އިބްތިހާލު މަރުވީ ނޭވާ ނުލެވޭވަރަށް ކަރުގައި ހިފާ، ހަށިގަނޑުގެ ތެރެއަށް ލޭ އެޅިގެން: ޑޮކްޓަރ
އިބްތިހާލު މަރުވީ ނޭވާ ނުލެވޭގޮތަށް ކަރުގަ ހިފާ، ބޮޑެތި އަނިޔާތަކެއް ދިނުމުން
މުހައްމަދު އިބްތިހާލު (3 އަހަރު) --
ވ. ރަކީދޫގައި އަނިޔާވެރި ގޮތަކަށް މަރާލާފައި އޮއްވާ ފެނުނު މުހައްމަދު އިބްތިހާލު (3 އަހަރު) މަރުވީ ނޭވާ ނުލެވޭވަރަށް ކަރުގައި ހިފާ، އަދި ފުއްޕާމޭ ފަދަ ހަޑިގަނޑުގެ ގުނަވަންތަކަށް ދީފައިވާ އަނިޔާތަކުގެ ސަބަބުން ބަނޑަށް ލޭ އެޅިގެން ކަމަށް އިބްތިހާލުގެ ހަށިގަނޑު ބެލި އައިޖީއެމްއެޗުގެ ޑޮކްޓަރު ވިދާޅުވެއްޖެ އެވެ.
އިބްތިހާލުގެ މަރުގެ މައްސަލާގައި އާދިއްތަ ދުވަހު ކްރިމިނަލް ކޯޓުގައި ބޭއްވި ހެކިބަސް ނެގުމުގެ ޝަރީއަތުގުގެ މަޖިލީހުގައި ހެކިބަސް ދެމުން ޑޮކްޓަރ އަހުމަދު ނިޝާން ވިދާޅުވީ، އިބްތިހާލު މަރުވީ ވަރަށް ބޮޑެތި އަނިޔާތަކެއް އޭނާއަށް ދީފައިވާތީކަން އޭނާގެ ހަށިގަނޑުގެ ބޭރުފުށުން ފެންނަހުރި އަނިޔާތަކުންނާއި ތަހުލީހު ރިޕޯޓްތަކުން އެނގޭ ކަމަށެވެ.
ޑރ. ނިޝާން ވިދާޅުވީ ބަނޑަށް ލޭ އެޅެނީ ބޮޑު އަނިޔާއެއް ލިބުމުން ކަމަށާއި އިބްތިހާލުގެ ކަރާއި މޭ ކަށިގަނޑާއި ބުރަކަށްޓަށާއި ކުރިމަތި ފަރާތަށް ވެސް ބޮޑެތި އަނިޔާތައް ކޮށްފައިވާ ކަމަށެވެ. އަދި ބޮލުގެ އެއްފަރާތް ވަރަށް ބޮޑަށް ދުޅަވެފައިވާ ކަމަށް ވެސް ޑޮކްޓަރު ވިދާޅުވި އެވެ.
ޑޮކްޓަރުގެ އެ ވާހަކަތަކާ ގުޅިގެން ގާޒީ ވަނީ އިބްތިހާލު މަރާލުމުގެ ކުށުގައި ދައުލަތުން ދައުވާކޮށްފައިވާ އިބްތިހާލުގެ މަންމަ އާފިޔާ މުހައްމަދު މަނިކުއަށް ވާހަކަ ދެެއްކުމުގެ ފުރުސަތު ދީފަ އެވެ. ނަމަވެސް އާފިޔާ ބުނީ އެއްޗެއް ބުނަން ބޭނުންނުވާ ކަމަށެވެ.
ގާޒީ ވަނީ އާފިޔާގެ އާއިލާއާ ބެހޭ ބައެއް މައުލޫމާތު ހޯދުމަށް އާފިޔާއާ ސުވާލު ކުރައްވާފަ އެވެ. ގާޒީގެ އެ ސުވާލު ތަކާގުޅިގެން އާފިޔާ ބުނީ، އޭނާގެ ބައްޕަ ވަނީ މަރުވެފަ ކަމަށާއި މަންމަ މާލޭގައި އެބައުޅޭ ކަމަށެވެ. ނަމަވެސް މަންމަ އުޅޭ ތަނެއް ނޭނގޭ ކަމަށާއި އެއްބަނޑު އެއްބަފާ ތިން މީހުން މާލޭގައި ތިބި އިރު، އެމީހުން އުޅޭތަނެއް ވެސް ނޭނގޭ ކަމަށެވެ.
އާދިއްތަ ދުވަހުގެ ޝަރީއަތް ނިންމާލައްވަމުން ގާޒީ މުހުތާޒް ފަހުމީ ވިދާޅުވީ މި މައްސަލައިގައި ވަރަށް އަވަހަށް އަޑުއެހުމެއް ބާއްވާނެ ކަމަށެވެ.
އިބްތިހާލު މަރުވި މައްސަލައިގައި ދައުލަތުން ވަނީ އިހުމާލުވެފައިވާ ކަމަށް ބުނެ ދައުލަތުގެ ފަސް މުވައްޒަފެއްގެ މައްޗަށް އަމުރަށް ނުކިޔަމަންތެރިވުމުގެ ކުށުގެ ދައުވާކޮށްފަ އެވެ. އެޝަރީއަތްތައް ކްރިމިނަލް ކޯޓުގައި މިހާރު ވަނި ފަށާފަ އެވެ.
އާފިޔާގެ މައްޗަށް ކުރި ގަސްދުގައި ކުއްޖަކު މެރުމުގެ ދައުވާގެ އިތުރުން އަމުރަށް ނުކިޔަމަންތެރިވުމުގެ ދައުވާގެ ޝަރީއަތް ވެސް ކްރިމިނަލް ކޯޓުގައި މިހާރު ދަނީ ހިންގަމުންނެވެ. އާފިޔާ ވަނީ މީގެކުރިން ބޭއްވި ޝަރީއަތުގެ އަޑުއެހުންތަކުގައި އިބްތިހާލަށް އަނިޔާ ކޮށްފައިވާ ކަމަށާއި އިބްތިހާލު މާރާލާފައިވާ ކަމަށް ބުނެ ޝަރީއަތުގެ މަޖިލީހުގައި ކުށަށް އިއުތިރާފްވެފަ އެވެ.
އިބްތިހާލް މަރުވީ 28 ޖެނުއަރީ 2015 ވަނަ ދުވަހުގެ މެންދުރު 12:00 ހާއިރު އެވެ.
