ލާމް ލިންކް ރޯޑްގައި ހުކުރު ދުވަހުގެ ހަވީރު ހިނގި ނުރައްކާތެރި އެކްސިޑެންޓްގައި އެކަކު މަރުވެފައި ވާއިރު، އެ އެކްސިޑެންޓްގައި އަނިޔާވި މީހާ އިތުރު ފަރުވާއަށް މާލެ ގެނެސްފި އެވެ.
ލ. ގަން ރިޖަނަލް ހޮސްޕިޓަލުން ބުނީ ހުކުރު ދުވަހު ލިންކް ރޯޑުގައި ހިނގި އެކްސިޑެންޓްގައި އަނިޔާވި މިހާ ހޮނިހިރު ދުވަހުގެ މެންދުރު އިތުރު ފަރުވާއަށް މާލެ ފޮނުވާލާފައިވާ ކަމަށެވެ. ރީޖަނަލް ހޮސްޕިޓަލުން ބުނީ އޭނާއަށް ވެސް ސީރިއަސް އަނިޔާތަކެއް ލިބިފައިވާ ކަމަށެވެ.
އެ އެކްސިޑެންޓްގައި އަނިޔާވި މީހާ މާލެ ގެނެސްފައިވަނީ ހެލިކޮޕްޓަރުގައި އެމްއެންޑީއެފް އިން ނެވެ.
ފުލުހުން ބުނެފައިވަނީ ހުކުރު ދުވަހު ހަވީރު 17:30 ހާއިރު ދެ ސައިކަލް ޖެހި ހިނގި އެކްސިޑެންޓްގައި 27 އަހަރުގެ ޒުވާނަކު މަރުވި ކަމަށެވެ. ރާއްޖެއެމްވީ އަށް މައުލޫމާތު ލިބިފައިވާ ގޮތުގައި މަރުވީ މުހައްމަދު ރިފްޝާނު ކިޔާ ޒުވާނެކެވެ.
ގަމު ރީޖަނަލް ހޮސްޕިޓަލުން ބުނީ ރިފްޝާން ހޮސްޕިޓަލަށް ގެންދިޔަ އިރު ވެސް އޮތީ މަރުވެފައި ކަމަށެވެ.
މި އެކްސިޑެންޓް ހިނގާފައި ވަނީ ލާމް ލިންކް ރޯޑްގެ ކުރިހިންނެ އާއި ހިސާބުންނެވެ.
