ކޮރަޕްޝަންގެ ހާއްޔެއްގެ ގޮތުގައި ނުވަތަ ކޮރަޕްޝަނުގައި ހައްދުފަހަނަ އަޅާފައިވާ ގައުމެއްގެ ގޮތުގައި މުޅި ދުނިޔެއަށް ވެސް މަޝްހޫރުވެފައިވާ އިނޑިއާ އަށް ވުރެ ވެސް ރާއްޖޭގައި ކޮރަޕްޝަން ބޮޑު ކަމަށް ކޮރަޕްޝަން ޕާސެޕްޝަންސް އިންޑެސް (ސީޕީއައި) އިން ދައްކައިފިއެވެ.

ކޮރަޕްޝަން އެކުލެވިފައިވާ މިންވަރު ދެނެގަނެ، ކޮރަޕްޝަން އޮތް ކަމަށް ގައުމުތަކުގެ ރައްޔިތުން ގަބޫލުކުރާ މިންވަރު ދެނެގަތުމަށް ޓްރާންސްޕޭރެންސީ އިންޓަރނޭޝަނަލް އިން ކޮންމެ އަހަރު އެކުލަވާލސީޕީއައި 2016 ގައި ރާއްޖެ އުޅެނީ ދުނިޔޭގެ އެވްރެޖަށްވުރެ ވެސް ދަށު އެވެ. އެ ގޮތުން ރާއްޖޭގެ ކޮރަޕްޝަން ގޮސްފައިވާ މިންވަރު 2016 ވަނަ އަހަރު އިންޑިޔާ އަށް ވުރެ ވެސް ބޮޑުކަން ފާހަގަކޮށްލެވެއެވެ. އެގޮތުން އިންޑިޔާ އަށް ލިބިފައިވަނީ 40 ޕޮއިންޓެވެ. ކޮރަޕްޝަންގެ އަމަލުތައް ހިންގާފައިވާ މިންވަރު ދެނެގަތުމަށް ނަގާ މި އިންޑެސްގައި ރާއްޖެއަށް ލިބިފައިވަނީ 36 ޕޮއިންޓެވެ. މުޅި ދުނިޔޭގެ އެވްރެޖަށް ބަލާ އިރު އުޅެނީ 43 ޕޮއިންޓްގަ އެވެ.

ފާއިތުވެދިޔަ ހަތަރު އަހަރު ރާއްޖެއިން މި އިންޑެކްސްގައި ބައިވެރިވެފައިނުވާ އިރު އެންމެ ފަހުން ރާއްޖެއިން މި އިންޑެކްސްގައި ބައިވެރިވެފައިވަނީ 2011 ވަނަ އަހަރު އެވެ. އެހެންނަމަވެސް އޭރު ޕޮއިންޓް ދިނުމުގައި ބޭނުންކުރާ ގޮތާއި އެއަހަރަށް ފަހު ޕޮއިންޓް ދިނުމުގައި ގެންގުނު ގޮތްތައް ވަނީ ބަދަލުކޮށްފަ އެވެ. އެގޮތުން 2011 ވަނަ އަހަރު ޕޮއިންޓް ދިނުމުގައި ބޭނުންކޮށްފައިވަނީ 10 އަކުން 0 ހަމައަށް ޕޮއިންޓް ދިނުމުގެ އުސޫލެކެވެ. އެހެން ނަމަވެސް މިހާރު ޕޮއިންޓް ދިނުމުގައި ގެންގުޅެނީ 100 އާއި 0 ދެމެދުގެ މިންގަނޑެކެވެ. އެގޮތުން 100 އެއީ ކޮރަޕްޝަން އެއްވެސް ވަރަކަށް ނެތް ގައުމުތަކުގެ ގޮތުގައި ކަނޑައެޅޭ އިރު ލިބޭ އަދަދު ދައްވުމުން ކޮރަޕްޝަން މަތި ކަމަށް ކަނޑައެޅޭނެ އެވެ.

ސީޕީއައި އިން 100 އިން 36 ޕޮއިންޓް 2016 ވަނަ އަހަރު ލިބުނު އިރު ރާއްޖެ އަދިވެސް މިއޮތީ ކޮރަޕްޝަން މަތީ ގައުމުތަކުގެ ލިސްޓުގަ އެވެ. ކޮރަޕްޝަނުގައި ރާއްޖޭގެ ރޭންކް އުޅެނީ 95 ވަނައިގަ އެވެ.

އެހެން ނަމަވެސް 2011 ވަނަ އަހަރު ރާއްޖޭގެ ރޭންކިން އެއަށްވުރެ ވެސް ދަށެވެ. އެގޮތުން އޭރު ރޭންކިން އުޅެނީ 134 ވަނައިގަ އެވެ.

މި ސަރަހައްދުގެ އެހެން ގައުމުތަކަށް ބަލާ އިރު ސްރީލަންކާ އަށް ވެސް ލިބިފައިވަނީ 36 ޕޮއިންޓެވެ. ބަގްލަދޭޝް އަށް 26 ޕޮއިންޓް ލިބުނު އިރު ނޭޕާލް އަށް ލިބިފައިވަނީ 29 ޕޮއިންޓެވެ. އަދި ޕާކިސްތާނަށް 32 ޕޮއިންޓް ލިބުނު އިރު ބޫޓާން އަށް 65 ޕޮއިންޓް ވަނީ ލިބިފަ އެވެ. ސާކް ގައުމުތަކުގެ އެންމެ ފުލުހުގައި އުޅެނީ 15 ޕޮއިންޓާ އެކު އަފްޣާނިސްތާނެވެ.

ސީޕީއައިގެ މުޅި ދުނިޔޭގެ ނަތީޖާ އަށް ބަލާ އިރު އެންމެ ކޮރަޕްޝަން މަދު ގައުމަކަށް ހޮވިފައިވަނީ 90 ޕޮއިންޓާ އެކު ޑެންމާކާއި ނިއުޒިލެންޑެވެ. އަދި ދުނިޔޭގެ އެންމެ ފުލުހުގައި އުޅެނީ 10 ޕޮއިންޓާ އެކު ސޯމާލިޔާ އެވެ.

ދުނިޔޭގެ މަޝްހޫރު އެހެން ގައުމުތަކަށް ބަލާ އިރު ސައުދީ އަރަބިއްޔާ އުޅެނީ 46 ޕޮއިންޓާ އެކު ދުނިޔޭގެ 62 ވަނައިގައެވެ. ޗައިނާ 40 ޕޮއިންޓާ އެކު 79 ވަނައިގާ އޮތް އިރު އިގިރޭސިވިލާތް އޮތީ 81 ޕޮއިންޓާ އެކު ދުނިޔޭގެ 10 ވަނައިގަ އެވެ. އަދި އެމެރިކާ އުޅެނީ 74 ޕޮއިންޓާ އެކު 18 ވަނައިގަ އެވެ.

ސީޕީއައި އަކީ 1995 އަހަރުން ފެށިގެން ގައުމުތަކުން އެގައުމުތަކުން ކޮރަޕްޝަން އޮތް މިންވަރާ މެދު ދެކޭ ގޮތް ބެލުމަށް ޓްރާންސް ޕޭރެންސީ އިންޓަނޭޝަނަލް އިން ނަގާ އިންޑެކްސް އެކެވެ. އެންމެ ފަހުން ނެގި އިންޑެކްސްގައި 176 ގައުމު ރޭންކިނަށް ވެއްޓެއެވެ.

ސީޕީއައިގެ ތަފާސް ހިސާބުތަކަށް ބަލާ އިރު އާއްމު ގޮތެއްގައި ތަރައްގީވެފައިވާ ގައުމުތަކުގައި ކޮރަޕްޝަން މަދު ކަމަށް ގަބޫލު ކުރާ އިރު މި ލިސްޓުގެ އެންމެ ފުލުގައި އުޅެނީ ތަރައްގީ ވަމުން އަންނަ ގައުމުތަކާއި ފަގީރު ގައުމުތަކެވެ.

ރާއްޖެއިން މި ލިސްޓުގައި މިދިޔަ ހަތަރު އަހަރު ބައިވެރިވެފައިނުވާ އިރު ރާއްޖޭގައި މިހާތަނަށް ހިންގިކަން ފަޅާ އެރި އެންމެ ބޮޑު އެއް ހިޔާނާތް ކަމުގައިވާ އެމްއެމްޕީއާރްސީގެ ކޮރަޕްޝަންގެ އަމަލު ހިނގާފައިވާކަން ފަޅާ އެރި އަހަރު ރާއްޖެއިން މި އިންޑެކްސްގައި ބައިވެރިވެފައެއް ނުވެ އެވެ.