ދައުލަތުން ރައްޔިތުންނަށް ހިލޭ ބޭސްފަރުވާގެ ޚިދުމަތް ދޭއިރު، އާސަންދައިގެ ތެރެއަށް ވެސް ކޮރަޕްޝަން ވަދެފައި އޮތީ އިންތިހާއަށް ކަމަށާއި، އެކަމުގެ ސަބަބުން ދައުލަތުގެ ބަޖެޓުން، ވަރަށްގިނަ ފައިސާތަކެއް އިސްރާފުވެގެންދާ ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހް ވިދާޅުވެއްޖެ އެވެ. 

ހެލްތު މިނިސްޓަރުކަން ކުރައްވާފައިވާ ބޭފުޅުންގެ ސަމިޓް އިފްތިތާހް ކޮށްދެއްވާ ވާހަކަފުޅު ދައްކަވަމުން ރައީސް ސޯލިހްް ވިދާޅުވީ ދައުލަތުން ރައްޔިތުންނަށް ހިލޭ ބޭސްފަރުވާގެ ޚިދުމަތް ދޭއިރު، އާސަންދައިގެ ތެރެއަށް ވެސް ކޮރަޕްޝަން ވަދެފައި އޮތީ އިންތިހާއަށް ކަމަށެވެ. އަދި އެކަމުގެ ސަބަބުން ދައުލަތުގެ ބަޖެޓުން، ވަރަށްގިނަ ފައިސާތަކެއް އިސްރާފުވެގެންދާ ކަމަށާއި، އެއީވެސް ޞިއްޙީ ޚިދުމަތުގެ ނިޒާމު ތަރައްޤީ ކުރުމަށް މަޝްވަރާ ކުރާއިރު، ޙައްލު ހޯދަންޖެހޭ ކަންތައްތައް ކަމަށް ރައީސް ވިދާޅުވި އެވެ. 

"މިކަންކަން ހުއްޓުވުމުގައި ޢާންމު ރައްޔިތުންގެ ވަރަށްބޮޑު އެހީތެރިކަމެއް ވެސް އަޅުގަނޑުމެން ބޭނުންވޭ. ލަންކާ، އިންޑިޔާ އަދި މެލޭޝިޔާގައި ދިރިއުޅޭ ދިވެހިން، ހިލޭ ބޭސްފަރުވާ ކުރުމަށްޓަކައި [މެރަނާ]ގެ ނަމުގައި، މި މަހުގެ ތެރޭގައި ސަރުކާރުން ވަނީ، އާސަންދަ ސްކީމެއް ތަޢާރުފުކޮށްފައި. މިފަދަ ސްކީމްތަކުގެ ބޭނުންހިފުމުގައި ވެސް ޒިންމާދާރުވުމަކީ ވަރަށް މުހިންމު ކަމެއް."

ރައީސް ވިދާޅުވީ ރައްޔިތުންނަށް ޚިދުމަތް ކުރުމަށް ނުކުމެ ތިބީ، ރައްޔިތުންގެ ކަންބޮޑުވުންތައް ފިލުވައިދީ، ފަހި ދިރިއުޅުމެއް ހޯދައިދޭން ކަމަށެވެ. އަދި ރައްޔިތުންގެ ކަންބޮޑުވުންތަކަށް، މި ސަރުކާރުން ޙައްލު ހޯދައިދޭނެ ކަމަށާއި، ރައްޔިތުންނަށް ފަސޭހައިން ވާޞިލުވެވޭ، އަދި ފެންވަރު ރަނގަޅު ފުރިހަމަ ޞިއްޙީ ޚިދުމަތުގެ ނިޒާމެއް ތަރައްޤީ ކުރައްވާނެ ކަމަށް އެމަނިކުފާނު ވިދާޅުވި އެވެ. 

ދެކުނު އޭޝިޔާ ސަރަޙައްދުގެ ޤައުމުތަކުގެ ތެރެއިން، އެންމެ ފުރަތަމަ މެލޭރިޔާ އާއި ފައިލޭރިޔާ ނައްތައިލެވުނު ޤައުމަކީ ދިވެހިރާއްޖެކަން ފާހަގަކުރައްވާ ރައީސް ސޯލިހް ވިދާޅުވީ، ޕޯލިއޯ އާއި މީސަލްސް ވެސް ވަނީ ރާއްޖެއިން ނައްތައިލެވިފައި ކަމަށެވެ. އަދި އެ ނުރައްކާތެރި ބަލިތައް، ރާއްޖެއިން ނައްތައިލުމުގައި ވަޒީރުކަން ކުރެއްވި ބޭފުޅުންގެ ޙިއްޞާ ވަރަށް ބޮޑުކަމަށް ރައީސް ވިދާޅުވި އެެވެ. 

"ރާއްޖެއަށް ކުރިމަތިވި ކޮލެރާގެ ވަބާ ފެތުރިގެން ދިޔައީވެސް، އެކަށީގެންވާވަރާ ގާތަށް ވެސް، އަޅުގަނޑުމެންގެ ތެރޭގައި، ވަސީލަތްތަކާއި، ބޭހާއި ޑޮކްޓަރުން ނެތް ދުވަސްވަރެއްގައި. އޭރު މި ރާއްޖޭގެ މުޅި ޞިއްޙީ ނިޒާމު ބަރޯސާވެފައި އޮތީ، ކޮމިޔުނިޓީ ހެލްތު ވަރކަރުންނާއި، ފޫޅުމައިންނާއި، މަދު ޢަދަދެއްގެ ޑޮކްޓަރުންނާއި ނަރުހުންގެ މައްޗަށް." ކަމަށް ރައީސް ވިދާޅުވިއެވެ.