ރައްޔިތުންގެ މަޖިލިސް މިއަހަރަށް ހުޅުވުމަށް ބޭއްވި ޖަލްސާގައި ރިޔާސީ ބަޔާން އިއްވިއިރު ކޮރަޕްޝަންގެ ވާހަކަ ރައީސް އަބްދުﷲ ޔާމީން ނުދެއްކެވީ އެމަނިކުފަނު އަމިއްލަފުޅަށް އޮރިޔާންވެ ވަޑައިގަންނަވާނެތީ ކަމަށް އެމްޑީޕީގެ އިގްތިސާދީ ކޮމިޓީގެ ނައިބު މުގައްރިރު އިބްރާހިމް އަމީރު ވިދާޅުވެއްޖެ އެވެ.
ހޯމަ ދުވަހުގެ ރޭ ރާއްޖެ ޓީވީގެ "ފަލަ ސުރުޚީ" ޕްރޮގްރާމުގައި އަމީރު ވިދާޅުވީ ރިޔާސީ ބަޔާނުން އަޑު އިވިގެން ދިޔައީ ރައްޔިތުންނަށް ހަގީގަތް ބުނެ ނުދީ ރައްޔިތުން އިތުރަށް ވާވެއްދި ރިޔާސީ ބަޔާނެއްގެ ގޮތުގައި ކަމަށެވެ.
މި ރިޔާސީ ބަޔާނުން ރައްޔިތުންނަށް އިތުރު އުއްމީދެއް ގެނެވިގެން ދިޔަ ތަން ފެނިގެން ނުދާކަން އޭނާ ވަނީ ފާހަގަ ކުރައްވަފައެވެ.
އަމީރު ވިދާޅުވީ ރާއްޖޭގެ މިއަދުގެ ހާލަތަށް ބަލާއިރު ކޮންމެ ދުވަހަކުވެސް ކޮރަޕްޝަންގެ ވާހަކަތައް މީޑިއާ ތަކުގައި ފެތުރެމުން ދާއިރު ރައީސް ޔާމީންގެ ވާހަކަފުޅުގައި ކޮރަޕްޝާއި ބެހޭ ގޮތުން ބަސްފުޅެއް ވިދާޅުވެފައި ނުވަނީ އެކަށީގެންވާ މިންވަރަށް އެ ބޭފުޅުން ކޮރަޕްޝަންގައި ޝާމިލްވާތީ ކަމަށެވެ.
ރައްޔިތުން އެންމެ ކަންބޮޑުވާ ކަންތައްތައް ކަމަށްވާ ކޮރަޕްޝަނާއި އަދުލު އިންސާފާއި ގުޅޭ ގޮތުން އެއްވެސް ވާހަކަފުޅެއް ރިޔާސީ ބަޔާނުގައި ރައީސުލްޖުމްހޫރިއްޔާ ވިދާޅުވެފައެއް ނުވެއެވެ.
ޤާނޫނު އަސާސީގެ ރައްޔިތުންގެ މަޖްލީހުގެ ބާބުގެ 84 ވަނަ މާއްދާގައި "ކޮންމެ އަހަރަކުމެ، ރައްޔިތުންގެ މަޖިލީހުގެ ފުރަތަމަ ދައުރުގެ ފުރަތަމަ ޖަލްސާގައި ޤައުމުގެ ޙާލަތު ބަޔާންކޮށްދީ އަދި ޤައުމުގެ ޙާލަތު އިތުރަށް ރަނގަޅުކުރަންޖެހޭ ކަމަށް ރައީސުލްޖުމްހޫރިއްޔާއަށް ފެންނަ ކަންތައްތަކުގެ މައްޗަށް އެކުލެވޭ ރިޔާސީ ބަޔާނެއް ރައްޔިތުންގެ މަޖްލީހަށް ރައީސުލްޖުމްހޫރިއްޔާ އިއްވަންވާނެ" ކަމަށެވެ.
ޤާނޫނު އަސާސީގައި މިހެން ބަޔާންކޮށްފައިވީ ނަމަވެސް މިއަހަރަށް ރައްޔިތުންގެ މަޖްލިސް ހުޅުވުމަށް ބޭއްވި ޖަލްސާގައި ގައުމުގެ ހާލަތަށް ތަފްސީލުކޮށް ބައްލަވާލައްވާފައެއް ނެތް ކަމަށް ބައެއް ފަރާތްތަކުން ބުނެ އެވެ.
