މާލޭގެ އަލިކަމުން ފެށިގެން ބަނޑޮސް ރިސޯޓާ ހަމައަށް: އަހުމަދު އާދަމްގެ ބަޔޮގްރަފީ ފޮތް ނެރެފި
14 ނޮވެމްބަރު 2026 | ހޮނިހިރު 13:43ރާއްޖޭގެ ފުރަތަމަ މެރިން އިންޖިނިއަރު އަހުމަދު އާދަމަކީ މަސްދޯނިފަހަރު އިންޖީނު އެޅުމާއި، އެމްޓީސީސީ އުފެއްދުމުގެ އިތުރުން ފަތުރުވެރިކަމާއި އުމްރާނީ ތަރައްގީގައި ތާރީޚީ މުހިންމު މަސައްކަތްތަކެއް ކުރެއްވި ބޭފުޅެއް. މާލޭގެ ކަރަންޓާއި ޓީވީގެ ޚިދުމަތް ގާއިމުކުރުމުގައި އިސް ދައުރެއް އަދާކުރެއްވި މި އިއްޒަތްތެރިޔާގެ ހަޔާތްޕުޅުގެ މައްޗަށް ނެރުނު ފޮތަކީ ގައުމީ ޚިދުމަތުގެ އަގުހުރި މައުލޫމާތުތަކެއް އަންނަން އޮތް ޖީލުތަކަށް ފޯރުކޮށްދޭނެ ފޮތެއް.
ރާއްޖޭގެ ތަރައްގީއާއި އުމްރާނީ ކުރިއެރުމުގައި ތާރީޚީ ހިދުމަތްތަކެއް ކުރައްވާފައިވާ، ނިޝާން އިއްޒުދީންގެ އިއްޒަތުގެ ވެރިޔާ އަހުމަދު އާދަމްގެ ހަޔާތްޕުޅުގެ މައްޗަށް ލިޔެފައިވާ ބަޔޮގްރަފީ ފޮތް ނެރުން | ރާއްޖެއެމްވީ
ރާއްޖޭގެ ތަރައްގީއާއި އުމްރާނީ ކުރިއެރުމުގައި ތާރީޚީ ހިދުމަތްތަކެއް ކުރައްވާފައިވާ، ނިޝާން އިއްޒުދީންގެ އިއްޒަތުގެ ވެރިޔާ އަހުމަދު އާދަމްގެ ހަޔާތްޕުޅުގެ މައްޗަށް ލިޔެފައިވާ ބަޔޮގްރަފީ ފޮތް ރަސްމީކޮށް ނެރެފި އެވެ.
ހޮނިހިރު ދުވަހު ބޭއްވި ރަސްމިއްޔާތެއްގައި މި ފޮތް ނެރެދެއްވީ ނިޝާން އިއްޒުއްދީނުގެ އިއްޒަތުގެ ވެރިޔާ، އަދި ކުރީގެ ރައީސް މައުމޫންގެ ދައުރުގެ ހޯމް މިނިސްޓަރު އަބްދުﷲ ކަމާލުއްދީން އެވެ.
އަހުމަދު އާދަމް އަކީ ރާއްޖޭގައި ޝަރުތު ހަމަވި ފުރަތަމަ ދިވެހި މެރިން އިންޖިނިއަރެވެ. އޭނާ ވަނީ މާލޭ އިންޖީނުގޭގެ މެނޭޖަރުކަން ކުރައްވައި، މާލޭގެ މަގުމަތީ ކަރަންޓު ނަރުތައް ޒަމާނީ ކުރުމުގެ މަސައްކަތުގައި އިސް މޭސްތިރިއެއްގެ ދައުރު އަދާކުރައްވާފަ އެވެ. މީގެ އިތުރުން، ވީޓީސީގެ ބާނީއަކީ ވެސް އަދި ޓީވީ މޯލްޑިވްސްގެ އެންޓަނާ ބެހެއްޓުމުގެ މަސައްކަތުގެ ސަރުދާރަކީ ވެސް އޭނާ އެވެ.
ރާއްޖޭގެ މަސްވެރިކަމާއި ދަތުރުފަތުރުގެ ދާއިރާއަށް އިންގިލާބީ ބަދަލުތަކެއް ގެނައުމުގައި އަހުމަދު އާދަމްގެ ހިއްސާ ނުހަނު ބޮޑެވެ. އެގޮތުން ދިވެހި މަސްދޯނިފަހަރުގައި އިންޖީނު އެޅުމުގެ މަޝްރޫއު ރޭއްވެވުމާއި، އަތޮޅުތަކުގައި ޔަންމާ ރިޕެއަރ ސެންޓަރުތައް ތައާރަފުކޮށް ހިންގެވުމުގައި އޭނާ އިސްކޮށް ހަރަކާތްތެރިވެވަޑައިގެންނެވި އެވެ. އަދި އެމްޓީސީސީގެ ފުރަތަމަ މެނޭޖިންގ ޑިރެކްޓަރުކަން ކުރެއްވުމުގެ އިތުރުން، މާލޭ ތިލައިގެ ބާނީއަކީވެސް އަހުމަދު އާދަމް އެވެ.
ފަތުރުވެރިކަމާއި ކަނޑުފަޅުގެ މަސައްކަތްތަކަށް ބަލާއިރު، ރާއްޖޭގައި ރިޒޯޓު އިމާރާތް ކުރުމުގެ އާރުކާޓީއެއްގެ ގޮތުގައި މަސައްކަތް ކުރެއްވި އަހުމަދު އާދަމް އަކީ ބަނޑޮސް ރިސޯޓުގެ ފުރަތަމަ މެނޭޖަރެވެ. ހަމައެހެންމެ، ފުނަށް ފީނި ފުރަތަމަ ދިވެހި ޒުވާނާގެ ޝަރަފު ހޯއްދަވާފައިވާ އޭނާއަކީ، ދިއްފުށިމާދޫ ފުންކުރުމުގެ މަސައްކަތުގެ ވެސް މޭސްތިރި އެވެ. ހޮނިހިރު ދުވަހު ނެރުނު މި ބަޔޮގްރަފީ ފޮތަކީ ގައުމީ ހިދުމަތުގައި އަހުމަދު އާދަމް ކުރެއްވި މިފަދަ އަގުހުރި މަސައްކަތްޕުޅުތަކުގެ ތަފްސީލު އަންނަން އޮތް ޖީލުތަކަށް ގެނެސްދޭނެ މުހިންމު ތާރީޚީ ފޮތެކެވެ.
ރާއްޖޭގެ ތާރީޚު ދުށް އެންމެ ކާމިޔާބު އަދި އެންމެ މަޝްހޫރު އެއް އިންޖިނިއަރުގެ ގޮތުގައި ގިނަ ބަޔަކު ބަލައިގަންނަ އަހުމަދު އާދަމް އަކީ، ގައުމުގެ ޒަމާނީ އުމްރާނީ ތަރައްގީގެ ބިންގާ އެޅުއްވުމުގައި އަގުނުކުރެވޭ ފަދަ ބޮޑެތި ޚިދުމަތްތަކެއް ކުރެއްވި ބޭފުޅެކެވެ. ނިޝާން އިއްޒުދީންގެ އިއްޒަތުގެ ވެރިކަމުގެ ޝަރަފުވެސް އަރުވާފައިވާ އަހުމަދު އާދަމް ފަދަ ދާއިރާގެ އެންމެ އިސް އެއް ބާނީއަށް، ރައީސުލްޖުމްހޫރިއްޔާ ޑރ. މުހައްމަދު މުއިއްޒު ދާދި ފަހުން އިންޖިނިއަރުންނަށް ދެއްވި އެވޯޑު ލިބިވަޑައިގެންފައި ނުވުމަކީ ގިނަ ބަޔަކު ކަންބޮޑުވުމާއެކު ފާހަގަކުރާ ކަމެކެވެ.
