކުމުގެ ކުށް
10 ހަށިވިއްކުމަށް މީހަކު ގެންގުޅުމުގެ ކުށް
11 ހަށިވިއްކުމަށް ރާއްޖެ ގެނައުމާއި، ގެންދިއުމުގެ ކުށް
12 ބްލެކްމެއިލްކުރުމުގެ ކުށް
13 ޖިންސީ ޢަމަލެއް ހިންގުމަށްޓަކައި މަސްތުކުރުވުމުގެ ކުށް
14 ވެރިވެގަތުމުގެ ކުށް
15 ވެށިން ނިގުޅައިގަތުމުގެ ކުށް
16 އޮރިޔާންކާޑު ހެދުމުގެ ކުށް
17 މަޖުބޫރުން އޮރިޔާންކާޑު ހެއްދުވުމުގެ ކުށް ހިމެނެއެވެ.
ގަވާއިދުގައި ބުނެފައިވާ ގޮތުގައި މާލީ އެހީތެރިކަމަށް އެދި ހުށަހެޅޭނީ ޖިންސީ ކުށުގެ ޝިކާރައަކަށް ވެފައިވާ ފަރާތަށް ނުވަތަ އެފަރާތެއްގެ މައިންބަފައިންނަށް ނުވަތަ ބެލެނިވެރިއަކަށެވެ. އަދި މި އުސޫލްގެ ދަށުން ނަފްސާނީ އެހީ ހޯދުމަށްޓަކައި މާލީ އެހީތެރިކަން ފޯރުކޮށްދެވޭނެ އެންމެ ދިގު މައްދަތަކީ ހަ މަސް ދުވަސް ކަމަށް ވެސް ގަވާއިދުގައި ބުނެފައިވެއެވެ،
މި އުސޫލްގައި ބުނެފައިވާ ގޮތުގައި ޖިންސީ ކުށުގެ ޝިކާރައަކަށްވާ މީހުންގެ ތެރެއިން ނަފްސާނީ އެހީތެރިކަން ބޭނުންވާ މީހުންނަށް ޖިންސީ ކުށުގެ ގާނޫނުގެ ދަށުން މާލީ އެހީތެރިކަން ފޯރުކޮށް ދެވޭނީ 65 ޕޮއިންޓް މާކްސް ލިބޭ މީހުންނަށެވެ. އަދި މި އެހީތެރިކަން ފޯރުކޮށްދެވޭނީ ފެމެލީ ޕްރޮޓެކްޝަން އެޖެންސީން ކަނޑައަޅާ މަރުކަޒަކުންނެވެ.
ފެމެލީ ޕްރޮޓެކްޝަން އެޖެބްސީން އެކޔުލަވާލި ގަވާއިދުގައި ބުނެފައިވާ ގޮތުގައި މި އުސޫލަށް އަމަލު ކުރަން ފަށާނީ އުސޫލް ސަރުކާރުގެ ގެޒެޓުގައި ޝާއިޢުކުރާ ދުވަހުން ފެށިގެން ކަމަށް ގަވާއިދުގައި ބުނެފައިވެއެވެ،
