ރާއްޖެ ހުދުމުހުތާރުކަމުގެ ތެރެއަށް ދިއުން ހުއްޓުވުމަށް އަޒުމު ވަރުގަދަކޮށް، އިތުރަށް މަސައްކަތް ކުރާނަން: ރައީސް ނަޝީދު

ދިވެހިރާއްޖެ ހުދުމުހުތާރު ކަމުގެ ތެރެއަށް ދިއުން ހުއްޓުވުމަށް އިތުރަށް އަޒުމު ވަރުގަދަކޮށް، މަސައްކަތް ކުރައްވާނެ ކަމަށް ކުރީގެ ރައީސް އަދި އިދިކޮޅު އެމްޑީޕީގެ ލީޑަރު މުހައްމަދު ނަޝީދު ވިދާޅުވެއްޖެ އެވެ.

ރައީސް ނަޝީދު އެގޮތަށް ވިދާޅުވީ އެމަނިކުފާނު އަންގާރަ ދުވަހު ކުރެއްވި ޓްވީޓެއްގަ އެވެ. ރައީސް ނަޝީދު އެގޮތަށް ވިދާޅުވިއިރު، ގާނޫނުގައި ބުނެފައިވާ ދުވަހު ލޯކަލް ކައުންސިލް އިންތިޚާބު ނުބޭއްވި ފަސްކުރަމުން ގޮސް ކައުންސިލްތަކުގެ ގާނޫނީ ދައުރު ވެސް ވަނީ ހަމަވެފަ އެވެ. އަދި އެ އިންތިހާބާ ދިމާކޮށް އިދިކޮޅު އެމްޑީޕީއަށް ނިސްބަތްވާ ކައުންސިލްތަކުގެ މެމްބަރުންނާއި ކުރިއަށް އޮތް ލޯކަލް ކައުންސިލްތަކަށް ވާދަކުރާ ކެނޑިޑޭޓުން ހައްޔަރުކޮށް ބައެއް ކެންޑިޑޭޓުންނަށް ދަނީ ދައުވާ ކުރަމުންނެވެ.

އެގޮތުން އއ. މަތިވެރިން އެމްޑީޕީއަށް ނިސްބަތްވާ މެމްބަރުންތަކެއް ހައްޔަރުކޮށްފައިވާއިރު، 2011 ވަނަ އަހަރުގެ އޮޑިޓް ރިޕޯޓަކާ ގުޅިގެން އައްޑޫ ސިޓީގެ މޭޔަރު އަބްދުﷲ ސޯދިގުގެ މައްޗަށް ދައުވާކޮށް، ސަރީއަތް ދަނީ ހިންގަމުންނެވެ.

ރައީސް ނަޝީދު ވިވަގުތު ހުންނެވީ އިނގިރޭސި ވިލާތުގެ ހިމާޔަތުގައެވެ. ނަމަވެސް މިވަގުތު ހުންނެވީ އަވައްޓެރި ސްރީލަންކާގަ އެވެ. އެއީ ސްރީލަންކާގައި ތިބޭ ބޭރު ގައުމުތަކުގެ ސަފީރުންނާ ބައްދަލު ކުރެއްވުމަށާއި އިދިކޮޅު އިއްތިހާދުގެ ލީޑަރުންނާ ބައްދަލު ކުރެއްވުމަށެވެ. އަދި އެމްޑީޕީގެ ގައުމީ މަޖިލީހުގެ ބައްދަލުވުމެއް ބާއްވައި، ލަންކާގައި ތިބި ދިވެހި ރައްޔިތުންނާ ވެސް ވަނީ ބައްދަލު ކުރައްވާފަ އެވެ.