އެފްއޭއެމުން މާޒިޔާގެ ތިން އޮފިޝަލަކަށް ފިޔަވަޅު އަޅައިފި

އެސްޓީއޯ މާލެ ލީގުގެ ދެވަނަ ބުރުގައި އީގަލްސް އަތުން މަޒިޔާ 4-0 އިން ބަލިވި މެޗުގައި ހިނގާދިޔަ ހަމަނުޖެހުންތަކާއި ގުޅިގެން، އެފްއޭއެމުން މާޒިޔާގެ 3 އޮފިޝަލަކަށް ފިޔަވަޅު އަޅައި ކުލަބު ޖޫރިމަނާ ކޮށްފިއެވެ.

ކުޅިވަރުގެ ރޫހާއި ޚިލާފުވުމުން އެފްއޭއެމްގެ ޑިސިޕްލިނަރީ ކޮމިޓީއިން ފިޔަވަޅު އަޅާފައިވާ މާޒިޔާގެ 3 އޮފަޝަލަކީ އެކުލަބުދެ ދެ އެސިސްޓަންސް ކޯޗުން ކަމަށްވާ އަހުމަދު ސުޒެއިރާއި، މުހަންމަދު ސުވެއިދުގެ އިތުރުން މަޒިޔާގެ ވައިސް ޗެއާމަން އަބްދުﷲ މޫސާއެވެ.

އެފްއޭއެމުން ބުނި ގޮތުގައި، އެސިސްޓަންޓް ކޯޗް އަހުމަދު ސުޒައިރަށް ފިޔަވަޅު އަޅަން ނިންމީ، މެޗުގެ 88 ވަނަ މިނެޓުގައި ހަތަރުވަނަ އޮފިޝަލްގެ މޭޒުކައިރިއަށް ގޮސް ރެފްރީއަށް ހަމަލާދީ މަރުގެ އިންޒާރު ދިނުމުގެ އިތުރުން، ދަނޑުން ފޮނުވާލުމުން ދަނޑުގެ ޓަނަލްގައި ހުންނަ ބޯޑުގައި ފައިން ޖަހައި އަދި ރެފްރީންގެ ރޫމުގައި ތިން ފަހަރު ފައިން ޖެހުމުންނެވެ. މި މައްސަލަ ބެލުމަށްފަހު، އެފްއޭއެމުން ވަނީ އޭނާ 12000 ރުފިޔާއިން ޖޫރިމަނާ ކުރުމުގެ އިތުރުން 6 މެޗަށް ސަސްޕެންޑް ކޮށްފައެވެ.

ޑިސިޕްލިނަރީ ކޮމިޓީއިން ބުނެފައިވާ ގޮތުގައި އެސިސްޓަންޓް ކޯޗް މުހަންމަދު ސުވައިދަށް ފިޔަވަޅު އަޅާފައިވަނީ، ހަމަނުޖެހިން ހިނގި ވަގުތު ސުޒެއިރާއި މޫސާ އާއި ބައިވެރިވެ 4 ވަނަ އޮފިޝަލަށް ބަހުގެ ހަމަލާ ދިނުމުން މިކަމަކީ ހަމަނުޖެހުން ހިނގުމަށް ވާގިވެރިވާފަދަ ކަމެއްގެ ގޮތުގައި ބެލުމަށް ފަހުގައެވެ. އަދި މިކަމަކީ ފުރަތަމަ ޑިވިޝަނުގެ އެސިސްޓަންޓް ކޯޗެއްގެ ފަރާތުން ފެންނަން ނުވާފަދަ އަމަލަކަށް ވުމުންނެވެ. މި މައްސަލާގައި ސުވައިދު ވަނީ 3 މެޗަށް ސަސްޕެންޑްކޮށް 300 ރުފިޔާއިން ޖޫރިމަނާކޮށްފައެވެ.

އެފްއޭއެމްގެ ޑިސިޕްލިނަރީ ކޮމިޓީއިން މި މައްސަލަ ބެލުމަށްފަހު އެންމެ ގިދު މުއްދަތަކަށް ސަސްޕެންޑް ކޮށްފައިވަނީ އެކުލަބުގެ ވައިސް ޗެއާމަން އަބްދުﷲ މުސާއެވެ. އޭނާ ވަނީ 6 މަސް ދުވަސް ވަންދެން ދަނޑަށް ނުވަދެވޭގޮތަށް ސަސްޕެންޑް ކޮށްފައެވެ. އެ ކޮމިޓީއިން ބުނެފައިވަނީ މޫސާއަށް ފިޔަވަޅު އަޅާފައިވަނި 4 ވަނަ އޮފިޝަލަށް ބަހުގެ ހަމަލާދިނުމުގެ އިތުރުން ހައްޓަށް ހަމަލާދީ އިންޒާރު ދިނުމުންނާއި، ކުޅިބަލާ މީހެއްގެ ގޮތުގައި ހުރެ ޓެކްނިކަލް އޭރިއާގެ ތެރެއަށް ވަދެ ހަމަނުޖެހުން ހިންގާފައި ވާތީއެވެ.

އެކޮމިޓީއިން ބުނީ، މި މައްސަލާގައި ދިގު މުއްދަތަކަށް މޫސާ ސަސްޕެންޑް ކުރަން ނިންމީ، މޫސަ އަކީ މީގެ ކުރިން ހަމަނުޖެހުން ހިންގައިގެން 3 އަހަރު ދުވަހުގެ ސަސްޕެންޝަނެއް އައިސްފައިވާ ފަރާތަކަށް ވުމުންނާއި، ފުރަތަމަ ޑިވިޝަނުގެ ކުލަބެއްގެ ވައިސް ޗެއާމަނެއްގެ ފަރާތުން އެފަދަ އަމަލުތަކެއް ފެނިގެން ނުވާނެ ކަމަށް އެކޮމިޓީއަށް ގަބޫލުކުރެވޭތީއެވެ.

މާޒިޔާގެ 3 އޮފިޝަލުންނަށް ފިޔަވަޅު އެޅުމުގެ އިތުރުން އެއިދާރާއިން ވަނީ އެކުލަބުވެސް 7000 ރުފިޔާއިން ޖޫރިމަނާކޮށްފައެވެ. އެގޮތުން އެއިދާރާގެ ޑިސިޕްލިނަރީ ކޮމިޓީއިން ބުނީ އެކުލަބު ސަސްޕެންޑް ކުރަން ނިންމީ، އެކުލަބުގެ 3 އޮފިޝަލުންގެ ފަރާތުން ފެނުނު ކުޅިވަރުގެ ރޫހާއި ޚިލާފު ކަންތައްތަކުގައި ކުލަބުގެ ޒިންމާ ބޮޑު ކަމަށް ފެންނާތީ އާއި، ނަމޫނާ ދައްކަން ޖެހޭފަދަ ފަރާތްތަކެއްގެ ފަރާތުން އެފަދަ އަމަލުތަކެއް ފެނިގެން ގޮސްފައި ވާތީއެވެ.

އެފްއޭއެމްގެ ޑިސިޕްލިނަރީ ކޮމިޓީއިން ބުނެފައިވަނީ، މި މައްސަލަ ތަހުގީގު ކުރުމުގައި، މެޗު ރިޕޯޓާއި، ރެފްރީގެ ނަތީޖާ ރިޕޯޓާއި، މެޗުގައި ހިނގައިދިޔަ ހާދިސާގެ ރިޕޯޓާއި، މަޒިޔާއިން މިކަމާ ގުޅިގެން އެއިދާރާއަށް ފޮނުވާފައިވާ ސިޓީ އާއި، މި މައްސަލާގައި ފިޔަވަޅު އަޅާފައިވާ 3 އޮފިޝަލުން ކަމަށްވާ ސުޒެއިރާއި، މޫސަ އަދި ސުވެއިދު މި މައްސަލައާއި ގުޅިގެން އެއިދާރާއަށް ފޮނުވާފައިވާ ސިޓީ އާއި، 2012 ވަނަ އަހަރި އެކުލަވާލި އެއިދާރާގެ ކޯޑް އޮފް ކޮންޑަކްޓަށް ބަލާފައި ވާނެކަމަށެވެ.

މިކަމާ ގުޅިގެން މަޒިޔާއިން އަދި ވަކި އެއްޗެއް ހާމަކޮށްފައެއް ނުވެއެވެ.