އައްޑޫގައި ހިނގި އެކްސިޑެންޓްގައި ޒަހަމްވި މީހާ ނިޔާވެއްޖެ
ތިރީސް ތިން އަހަރުގެ ޒުވާނާ ނިޔާވީ ހޮސްޕިޓަލްގައި ފަރުވާ ދެމުންދަނިކޮށް
އެކްސިޑެންޓްވި މީހާ ހޮސްޕިޓަލަށް ގެންދަނީ
އައްޑޫ ސިޓީ މަރަދޫގައި ބާރު ސްޕީޑުގައި ދުއްވާފައި ދިޔަ ސައިކަލަކުން ހޮޅިދަނޑިއެއްގައި ޖެހި ހިނގި އެކްސިޑެންޓްގައި ޒަހަމްވި ޒުވާނާ ނިޔާވެއްޖެ އެވެ.
މަރަދޫ ފޭދޫ ގުޅުނު ކޯޒްވޭގައި ހުރި ހޮޅިދަނޑީގައި ޖެހި ޒަހަމްވީ ސައިކަލް ދުއްވި ސ. މަރަދޫ މާކަރީ ލައިޓް އުމުރުން 33 އަހަރުގެ ސައިފުﷲ އަލީ އެވެ.
ރާއްޖެ އެމްވީއަށް މައުލޫމާތު ލިބިފައިވާ ގޮތުގައި އޭނާ މަރުވީ އެކްސިޑެންޓްގައި އޭނާގެ މޭކަށިގަނޑަށް ލިބުނު އަނޔާތަކާއި ގުޅިގެން ފުއްޕާމެޔަށް ލޭއެޅިގެންނެވެ.
ރާއްޖެ އެމްވީއަށް މައުލޫމާތު ދެއްވަމުން ފުލުހުންގެ މީޑިއާ އޮފިޝަލް ވިދާޅުވީ ސައިފް އެކްސިޑެންޓްވެގެން ހިތަދޫ ރީޖަނަލް ހޮސްޕިޓަލަށްގެންދިޔަކަމުގެ ރިޕޯޓް ކޮށްފައިވަނީ ހޮނިހިރު ދުވަހު 12:08 ގައި ކަމަށާ މަރުވެފައިވަނީ ހޮސްޕިޓަލުގައި ފަރުވާ ދެމުން ދަނިކޮށް ކަމަށެވެ. ފުލުހުން ބުނީ އެސައިކަލްގައި އިތުރު މީހަކު ނެތްކަމަށެވެ.
ފުލުހުން ބުނީ އެކަން މިހާރު ތަހްގީގް ކުރަމުންދާ ކަމަށެވެ.
