ފެނަކައިގެ ކުރީގެ އެމްޑީ ސައީދުގެ ކިބައިން މަޑަވެލީ ދާއިރާގެ ކުރީގެ މެންބަރު ފިރުޝާން މާފަށް އެދިވަޑައިގެންފި
17 ނޮވެމްބަރު 2026 | އަންގާރަ 03:09ފެނަކައިގެ ކުރީގެ އެމްޑީ އަހުމަދު ސައީދާ ގުޅޭގޮތުން ހަގީގަތާ ޚިލާފު ވާހަކަތަކެއް ދެއްކެވުނު ކަމަށް އިއުތިރާފުވެ، މަޑަވެލީ ދާއިރާގެ ކުރީގެ މެންބަރު ހުސެއިން ފިރުޝާން އޭނާގެ ކިބައިން މައާފަށް އެދިވަޑައިގެންފި. ސައީދު މަސައްކަތް ކުރެއްވީ އިޚްލާސްތެރިކަމާއެކު ރައްޔިތުންގެ ލާބައަށް ކަމަށް ފާހަގަކުރައްވައި، ފިރުޝާން ވަނީ އޭނާގެ ޚިދުމަތްތަކަށް ޝުކުރު އަދާކުރައްވާފައި


ފެނަކަ ކޯޕަރޭޝަންގެ ކުރީގެ އެމްޑީ އަހުމަދު ސައީދު މުހައްމަދު އަދި މަޑަވެލީ ދާއިރާގެ ކުރީގެ މެންބަރު ހުސެއިން ފިރުޝާން | ރާއްޖެއެމްވީ ގްރެފިކްސް
ފެނަކަ ކޯޕަރޭޝަންގެ ކުރީގެ މެނޭޖިން ޑިރެކްޓަރު އަހުމަދު ސައީދު މުހައްމަދާ ގުޅޭގޮތުން މީގެ ކުރިން ދައްކަވާފައިވާ ވާހަކަތަކަށްޓަކައި، ރައްޔިތުންގެ މަޖިލީހުގެ މަޑަވެލީ ދާއިރާގެ ކުރީގެ މެންބަރު ހުސެއިން ފިރުޝާން ސައީދުއާއި އޭނާގެ އާއިލާގެ ކިބައިން މާފަށް އެދިވަޑައިގެންފި އެވެ.
ފިރުޝާން އޭނާގެ އެކްސްގައި ކުރެއްވި ޕޯސްޓެއްގައި ވިދާޅުވީ، ފެނަކައިގެ ކުރީގެ އެމްޑީ ސައީދުއާ ގުޅޭގޮތުން އެކިއެކި މާހައުލުތަކުގައި ރާއްޖޭގެ ރައްޔިތުންނަށް ހަގީގަތް އޮޅޭގޮތަށް ޖަޒުބާތުގައި ވާހަކަދެއްކެވިފައިވާ ކަމަށެވެ. އެހެންކަމުން އެންމެހާ ވާހަކަތަކަށް ރާއްޖޭގެ ރައްޔިތުންގެ ކިބައިން އަދި ސައީދުއާއި އޭނާގެ އާއިލާގެ ކިބައިން ނިހާޔަތަށް މައާފަށް އެދިވަޑައިގަންނަވާ ކަމަށް ފިރުޝާން ވިދާޅުވި އެވެ.
މީގެ ކުރިން މަޖިލީހުގަޔާއި އެކިއެކި ޕްލެޓްފޯމްތަކުގައި ސައީދަށް ވަރަށް ބޮޑަށް ފާޑުވިދާޅުވެފައިވާ ފިރުޝާން މިހާރު ގަބޫލުކުރައްވާ ގޮތުގައި، ސައީދު މަސައްކަތް ކުރެއްވީ އިޚްލާސްތެރިކަމާއެކުގަ އެވެ.
އެގޮތުން ފިރުޝާން ވިދާޅުވީ، ކުރިމަތިވި ގިނަގުނަ ގޮންޖެހުންތަކާއެކު ވެސް ސައީދު ފެނަކައިގެ މަސްއޫލިއްޔަތުތައް އަދާކުރައްވާފައިވަނީ އިޚްލާސްތެރި ނިޔަތަކާއެކު ތެދުވެރިކަމާއި އަމާނާތްތެރިކަމާއެކު ކަމަށެވެ. އަދި އެއީ ރައްޔިތުންގެ ހެވާއި ލާބަޔަށާއި، ޒަމާންތަކަކަށް ރައްޔިތުން ތަހައްމަލްކުރަމުންދިޔަ ތަކުލީފުތަކަށް ޒަމާނާ އެކަށީގެންވާ ފެންވަރު ރަނގަޅު ހަރުދަނާ ނިޒާމެއްގެ ތެރެއިން ދާއިމީ ހައްލެއް ހޯދައިދިނުމަށް ކަމަށް މިއަދު ހިތުގެ އަޑިން ގަބޫލުކުރައްވާ ކަމަށް ވެސް އޭނާ ފާހަގަކުރެއްވި އެވެ.
މީގެއިތުރުން، ރާއްޖޭގެ އެކިކަންކޮޅުތަކަށް އަސާސީ ޚިދުމަތްތައް ހަރުދަނާކަމާއެކު ފޯރުކޮށްދިނުމަށްޓަކައި ސައީދު ކޮށްދެއްވާފައިވާ އަގުނުކުރެވޭނެ ފަދަ ޚިދުމަތްތަކަށް ހިތުގެ ޚާލިސްކަމާއެކު ޝުކުރު އަދާކުރައްވާ ކަމަށް ވެސް ފިރުޝާން ވަނީ ވިދާޅުވެފަ އެވެ.
މީގެކުރިން ތަފާތު އެކި ތަންތަނުގައި، ސައީދަށް އަމާޒުކުރައްވައި ފިރުޝާން ވަނީ ފާޑުވިދާޅުވެފަ އެވެ.
ފެނަކައިގެ ކުރީގެ އެމްޑީ ސައީދުގެ މައްޗަށް ދާދިފަހުން ވަނީ މަގާމުގެ ނުފޫޒު ބޭނުންކުރުމުގެ ކުށް ސާބިތުވާ ކަމަށް ބުނެ، ޖަލު ހުކުމެއް އައިސްފަ އެވެ. އެ މައްސަލައަކީ ސައީދު އެ ކުންފުނީގެ އެމްޑީ ކަމާ ހަވާލުވެވަޑައިގަތުމުގެ ކުރިން ހިނގާފައިވާ މުއާމަލާތަކާ ގުޅިގެން، ދައުލަތަށް އެންމެ ފައިދާވާ ގޮތަށް ވަކީލުންގެ ލަފަޔާއެކު ހެދި ސެޓަލްމެންޓް އެގްރީމަންޓަކާ ގުޅިގެން ކޮށްފައިވާ ދައުވާއެކެވެ. ސައީދު ވަނީ 4 އަހަރަށް ޖަލަށްލުމަށް ހުކުމްކޮށްފަ އެވެ. އަދި މި މައްސަލައިގައި ދޭންޖެހޭ އަދަބަށްވުރެ ބޮޑު އަދަބެއް ކަނޑައަޅާފައިވާކަމަށް ބުނެ އެކަމާ މެދު އެކި ފަރާތްތަކުން ކަންބޮޑުވުން ފާޅުކޮށްފައިވެ އެވެ.










