ކަނޑުހުޅުދޫގައި ހިނގި މާރާމާރިއާ ގުޅިގެން ހަތަރު މީހުން ހައްޔަރުކޮށްފި
ހައްޔަރުކުރި މީހުންގެ ތެރޭގައި ޒަހަމްވި ޒުވާނާ ވެސް ހިމެނޭ
މާރާމާރީގައި ޒަހަމްވި ޒުވާނާ ، އެނާ މިހާރު ވަނީ ހައްޔަރު
ގއ. ކަނޑުހުޅުދޫގައި ހިނގި މާރާމާރިއެއްގައި ހަތަރު މީހުން ފުލުހުން ހައްޔަރުކޮށްފިއެވެ.
ރާއްޖެއެމްވީއަށް މައުލޫމާތު ދެއްވަމުން ބުދަ ދުވަހު ފުލުހުންގެ ސްޕޯކްސްޕާސަން ސްޕްރިންޓެންޑެންޓް އޮފް ޕޮލިސް އަހުމަދު ޝިފާން ވިދާޅުވީ މާރާމާރީ ހިނގާފައި ވަނީ ބުރާސްފަތި ދުވަހުގެ ރޭގައި ކަމަށެވެ. އެކަމާ ގުޅިގެން ހަތަރު މީހުން މިހާރު ފުލުހުންގެ ބެލުމުގެ ދަށައް ގެންގޮސްފައިވާ ކަމަށް ޝިފާން ވިދާޅުވިއެވެ.
ރާއްޖެއެމްވީއަށް މައުލޫމާތު ލިބިފައި ވަނީ މާރާމާރީގައި ވަނީ ވަޅިން ހަމާލާދީ ޒުވާނަކު ޒަހަމްކޮށްލާފައެވެ.
ފުލުހުން ބުނީ މާރާމާރީގައި ގުޅިގެން ހައްޔަރުކުރި ހަތަރު މީހުންގެ ތެރޭގައި ޒަހަމްވި ޒުވާނާ ވެސް ހިމެނޭ ކަމަށެވެ. އަދި ޒަހަމްވި ޒުވާނާ އަށް ފަރުވާދިނީ ވެސް ފުލުހުންގެ ބެލުމުގެ ދަށުން ކަމަށެވެ.
ފުލުހުން ބުނީ މިކަމާ ގުޅިގެން އިތުރު މައުލޫމާތެއް މިވަގުތަށް ހާމަކުރެވެން ނެތް ކަމަށެވެ.
