ކޮރަޕްޝަންގެ އަމަލުތައް ހުއްޓުވުމަށް މާލީ ބަޔާންތައް އާއްމުކުރުން ވަރަށް މުހިއްމު: ޓްރާންސްޕޭރަންސީ
ޑިމޮކްރެސީ ދަށަށްދާނަމަ ކޮރަޕްޝަން އިތުރުވާނެ
ޓްރާންޕޭރަންސީ މޯލްޑިވްސްގެ ސީނިއަރ ޕްރޮޖެކްޓް ކޯޑިނޭޓަރ އާހިދު ރަޝީދު --
ރާއްޖެއިން ކޮރަޕްޝަން ހުއްޓުވުމަށް ނުވަތަ މަދު ކުރުމަށް ދައުލަތުގެ ކަމާބެހޭ އިދާރާތުގެ ވެރިންގެ މާލީ ބަޔާންތައް އާއްމުކުރުން ވަރަށް މުހިއްމު ކަމަށް ޓްރާންސްޕޭރަންސީ އިންޓަރނޭޝަނަލްއިން ބުނެފި އެވެ.
ބުދަ ދުވަހުގެ ރޭ ރާއްޖެޓީވީ "ފަލަ ސުރުހީ" ޕްރޮގްރާމުގައި ވާހަކަ ދައްކަވަމުން ޓްރާންޕޭރަންސީ މޯލްޑިވްސްގެ ސީނިއަރ ޕްރޮޖެކްޓް ކޯޑިނޭޓަރ އާހިދު ރަޝީދު ވިދާޅުވީ ރައީސުލްޖުމްހޫރިއްޔާ އާއި ސަރުކާރުގެ މިނިސްޓަރުންނާއި ރައްޔިތުންގެ މަޖިލީހުގެ މެމްބަރުންނާއި އަދި ކޯޓުތަކުގެ ފަނޑިޔާރުންގެ އިތުރުން ދައުލަތުގެ މިނިވަން މުއައްސަސާތަކުގެ ވެރިންގެ މާލީ ބަޔާންތައް އާއްމު ކުރުމަކީ ރާއްޖެއިން ކޮރަޕްޝަން ނައްތާލުމަށް ނުވަތަ މަދުކުރުމަށް ވަރަށް މުހިއްމު ކަމެއް ކަމަށެވެ.
އާހިދު ވިދާޅުވީ ރާއްޖޭގަ ކޮރަޕްޝަން އިންތިހާއަށް އޮތްއިރު، ދައުލަތުގެ އިދާރާތަކުގެ ވެރިންގެ މާލީ ބަޔާންތައް ހުށަހަޅަންޖެހޭ ފަރާތަށް ހުށަހެޅިތޯ ނުވަތަ ނޫންތޯ ވެސް ބަލާލެވެން ނެތް ކަމަށެވެ. އެގޮތުން ރައްޔިތުންގެ މަޖިލީހުގެ މެމްބަރުންގެ މާލީ ބަޔާންތައް ހުށަހެޅިތޯ ބަލާލެވޭނެ ފަސޭހަ ގޮތެއް ނެތް ކަމަށާއި އަދި އެބަޔާންތައް މަޖިލީހުން ޗެކް ކޮށްފައިވޭތޯ ވެސް ބަލާލެވޭނެ ގޮތެއް ރާއްޖޭގައި ނެތް ކަމަށެވެ. އަދި ރާއްޖޭގައި ނޫސްވެރިންނަށް ހުރި ގޮންޖެހުންތަކުގެ ތެރެއިން އެކަންކަން ބެލުމަކީ ވެސް ފަސޭހަކަމެއް ނޫން ކަމަށެވެ.
އާހިދު ވިދާޅުވީ ކޮރަޕްޝަންގެ އަމަލުތައް އިންތިހާއަށް ހިންގަމުންދާއިރު، އެމައްސަލަތަކުގެ ތަހުގީގު ލަސްވަމުންދާކަމީ ވެސް ކޮރަޕްޝަން މަދު ކުރުމަށް އޮތް ހުރަހެއް ކަމަށެވެ. އެގޮތުން 2015 ވަނަ އަހަރު މޯލްޑިވްސް މާކެޓިންގ އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ)ގެ ތެރެއިން 1.22 ބިލިއަން ރުފިޔާގެ ހިޔާނާތެއް ހިންގާފައިވާއިރު، އެމައްސަލައިގެ ތަހުގީގު މިއަދާ ހަމައަށް ވެސް ނުނިމި ދިގުލައިގެން ގޮސްފައިވާ ކަމަށެވެ.
އާހިދު ވިދާޅުވީ ކޮރަޕްޝަންގެ އަމަލުތަކުގެ ތަހުގީގު ލަސްވުމަކީ ރައްޔިތުންގެ އިތުބާރު ގެއްލޭ ކަމެއް ކަމަށާއި ދައުލަތުގެ އިދާރާތަކާ މެދު ރައްޔިތުންގެ އިތުބާރު ގެއްލުމަކީ ރާއްޖެ ނުރައްކާތެރި ފައްތަރެއްގަ އޮތްކަން ރަމްޒިކޮށްދޭ ކަމެއް ކަމަށެވެ. ޑިމޮކްރެސީ ނެތެމުންދާ ނަމަ ކޮރަޕްޝަންގެ އަމަލުތައް ނުހުއްޓި ދަނީ އިތުރުވަމުން ކަމަށް ވެސް އާހިދު ވިދާޅުވި އެވެ.
އާހިދު ވިދާޅުވީ ޓްރާންޕޭރަންސީ މޯލްޑިވްސްއިން 2013 ވަނަ އަހަރާއި 2015 ވަނަ އަހަރު ދެ ސާރވޭއެއް މުޅި ރާއްޖޭގައި ހިންގި ކަމަށާއި އެ ދެ ސާރވޭއިން ވެސް އެންމެ ބޮޑަށް ފާހަގަވީ ރައްޔިތުން މަޖިލީހަށް ރައްޔިތުން އިތުބާރު ނުކުރުން ކަމަށެވެ. އެއީ ވަރަށް ކަންބޮޑުވާ ކަމެއް ކަމަށް ވެސް އާހިދު ވިދާޅުވި އެވެ.
އާހިދު ވިދާޅުވީ މަގާމެއް ލިބުމާއެކު އެ މީހާ ކުއްލިއަކަށް ބޮޑު މުއްސަންޖަކަށްވުމުން، އޭނާއަށް އެ މުއްސަނދިކަން ލިބުނި ގޮތް ބެލޭ ގޮތެއް ރާއްޖޭގައި ނެތް ކަމަށެވެ.
