ބޭރު މީހުންނަށް ބިން ނުވިއްކޭ ގޮތަށް ގާނޫނޫއަސާސީއަށް އެމްޑީޕީން އިސްލާހު ހުށަހަޅަން ނިންމައިފި

ރާއްޖޭގެ ބިންތައް ބޭރު ބަޔަކަށް ވިއްކުމާ އެމްޑީޕީން ކަނޑައެޅިގެން ދެކޮޅު ކަމަށާއި ގާނޫނުއަސާސީއަށް އިސްލާހު ހުށައަޅުއްވާނެ ކަމަށް އެމްޑީޕީގެ ޕާލިމެންޓަރީ ގްރޫޕްގެ ލީޑަރު އިބްރާހީމް މުހައްމަދު ސޯލިހު (އިބޫ) ވިދާޅުވެއްޖެ އެވެ.

އެމްޑީޕީ ޕާލަމެންޓްރީ ގްރޫޕުން ބުދަ ދުވަހު ބޭއްވި ބައްދަލުވުމަށްފަހު ނޫސްވެރިންނަށް މައުލޫމާތު ދެއްވަމުން އިބޫ ވިދާޅުވީ އެމްޑީޕީ ޕާލަމެންޓްރީ ގްރޫޕްގެ މި ބައްދަލުވުމުގައި ތިންކަމަކަށް މަޝްވަރާކޮށް ގޮތެއް ނިންމާފައިވާ ކަމަށެވެ. ނަމަވެސް އެ ތިން ކަމުގެ ތެރެއިން އިބޫ މީޑިއާއަށް ހިއްސާކުރައްވާފައިވަނީ ސަރުކާރުން ފ. އަތޮޅު ވިއްކާލަން އުޅޭތީ އެކަމާބެހޭ ގޮތުން ނިންމާފައިވާ ނިންމުން އެކަންޏެވެ.

"އަޅުގަނޑުމެން މަޝްރަވާކޮށްފަ މިއަދު މިނިންމީ ގާނޫނުއަސާސީއަށް މިގެނެވުނު އިސްލާހު، ބިން ވިއްކުމުގެ ފުރުސަތު ލިބޭގޮތަށް މިހާރު ގެނެވިފައިވާ އިސްލާހު، އިސްލާހު ކުރުމަށްޓަކައި އެމްޑީޕީގެ ޕާލަމެންޓްރީ ގްރޫޕްގެ ފަރާތުން ރައްޔިތުންގެ މަޖިލީހަށް ހުށަހަޅާ ގޮތަށް،" އެމްޑީޕީ ޕާލަމެންޓްރީ ގްރޫޕްގެ ލީޑަރު އިބޫ ވިދާޅުވި އެވެ.

އިބޫ ވިދާޅުވީ ބޭރު ބަޔަކަށް ރާއްޖޭގެ ބިން ވިއްކުމަށް ފުރުސަތު ލިބޭ ގޮތަށް ގާނޫނުއަސާސީއަށް މިހާރު ގެނެސްފައިވާ އިސްލާހު، އިސްލާހު ކުރުމަށް މަސައްކަތް ކުރަމުންދާ ކަމަށެވެ. އެގޮތުން އެ ބިލް ޑްރާފްޓް ކުރުމުގެ މަސައްކަތް ކުރިއަށްދާ ކަމަށާއި ބުރާސްފަތި ދުވަހު މަޖިލީހަށް އެބިލަށް ވެއްދޭތޯ މަސައްކަތް ކުރަމުންދާ ކަމަށް އިބޫ ވިދާޅުވި އެވެ.

މީގެ އިތުރުން އިބޫ ވިދާޅުވީ ރާއްޖޭގެ ބިން ބޭރުގެ ބަޔަކަށް މިލްކު ކުރެވޭގޮތަށް އެއްވެސް އިރެއްގައި އެމްޑީޕީން ތާއީދުކޮށް، އެއްވެސް ބަޔަކާ މަޝްވަރާކޮފައިކޮށްފައި ނުވާނެ ކަމަށެވެ.

"ގާނޫނުއަސާސީއަށް ގެނެވުނު އެއިސްލާހު ގެނެވުނުއިރު، އެމްޑީޕީން ސަރުކާރާއެކު، އަދި އެއްވެސް ބަޔަކާއެކު ޑީލެއް ހަދާފައެއް ނުވާނެ،" ބިން މިލްކު ކުރެވޭގޮތަށް ގާނޫނުއަސާސީއަށް ގެނެސްފައިވާ އިސްލާހާ ގުޅޭގޮތުން އިބޫ ވިދާޅުވި އެވެ.

އިބޫ ވިދާޅުވީ ރާއްޖޭގެ އެއްވެސް ބިމެއް ރާއްޖޭން ބޭރުގެ އެއްވެސް ފަރާތަކަށް ވިއްކުމަށް އެމްޑީޕީން ތާއީދު ނުކުރާ ކަމަށާއި ރާއްޖޭގެ ރައްޔިތުންގެ ގާތްގަނޑަކަށް 99 ޕަސެންޓް ރައްޔިތުން ދެކެނީވެސް އެގޮތަށް ކަމަށެވެ. އަދި އެމްޑީޕީން އަބަދުވެސް ކަންކަން ނިންމާނީ ރާއްޖޭގެ ރައްޔިތުން އެދޭ ގޮތަށްކަމަށް އިބޫ ވިދާޅުވި އެވެ.

އިބޫ ވިދާޅުވީ ގާނޫނުއަސާސީގައި ރާއްޖޭގެ ބިން ބޭރުގެ ފަރާތްތަކަށް މިލްކު ކުރެވޭގޮތަށް އޮތް މާއްދާ އިސްލާހު ކުރުމަށް ސަރުކާރު ކޯލިޝަން މެމްބަރުންނާއި ޖުމްހޫރީ ޕާޓީއާއި އަދާލަތު ޕާޓީގެ މެމްބަރުންނާއި އަދި ވަކިޕާޓީއަކަށް ނިސްބަތްނުވާ މެމްބަރުންނާ މަޝްވަރާ ކުރައްވާނެ ކަމަށެވެ.