ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމުން) ނިއުރޭޑިއަންޓް ސްޕޯޓްސް ކްލަބް ސަސްޕެންޑުކުރަން ނިންމި ނިންމުމަކީ ތާކުންތާކު ނުޖެހޭ ޒާތީ ނިންމުމެއް ކަމަށް އެކްލަބުން ބުނެފިއެވެ.

ނިއު އިން ނެރުނު ބަޔާނެއްގައި ބުނީ، އެއްވެސް އިންޒާރު ދިނުމެއް ނެތި، އެފްއޭއެމުން އެ ކްލަބް ސަސްޕެންޑުކުރަން ނިންމި ނިންމުމަކީ ހަރުކަށި، ތާކުންތާކު ނުޖެހޭ ނިންމުމެއް ކަމަށާއި، އެ ނިންމުން ބަލައިނުގަންނާނެ ކަމަށެވެ.

އެފްއޭއެމުން ނިއު ސަސްޕެންޑުކުރީ މިދިޔަ އަހަރުގެ އޯގަސްޓް މަހުން ފެށިގެން ހަމައަށް އެ ކްލަބުގެ ކުޅުންތެރިންނަށް ދޭންޖެހޭ 3.8 މިލިއަން ރުފިޔާއަށްވާ މުސާރަ އާއި އުޖޫރަ ދީފައިނުވާ ކަމަށް ބުނެއެވެ.

އެގޮތުން އެ އިދާރާ އިން ބުނީ، އެފްއޭއެމްގެ ހިންގާ ގަވައިދުގެ 14 ވަނަ މާއްދާ އިން އެފްއޭއެމްގެ ހިންގާ ކޮމިޓީއަށް ލިބިދޭ ބާރުތަކުގެ ތެރެއިން ނިއު އިން މުސާރައިގެ މައްސަލަ ހައްލުކޮށް، އެ ކްލަބުން ދައްކަންހުރި ހުރިހާ ފައިސާ އާއި އުޖޫރަ ދައްކާ ހަލާސްކުރުމާ ހަމަޔަށް އެފްއޭއެމްއިން ހިންގާ ހުރިހާ ކަންކަމުން ސަސްޕެންޑުކުރެވިފައިވާ ކަމަށެވެ.

ނަމަވެސް ނިއު އިން ބުނީ، 2016 ވަނަ އަހަރުން ފެށިގެން އެފްއޭއެމުން އެ ކްލަބަށް ދޭންޖެހޭ ފައިސާ މިއަދާ ހަމަޔަށްވެސް ލިބިފައިނުވާ ކަމަށާއި، މި ފިޔަވަޅަކީ އެފްއޭއެމުން އަމަލުކުރަމުންދާ ގޮތުން ދިވެހި ފުޓުބޯޅައަށް ލިބެމުންދާ އިޔާދަނުކުރެވޭ ގެއްލުންތަކުގެ ސަބަބުން އެ ކްލަބުން އިސްވެ އޮވެ ފުރަތަމަ ޑިވިޝަންގެ އެއް ކްލަބް ފިޔަވައި އެހެން ހުރިހާ ކްލަބަކާއި، ދެވަނަ އަދި ތިންވަނަ ޑިވިޝަނުގެ ގިނަ ކްލަބްތަކެއް ހިމެނޭގޮތަށް އެފްއޭއެމްގެ ކޮންގްރެސްއެއް ބާއްވަން މަސައްކަތްކުރާތީ އެޅި ޒާތީ ފިޔަވަޅެއްކަމަށް ދެކޭ ކަމަށެވެ.

ނިއު އިން ބުނީ މި މަހުގެ 23 ވަނަ ދުވަހު އެފްއޭއެމްގެ ޕްލޭޔާސް ސްޓޭޓަސް ކޮމިޓީއަށް އެ ކްލަބް ހާޒިރުކުރި ކަމަށާއި، އެ ކޮމިޓީން އެދިފައިވަނީ ކުޅުންތެރިންގެ މުސާރަ ނިންމުމަށް ކްލަބުން ޕްލޭން ކޮށްފައިވާ ގޮތާއި، އަދި އޭގެ ތަފްސީލް ކުރިޔަށް އޮތް ހަފްތާ ތެރޭގައި އެފްއޭއެމްއަށް ލިޔުމަކުން އެންގުމަށް ކަމަށެވެ.

މީގެއިތުރުން އެ ބައްދަލުވުމުގައި ކޮމިޓީގެ އޮފިޝަލުން ވަނީ ރާއްޖޭގެ ފުރަތަމަ ޑިވިޝަނުގެ ދެ ކްލަބެއް ފިޔަވާ އެހެން ހުރިހާ ކްލަބަކުންވެސް މުސާރަ ނުދިނުމުގެ މައްސަލަ އެ ކޮމިޓީއަށް ހުށަހެޅިފައިވާ ކަމަށާއި، އޭގެ ތެރޭގައި ނިއުގެ މުސާރައަށްވުރެ ގިނަ ދުވަސްވީ ކްލަބްތަކާއި، ގިނަ ކުޅުންތެރިންގެ މުސާރައިގެ މައްސަލަ ހުރި ކްލަބްތައްވެސް ހިމެނޭކަން ފާހަގަކޮށްފައި ކަމަށެވެ. އަދި ކުޅުންތެރިންނަށް ނުދެވިފައިވާ މުސާރަ ދިނުމަށް ކްލަބުން ކުރަމުންދާ މަސައްކަތް ކޮމިޓީއާ ހިއްސާކުރުމުން، ކޮމިޓީން ވަނީ އެކަމަށް ތައުރީފުކޮށްފައި ކަމަށްވެސް ނިއުއިން ބުނިއެވެ.