ދެ ބިދޭސީއެއްގެ މެދުގައި ހިނގި މާރާމާރީއެއްގައި ވަޅިޖަހައިފި
27 އެޕްރީލު 2019 | ހޮނިހިރު 02:36މާރާމާރީގައި ދެ މީހަކަށް ޒަހަމްވެފައިވޭ
އެސްއޯ ފުލުހުންގެ ތަމްރީންތަކެއްގެ ތެރެއިން
މާލޭގައި މަސައްކަތްކުރާ ދެ ބަންގްލަދޭޝްގެ ދެ މީހެއްގެ މެދުގައި ހިނގި މާރާމާރީއެއްގައި ވަޅިޖަހައިފި އެވެ.
ރާއްޖެއެމްވީއަށް މައުލޫމާތު ލިބިފައިވާ ގޮތުގައި މި މާރާމާރީ ހިނގާފައިވަނީ އޯކިޑް މަގުގައި ހުންނަ ސަލްސާ ރޯޔަލް ކައިރީގައެވެ. ހާދިސާ ހިނގާފައިވަނީ ހުކުރު ދުވަހުގެ ރޭ ގަޑިން 10:30 ވާން އުޅެނިކޮށެވެ.
ފުލުހުންގެ މީޑިއާ އޮފިޝަލް ވިދާޅުވީ ސަލްސާ ރޯޔަލް ކައިރީގައި ބަންގްލަދޭޝްގެ މީހަކަށް ތޫނު އެއްޗަކުން ހަމަލާދީފައިވާ ކަމަށެވެ. އަނިޔާވީ މީހުންނަށް މިހާރު އައިޖީއެމްއެޗް ހޮސްޕިޓަލުގައި ފަރުވާ ދެމުން އަންނަ ކަމަށް ވެސް ފުލުހުންގެ އޮފިޝަލް ވިދާޅުވިއެވެ.
ހަމަލާދިން މީހާ މިހާރު ފުލުހުން ހައްޔަރުކޮށްފައިވާ އިރު، އޭނާ ވަނީ ހަމަލާދިނުމަށް ފަހު އެ ސަރަހައްދުން ފިލަން މަސައްކަތް ކޮށްފައެވެ. ހަމަލާދިން މީހާ ހައްޔަރުކޮށްފައިވަނީ ފިލަން އުޅެނިކޮށް ކަމަށް ފުލުހުން ބުނެ އެވެ.
މާލޭގައި މި ފަހަކަށް އައިސް ތޫނު އެއްޗެހި ބޭނުންކޮށްގެން ހިންގާ މާރާމާރީ މަދުވެފައިވާ އިރު، މިދިޔަ އަހަރު ތޫނު ހަތިޔާރުން ދިން ހަމަލާތަކެއްގައި ދެ މީހަކު މަރުވެފައިވެއެވެ.
