ލާމް ލިންކް ރޯޑްގައި ހުކުރު ދުވަހުގެ ހަވީރު ހިނގި ނުރައްކާތެރި އެކްސިޑެންޓްގައި އެކަކު މަރުވެފައި ވާއިރު، އެ އެކްސިޑެންޓްގައި އަނިޔާވި މީހާ އިތުރު ފަރުވާއަށް މާލެ ނެގެސް އައިޖީއެމްއެޗްގައި ފަރުވާދެމުން އެބަދެ އެވެ.

އައިޖީއެމްއެޗްގެ މީޑިއާ އޮފިޝަލް އާދިއްތަ ދުވަހު ވިދާޅުވީ އިތުރު ފަރުވާ މާލެ ގެނެސްފައިވާ 27 އަހަރުގެ މީހާގެ ހާލު އެހާ ސީރިސް ނޫން ކަމަށާއި އޭނާއަށް އަވަސް ފަރުވާ ދިނުމަށްފަހު މިހާރު ވޯޑުގައި އެޑްމިޓް ކޮށްގެން ފަރުވާ ދެމުންދާ ކަމަށެވެ.

ލ. ގަން ރިޖަނަލް ހޮސްޕިޓަލުން ބުނެފައިވާ ގޮތުގައި ހުކުރު ދުވަހު ލިންކް ރޯޑުގައި ހިނގި އެކްސިޑެންޓްގައި އަނިޔާވި މިހާ ހޮނިހިރު ދުވަހުގެ މެންދުރު އިތުރު ފަރުވާއަށް މާލެ ފޮނުވާލާފައިވަނީ އެމްއެންޑީއެފްގެ އެހީތެރިކަމާއެކު ހެލިކޮޕްޓަރުގަ ކަމަށެވެ.

ފުލުހުން ބުނެފައިވަނީ ހުކުރު ދުވަހު ހަވީރު 17:30 ހާއިރު ދެ ސައިކަލް ޖެހި ހިނގި އެކްސިޑެންޓްގައި 27 އަހަރުގެ ޒުވާނަކު މަރުވި ކަމަށެވެ. ރާއްޖެއެމްވީ އަށް މައުލޫމާތު ލިބިފައިވާ ގޮތުގައި މަރުވީ މުހައްމަދު ރިފްޝާނު ކިޔާ ޒުވާނެކެވެ.

ގަމު ރީޖަނަލް ހޮސްޕިޓަލުން ބުނީ ރިފްޝާން ހޮސްޕިޓަލަށް ގެންދިޔަ އިރު ވެސް އޮތީ މަރުވެފައި ކަމަށެވެ.

މި އެކްސިޑެންޓް ހިނގާފައި ވަނީ ލާމް ލިންކް ރޯޑްގެ ކުރިހިންނެ އާއި ހިސާބުންނެވެ.