މަރަދޫގައި ހިނގި އެކްސިޑެންޓްގައި ޒަޚަމްތަކެއްވި ޒުވާނާ މަރުވެއްޖެ

ހޮނިހިރު ދުވަހު މެންދުރު ފަހު އައްޑޫ ސިޓީ މަރަދޫގައި ހިނގި ނުރައްކާތެރި އެކްސިޑެންޓްގައި ސީރިއަސް ޒަހަމްތަކެއްވި ޒުވާނާ މަރުވެއްޖެއެވެ.

އުމުރުން 22 އަހަރުގެ އެޒުވާނާ މަރުވެފައިވަނީ އިތުރު ފަރުވާއަށް މާލެ ގެނެސް އޭޑީކޭ ހޮސްޕިޓަލުގައި ފަރުވާ ދެމުން ދަނިކޮށެވެ. އޭޑީކޭއިން ރާއްޖެ އެމްވީއަށް ވަނީ އެކަން ކަށަވަރުކޮށްދީފައެވެ.

ރާއްޖެއެމްވީއަށް މައުލޫމާތުދެއްވަމުން ހިތަދޫ ރީޖަނަލް ހޮސްޕިޓަލުގެ އޮފިޝަލަކު ހޮނިހިރު ދުވަހު ވިދާޅުވީ، މިއެކްސިޑެންޓްގައި އަނިޔާވި ޒުވާނާގެ ބޯ ފަޅައިގެން ގޮސްފައިވާކަމަށެވެ.

އައްޑޫ ސިޓީގައި ހުރި ރާއްޖެ ޓީވީގެ ރިޕޯޓަރު ފާރިސް އިބްރާހިމް ބުނީ މި އެކްސިޑެންޓް ހިނގާފައިވަނީ ހޮނިހިރު ދުވަހުގެ މެންދުރު 2:00 ހާއިރު މަރަދޫ ފޭދޫ ބޮޑު މަގުގައި ދުއްވާފައި ދިޔަ ސައިކަލެއް ލިންކް ރޯޑުގައި ކޭބަލް އަޅަން މަގު ކޮނެފައި އޮތް ތަނުން ވަޅުގަނޑަކަށް އަރައި ކޮންޓްރޯލް ނުވެގެން ގޮސް ހޮޅިދަނޑިއެއްގައި ޖެހިގެން ކަމަށެވެ.