ގައުމީ އަންހެން ފުޓުބޯޅަ ޓީމަށް ކުޅުންތެރިން ހޯދުމަށް ފުޓުބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިން ފުޓްސަލް މުބާރާތެއް ބޭއްވުމަށް ހަމަޖެހިފައިވާ ކަމަށް އެ އިދާރާގެ ނައިބު ރައީސާ އައިޝަތު ނާޒިމާ ވިދާޅުވެއްޖެ އެވެ.
ހުނަރުވެރި ޒުވާން ކުޅުންތެރިން ހޯދުމުގެ ބޭނުމުގައި އެފްއޭއެމުން ރާވާ މި މުބާރާތް ޖުލައި މަހު ފެށުމަށް ތައްޔާރުވަމުންދާއިރު، މި މުބާރާތުގައި ފުރަތަމަ ބައިވެރިވުމަށް ހުށަހަޅާ 15 ޓީމަކަށް ފުރުސަރު ދެވޭނެ ކަމަށް އެފްއޭއެމުން ބުނެ އެވެ.
ރާއްޖެޓީވީގެ ކުޅިވަރު ފައިލް ޕްރޮގްރާމުގައި ވާހަކަ ދައްކަވަމުން ނާޒިމާ ވިދާޅުވީ އަންހެން ކުޅުންތެރިންނަށް އަމާޒުކޮށްގެން ބޭއްވުމަށް ހަމަޖެހިފައިވާ ފުޓްސަލް މުބާރާތަކީ ރާއްޖޭގެ ގައުމީ އަންހެން ފުޓުބޯޅަ ޓީމަށް ހުނަރުވެރި ކުޅުންތެރިން ހޯދުމުގެ މަގުސަދުގައި ކުރިއަށް ގެންދިއުމަށް ނިންމާފައިވާ މުބާރާތެއް ކަމަށެވެ. އެގޮތުން މި މުބާރާތުގައި ބައިވެރިވުމުގެ ފުރުސަތު މި މަހުގެ މެދު ތެރޭގައި ހުޅުވާލާނެ ކަމަށް ވެސް ނާޒިމާ ވިދާޅުވި އެވެ.
ނާޒިމާ އިތުރަށް ވިދާޅުވީ އަންހެން ފުޓުބޯޅަ ޑިވޮލޮޕް ކުރުމަށް ކުރިއަށް ގެންދާ މި މުބާރާތުގެ ސަބަބުން އަތޮޅު ތެރެއިންނާއި މާލެ އިންވެސް މޮޅު ކުޅުންތެރިންތަކެއް ފެނިގެންދާނެ ކަމަށާއި އޭގެ ތެރެއިން ރަނގަޅު ކުޅުންތެރިން ހޮވުމަށްފަހު ގައުމީ ޓީމުން ޖާގަ ދެވިގެންދާނެ ކަމަށެވެ.
ނާޒިމާ ވިދާޅުވީ މި މުބާރާތަކީ ހަމައެކަނި ރާއްޖޭގެ ކުޅުންތެރިންނަށް އަމާޒުކުރެވިގެން ކުރިއަށްގެންދާ މުބާރާތެއް ކަމުން ބިދޭސީ އެއްވެސް ކުޅުންތެރިއަކަށް މި މުބާރާތުގައި ބައިވެރި ނުވެވޭނެ ކަމަށެވެ.
މިވަގުތު ގައުމީ ޓީމުގައި ހިމެނޭ ކުޅުންތެރިންނަށް ވެސް މުބާރާތުގައި ވާދަކުރެވޭނެކަން ފާހަގަ ކުރަމުން ނާޒިމާ ވިދާޅުވީ ކޮންމެ ޓީމަކަށް ވެސް ތިން ކުޅުންތެރިންނަށް ކުޅުމުގެ ހުއްދަ ލިބިގެންދާނެ ކަމަށާއި އެހެން ނަމަވެސް މެޗެއް ހިނގަމުންދާ ވަގުތު އެއްފަހަރާ ދަނޑުމަތީގައި ހަރަކާތްތެރި ވެވޭނީ ދެ ކުޅުންތެރިންނަށް ކަމަށެވެ.
ނާޒިމާ ވިދާޅުވީ މި މުބާރާތުގެ ސަބަބުން ގިނަ ކުޅުންތެރިންތަކަކަށް ކުޅުމުގެ ފުރުސަތު ލިބިގެންދާނެ ކަމަށާއި އަދި އެކަމުގެ ސަބަބުން ގައުމީ އަންހެން ޓީމަށް ވެސް އެކަމުގެ ފައިދާ ލިބިގެންދާނެ ކަމަށެވެ.
ގައުމީ އަންހެން ޓީމަށް ކޯޗެއް ހަމަޖެއްސުމުގެ މަސައްކަތް އެފްއޭއެމުން ކުރަމުން އަންނަ އިރު، ނާޒިމާ ވިދާޅުވީ މި މަސް ތެރޭގައި ޓީމާ ހަވާލުވާ ކޯޗު އިއުލާން ކުރެވިގެންދާނެ ކަމަށެވެ.
