ރާއްޖެއާއި އިންޑިއާގެ މެދުގައި އޮތް ގުޅުމަކީ "އާޓިފިޝަލް" އެއްވެސް ކަމެއް ނެތް ގުޅުމެއް ކަމަށާއި ރާއްޖެއަކީ އިންޑިއާއިން އަބަދުވެސް އިސްކަންދޭނެ ގައުމެއް ކަމަށް، އިންޑިއާ އިން ރާއްޖެއަށް ކަނޑައަޅާފައިވާ ހައި ކޮމިޝަނަރ އަކިލޭޝް މިޝްރާ ވިދާޅުވެއްޖެ އެވެ.

އިންޑިއާގެ ގައުމީ ދުވަސް ފާހަގަކުރުމަށް ރޭ ދަރުބާރުގޭގައި ބޭއްވި ހާއްސަ ބައްދަލުވުމުގައި ވާހަކަފުޅު ދައްކަވަމުން މިޝްރާ ވިދާޅުވީ ރާއްޖޭގައި ހޭދަކުރެވިފައިވާ އަހަރު ދުވަހުގެ ތެރޭގައި ދިވެހިންގެ ހިތްހެޔޮކަން ފެނިގެން ގޮަސްފައިވާ ކަމަށެވެ.

ދެ ގައުމުގެ މެދުގައި އޮތް ގުޅުމަކީ ހަމައެކަނި ސިޔާސީ ގުޅުމެއް ނޫންކަމަށްވެސް އޭނާ ވިދާޅުވި އެވެ. ވޭތުވެދިޔަ އަހަރުގެ ތެރޭގައި ދެގައުމުގެ ގުޅުން ބަދަހިކުރުމުގެ ގޮތުން ގިނަ މަސައްކަތްތަކެއް ކުރެވިފައިވާ ކަމަށް އޭނާ ވިދާޅުވި އެވެ. އެގޮތުން، އިންޑިއާގެ ފޮރިން މިނިސްޓަރ ސުޝްމާ ސުވަރާޖް ރާއްޖެއަށް ކުރެއްވި ޒިޔާރަތާއި، ރައީސް އަބްދުﷲ ޔާމީން އިންޑިއާއަށް ކުރެއްވި ދަތުރުފުޅު ކޮމިޝަނަރ ވަނީ ފާހަގަކުރައްވާފަ އެވެ.

އިންޑިއާއަކީ ރާއްޖޭގެ ފަތުރުވެރިކަމުގެ އެންމެ ބޮޑު މާކެޓައް ހެދުމަށް ގިނަ މަސައްކަތްތަކެއް ކުރައްވާނޭ ކަމަށްވެސް މިޝްރާ ވަނީ ވިދާޅުވެފަ އެވެ. އެގޮތުން މިދިޔަ އަހަރުގެ ތެރޭގައި އިންޑިއާ އިން ރާއްޖެއައި ފަތުރުވެރިންގެ އަދަދު 28 ޕަސެންޓް އިތުރުވެފައިވާ ކަމަށް ވެސް އޭނާ ފާހަގަކުރެއްވި އެވެ. 

ރޭގެ ރަސްމިއްޔާތުގެ ޝަރަފްވެރި މެހެމާނު ފޮރިން މިނިސްޓަރ ޑރ. މުހައްމަދު އާސިމް ވަނީ އިންޑިއާ އިން ރާއްޖެއަށް ވެދީފައިވާ އެހީތައް ފާހަގަކުރައްވާފަ އެވެ. އެގޮތުން، ރާއްޖެއަށް އެހީތެރިކަން ބޭނުންވާ ވަގުތު  ފަސްޖެހުމެއް ނެތި އިންޑިއާއިން އެކަން ފުރިހަމަ ކޮށްދޭ ކަމަށްވެސް އޭނާ ވިދާޅުވި އެވެ. އަދި، ކުރިއަށް އޮތް ދުވަސްތަކުގައި މިހާރު އޮތް ގުޅުން އިތުރަށް ބަދަހިކުރުމަށް މަސައްކަތްތަކެއް ކުރައްވާނޭ ކަމަށްވެސް މިނިސްޓަރ ވިދާޅުވި އެވެ.

ރޭގެ ރަސްމިއްޔާތުގައި ފިޝަރީޒް މިނިސްޓަރ ޑރ. މުހައްމަދު ޝައިނީ، ޑިފެންސް މިނިސްޓަރ އާދަމް ޝަރީފް އުމަރު، ޖެންޑަރ މިނިސްޓަރ ޒެނީޒާ ޝަހީދު ޒަކީގެ އިތުރުން ޗައިނާގެ އެމްބެސެޑަރ ވަންގ ފުކާންގ ބައިވެރިވެވަޑައިގެންނެވި އެވެ.