ޕާފޯމެންސް މެދު ހިތްހަމަނުޖެހޭ ކަމަށް ބުނެ ނިއުގެ ކޯޗު މަގާމުން ވަކިކޮށްފި

ޕާފޯމެންސްއާ މެދު ހިތްހަމަ ނުޖެހޭ ކަމަށްބުނެ ނިއުރޭޑިއަންޓް ސްޕޯޓްސް ކްލަބްގެ ކޯޗު ބެނާޑޯ ޓަވަރޭޒް މަގާމުން ވަކިކޮށްފި އެވެ.

ނިއުގެ ޖެނެރަލް ސެކެޓްރީ އަހުމަދު ނިޔާޒް މޫސާ (ޓެޑް) ވިދާޅުވީ، ނިއުގެ ކޯޗުކަމުން ޓަވަރޭޒް ވަކިކުރަން މެނޭޖްމަންޓުން ނިންމާފައިވާ ކަމަށާއި، އާ ކޯޗެއް ހޯދުމުގެ މަސައްކަތް ނިއު އިން ފަށާފައިވާ ކަމަށެވެ. އެގޮތުން އޭނާ ވިދާޅުވީ، ކުރިޔަށް އޮތް ދުވަސްތަކުގައި އާ ކޯޗު އިއުލާންކުރެވިގެންދާނެ ކަމަށާއި، ބޭރު ކޯޗެއް ނުވަތަ ދިވެހި ކޯޗެއްވެސް ފެނިދާނެ ކަމަށެވެ.

ޓެޑް ވިދާޅުވީ، ނިއުގެ ކޯޗު މަގާމުން ވަކިކުރެވިފައިވަނީ ކްލަބް މެނެޖޭމަންޓުން އެދޭފަދަ ޕާފޯމެންސެއް ކޯޗުގެ ފަރާތުން ނުފެންނާތީ ކަމަށެވެ.

ޓަވަރޭޒްއަށް ފާޑުކިޔުންތައް އަމާޒުވެފައިވަނީ ގްރީން ސްޓްރީޓް އަތުން 0-3 ގެ ނަތީޖާއިން ނިއު ބަލިވި މެޗަށްފަހު އެވެ. އޭނާ އަކީ 2012 ވަނަ އަހަރަށްފަހު ނިއު އަށް ހަމަޖެއްސި 12 ވަނަ ކޯޗެވެ.

ނިއު މި ސީޒަނުގައި ކުޅުނު 10 މެޗުގެ ތެރެއިން ހަތް މެޗުން މޮޅުވެފައިވާއިރު، ބާކީ ހަތަރު މެޗުން އެޓީމު ވަނީ ބަލިވެފައެވެ.