އިސްލާމިކް މިނިސްޓަރުގެ މަގާމު އަދާލާތު ޕާޓީއަށް ދިނުމުގެ މަޝްވަރާތަކެއް ކުރިއަށްދާކަމުގެ އަޑުތައް ފެތުރިއްޖެ
15 ނޮވެމްބަރު 2026 | އާދީއްތަ 16:23ސަރުކާރު ހިންގާ ޕީއެންސީއާއެކު އަދާލަތު ޕާޓީން އިއްތިހާދުވުމަށް ނިންމުމާ ގުޅިގެން، އިސްލާމިކް މިނިސްޓަރުގެ މަގާމު އެ ޕާޓީއަށް ދިނުމުގެ މަޝްވަރާތަކެއް ކުރިއަށްދާ ކަމުގެ އަޑުތައް ވަނީ ފެތުރިފައި. ނަމަވެސް ސަރުކާރުގެ ތަރުޖަމާނު ވަނީ މި ވާހަކަތައް ދޮގުކުރައްވައި، އެފަދަ މަޝްވަރާތައް ހިނގަމުން ނުދާކަމަށް ވިދާޅުވެފައި
އިސްލާމިކް މިނިސްޓަރުގެ މަގާމު އަދާލަތު ޕާޓީއަށް ދިނުމުގެ މަޝްވަރާތަކެއް ކުރިއަށްދާ ކަމުގެ އަޑުތައް ވަނީ ފެތުރިފައި | ރާއްޖެއެމްވީ ގްރެފިކްސް
ސަރުކާރު ހިންގާ މައި ޕާޓީ، ޕީޕަލްސް ނޭޝަނަލް ކޮންގްރެސް (ޕީއެންސީ) އާއެކު އަދާލަތު ޕާޓީން އިއްތިހާދުވުމަށް ނިންމާފައިވާ ދަނޑިވަޅެއްގައި، އިސްލާމީ ކަންތައްތަކާ ބެހޭ ވުޒާރާގެ ވަޒީރުކަން އަދާލަތު ޕާޓީއަށް ދިނުމުގެ މަޝްވަރާތަކެއް ކުރިއަށްދާ ކަމުގެ އަޑުތައް ފެތުރިއްޖެ އެވެ.
ރައީސް ޑރ. މުހައްމަދު މުއިއްޒުގެ ސަރުކާރުގައި ބައިވެރިވެ، އެކުގައި މަސައްކަތް ކުރުމަށް ޕީއެންސީން ދިން ދައުވަތު ގަބޫލުކުރުމަށްފަހު، ހިނގަމުން މިދާ ރިޔާސީ ދައުރުގެ ބާކީ އޮތް މުއްދަތުގައި ސަރުކާރާއެކު މަސައްކަތް ކުރުމަށާއި، 2028 ވަނަ އަހަރުގެ ރިޔާސީ އިންތިޚާބުގައި ޕީއެންސީއާއެކު އިއްތިހާދުވުމަށް އަދާލަތު ޕާޓީގެ މަޝްވަރާ މަޖިލީހުން ހޮނިހިރު ދުވަހުގެ ރޭ ވަނީ ގަރާރެއް ފާސްކޮށްފަ އެވެ. މި ނިންމުމާއެކު އަދާލަތު ޕާޓީ ސަރުކާރުގެ ބައިވެރިއެއްގެ ގޮތުގައި މަސައްކަތް ފެށުމަށް ތައްޔާރުވަމުން އަންނައިރު، ކެބިނެޓުން އެ ޕާޓީއަށް ޖާގަ ދިނުމުގެ ގޮތުން އިސްލާމިކް މިނިސްޓަރުގެ މަގާމު ހަމަޖެއްސުމުގެ ވާހަކަތަކެއް ދެކެވިފައިވާ ކަމަށް މި ނޫހަށް ވަނީ މައުލޫމާތު ލިބިފަ އެވެ.
މިފަދަ މަޝްވަރާތަކެއް ކުރިއަށްދާ ކަމުގެ ޚަބަރުތައް ފެންމަތިވެފައި މިވަނީ، ރަސްމާލޭގެ ބޮޑު ބައެއް ދީފައިވާ ޔޫއޭއީގެ އީގަލް ހިލްސް ކުންފުންޏާއެކު ސަރުކާރުން އެއްބަސްވުމެއްގައި ސޮއިކޮށްފިނަމަ، ވަގުތުން މަގާމުން އިސްތިއުފާ ދެއްވުމަށް މިހާރުގެ އިސްލާމީ ކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް އަލީ ސައީދު ނިންމަވާފައިވާ ކަމުގެ އަޑުތަކެއް ވެސް ގަދަވެފައިވާ ދަނޑިވަޅެއްގަ އެވެ.
މި ނޫހަށް އިތުބާރުހުރި މަސްދަރަކުން ކަށަވަރުކޮށްދީފައިވާ ގޮތުގައި، އެ އެއްބަސްވުމުގައި ސޮއިކުރުމާ ދެކޮޅަށް ޑރ. ޝަހީމް ވަނީ އެމަނިކުފާނުގެ ސްޓޭންޑް ސަރުކާރުގެ އިސް ފަރާތްތަކަށް ހާމަކުރައްވާފަ އެވެ.
މީގެއިތުރުން، ޑރ. ޝަހީމް ވެރިކަމަށް ކުރިމަތިލެއްވުމުގެ ޝައުގުވެރިކަން ހުރި ކަމުގެ ވާހަކަތަކެއް ވެސް ވަނީ ފެންމަތިވެފަ އެވެ. އެގޮތުން، މި ވާހަކަތައް އޭނާގެ އަރިސް ބޭފުޅުންނާއި އާއިލާގެ މެންބަރުންނާ ހިއްސާކުރައްވާފައިވާ ކަމަށާއި، ކެމްޕޭނަށް ޚަރަދުކުރާނެ ފަރާތެއް ލިބިއްޖެނަމަ މިހާރު ވެސް ސަރުކާރުން ނުކުމެވަޑައިގަތުމުގެ ވިސްނުން ގެންގުޅުއްވާ ކަމަށް އަޑުފެތުރިފައިވެ އެވެ. ނަމަވެސް، އަމިއްލައަށް ސަރުކާރުގެ މަގާމު ދޫކޮށް ނުކުންނެވުމުގެ ހިތްވަރު ނެތުމުން، އަދާލަތު ޕާޓީގެ ތެރެއިން ވެރިކަމަށް ވާދަކުރެއްވުމުގެ ވިސްނުމެއް ޑރ. ޝަހީމް ގެންގުޅުއްވި ކަމަށް މައުލޫމާތު ލިބެ އެވެ. ސަރުކާރުގެ ތެރެއަށް އަދާލަތު ޕާޓީ ވެއްދުމުގެ މައިގަނޑު އެއް ބޭނުމަކީ ޑރ. ޝަހީމަށް އެ ފުރުސަތު ނުދިނުން ކަމަށް ވެސް މައުލޫމާތު ލިބިފައިވެ އެވެ.
މި ވާހަކަތަކާ ގުޅިގެން ސަރުކާރުގެ ތަރުޖަމާނު މުހައްމަދު ހުސެއިން ޝަރީފް (މުންދު) އާ ރާއްޖެއެމްވީން ސުވާލު ދެންނެވުމުން، އޭނާ ވަނީ މި ވާހަކަތައް މުޅިން ދޮގުކުރައްވާފަ އެވެ. މުންދު ވިދާޅުވީ، އިސްލާމިކް މިނިސްޓަރުގެ މަގާމު އަދާލަތު ޕާޓީއަށް ދިނުމަށް އެއްވެސް މަޝްވަރާއެއް ހިނގަމުން ނުދާ ކަމަށެވެ. އަދި ވަޒީރުންގެ މަގާމަކީ ރައީސުލްޖުމްހޫރިއްޔާ އައްޔަނުކުރައްވާ މަގާމަކަށް ވާތީ، އެކަމުގައި އެހެން ބަޔަކާ މަޝްވަރާކުރަން ނުޖެހޭނެ ކަމަށް ވެސް ވިދާޅުވި އެވެ. މީގެއިތުރުން ޕީއެންސީން އެހެން ޕާޓީއަކާއެކު މަޝްވަރާ ކުރުމަކީ ސީދާ ސަރުކާރުން ކުރާ ކަމެއް ނޫން ކަމަށް ވެސް ތަރުޖަމާނު ފާހަގަކުރެއްވި އެވެ.
