ތޮއްޑޫގައި ހިނގި އެކްސިޑެންޓްގައި އަނިޔާވި މީހާއަށް އައިސީޔޫގައި ދަނީ ފަރުވާދެމުން: އައިޖީއެމްއެޗް

އއ. ތޮއްޑޫގައި އެއް ސައިކަލުގައި ތިން މީހުން ދަނިކޮށް އެކްސިޑެންޓެއް ހިނގާ އެކަކަށް އައިޖީއެމްއެޗްގެ އައިސީޔޫގައި ވެންޓިލޭޓަރުގެ އެހީގައި ފަރުވާ ދެމުން އެބަދެ އެވެ.

އައިޖީއެމްއެޗްގެ މީޑިއާ އޮފިޝަލް އާދިއްތަ ދުވަހު ވިދާޅުވީ ތޮއްޑޫގައި ހިނގި އެކްސިޑެންޓާ ގުޅިގެން އައިޖީއެމްއެޗްގައި ފަރުވާ ދެމުންދަނީ 34 އަހަރުގެ ފިރިހެނެއް ކަމަށާއި އޭނާއަށް އައިސީޔޫގައި ފަރުވާ ދެމުން އަންނައިރު، ޓެސްޓްތައް ހަދާ ފައިވާ ކަމަށެވެ. އަދި އެ ޓެސްޓްތަކުގެ ނަތީޖާ ލިބުމުން އިތުރު ފަރުވާ ދިނުމުގައި އަމަލު ކުރާނެ ގޮތް އެނގިގެންދާނެ ކަމަށް ވެސް ހޮސްޕިޓަލުން ބުނެ އެވެ.

އެ މީހާގެ ހާލު ސީރިޔަސް ކަމަށްވެސް މައުލޫމާތު ލިބެއެވެ.

ތޮއްޑޫ ކައުންސިލްގެ މެމްބަރަކު ހޮނިހިރު ދުވަހު "ރާއްޖެއެމްވީ"އަށް ވިދާޅުވީ އެ އެކްސިޑެންޓް ހިނގީ ހުކުރު ދުވަހު މެންދުރު ފަހު 13:30 އެހާކަންހާއިރު، މޫދަށް އެރުމަށްޓަކައި އެރަށު އާއިލާއެއް ތިން މީހުން އެއް ސައިކަލެއްގައި ދަނިކޮށް މަގުގެ އަޑިގުޑަންގަނޑަކަށް ޖެހި، ސައިކަލް ގޮސް މަގުގެ އެއްފަރާތުގައި ހުރި ރުކެއްގައި ޖެހުމާ ގުޅިގެން ކަމަށެވެ.

އޭނާ ވިދާޅުވީ އެ ސައިކަލްގައި ތިބީ ސްކޫލް ކުއްޖަކާއި އެކުއްޖާގެ ދެ ބޭބެ ކަމަށެވެ. އެތަނުން ސައިކަލް ދުއްވަން އިން މީހާ ވަރަށް ބޮޑަށް ޒަހަމްވެފައިވާ ކަމަށް އޭނާ ވިދާޅުވި އެވެ. އަދި އޭނާ މާލެ ގެނެސް އައިޖީއެމްއެޗް އައިސީޔޫގައި ފަރުވާދެމުންދާ ކަމަށް ވެސް ކައުންސިލް މެމްބަރު ވިދާޅުވި އެވެ. އަދި ދެ ކުދިންނަށް ފަރުވާ ދިނުމަށްޓަކައި އއ. ރަސްދޫއަށް ފޮނުވާލާފައިވާ ކަމަށް ވެސް އޭނާ ވިދާޅުވި އެވެ.

އެއްގަމުގައި ވެހިކަލް ދުއްވުމުގެ ގަވާއިދުގެ ދަށުން ސައިކަލެއްގައި ތިން މީހުން ދުއްވަކީ ރާއްޖޭގައި މަނާ ކަމެކެވެ.