އޮޑިޓްކުރި އިރު މަދުވި ފައިސާ ފަހުން ފެނުމުން ކޮރަޕްޝަން ނެތް ކަމަށް ނިންމައިފި

ފިޝަރީޒް އެންޑް އެގްރިކަލްޗަރ މިނިސްޓްރީގެ 2010 ވަނަ އަހަރު އޮޑިޓްކުރި އިރު ތިޖޫރީން ގެއްލުނު 2946ރ. ފަހުން ފެނުމުން އެ މައްސަލާގައި ކޮރަޕްޝަންގެ އަމަލެއް ނެތް ކަމަށް އެންޓި ކޮރަޕްޝަން ކޮމިޝަން (އޭސީސީ)ން ނިންމައިފިއެވެ.

އެމައްސަލަ އޭސީސީން ތަހުގީގު ކުރުމަށް ފަހު ނެރެފައިވާ ރިޕޯޓްގައި ވަނީ ޖޫން 30، 2011 ގައި ފިޝަރީޒް މިނިސްޓްރީގެ ތިޖޫރީ ގުނިއިރު 2،946ރ. އާއި 2،454ރ. ގެ ޗެކެއް މަދުވާ ކަމަށް ދައްކާފައި ވެއެވެ. ނަމަވެސް ޖުލައި 3، 2011 ގައި އެ ފައިސާއާ ޗެކް އަލުން ފެނިފައިވާ ކަމަށް ރިޕޯޓުގައި ފާހަގަކޮށްފައި ވެއެވެ.

Advertisement

ތިޖޫރީން 2،946ރ. މަދުވަފައި ވަނީ ކީއްވެކަން ޖުލައިގެ 7، 2011ގެ ނިޔަލަށް ވެސް މިނިސްޓްރީގެ ފަރާތުން ސާފްކޮށްދީފައިނުވާ ކަމަށް ވެސް އޭސީސީން ފާހަގަކޮށްފައި ވެއެވެ.

ނަމަވެސް އެސީސީން ބުނީ އޮޑިޓަރުން ތިޖޫރީ ގުނުމަށް ފަހު ދިޔަ ފަހުން، މިނިސްޓްރީގެ ބަޖެޓް ސެކްޝަންގައި އޭރު ތިބި ތިން މުވައްޒަފަކަށް އެ ފައިސާ ފެނުނުކަން ތަހުގީގަށް ފާހަގަކުރެވިގެން އެފައިސާ ފެނުމުން އޮޑިޓަރުންނަށް އެކަން އެންގި ކަމަށް ތަހްގީގުން އެނގޭ ކަމަށެވެ. އަދި ތިޖޫރީ ގުނި ވަގުތު ފައިސާ ފެންނަން ނެތުމުން ފައިސާ ފެނުނު ކަމަށް އެބޭފުޅުން ގަބޫލުނުކުރާތީ އޮޑިޓް ރިޕޯޓްގައި އެވާހަކަ ފާހަގަކޮށްފައިވަނީ ކަމަށް ތަހުގީގަށް އެނގޭތީ އާއި، ޑިސެމްބަރު 26، 2011 ގައި މިނިސްޓްރީގެ އޭރުގެ ފައިނޭންސް އެގްޒެކެޓިވް ސޮއިކޮށްފައިވާ “މިނިސްޓްރީ އޮފް ފިޝަރީޒް އެންޑް އެގްރިކަލްޗަރގެ އޮޑިޓް ރިޕޯޓަށް މިނިސްޓްރީން ކުރާ ކޮމެންޓްސް”ގެ އަށް ވަނަ ޕޮއިންޓްގައި ތިޖޫރީން މަދުވާ ކަމަށް އޮޑިޓް ރިޕޯޓްގައި ބަޔާންކޮށްފައިވާ ފައިސާ ފަހުން ފެނިގެން ތިޖޫރީއަށް ލާފައިވާ ކަމަށް ބަޔާންކޮށްފައި ވާތީ، މިމައްސަލައިގައި، ކޮރަޕްޝަން ހުއްޓުވުމާއި މަނާކުރުމުގެ ގާނޫނުގައި ބުނާ ފަދަ ކޮރަޕްޝަންގެ އަމަލެއް ހިންގާފައިވާކަމަށް އެ ކޮމިޝަންގެ ތަހުގީގަށް ބެލެވެން ނެތުމުން، އެންޓި-ކޮރަޕްޝަން ކޮމިޝަނުގެ ގާނޫނުގެ 25 ވަނަ މާއްދާގެ (ހ) ގެ (1) ވަނަ ނަންބަރުގައިވާ ފަދައިން މިމައްސަލައަކީ ކޮރަޕްޝަނުގެ ކުށެއް އެކުލެވިގެންނުވާ މައްސަލައެއް ކަމަށް ކަނޑައަޅާ ކަމަށް އޭސީސީގެ އެ މައްސަލަ ނިންމިގޮތުގެ ރިޕޯޓްގައި ވެއެވެ.