މާލީގައި އދގެ ސުލްހަ ބަލަހައްޓާ ފައުޖުގެ 10 މީހުން މަރާލައިފި
21 ޖެނުއަރީ 2019 | ހޯމަ 07:49ހަމަލާގައި އިތުރު 25 މީހަކު ޒަޚަމްވި
އދގެ ސުލްހަ ބަލަހައްޓާ ފައުޖުން މާލީގައި މަސައްކަތް ފަށާފައިވަނީ 2013 ވަނަ އަހަރުން ފެށިގެން
މާލީގެ އުތުރުގަައި މަސައްކަތްކުރަމުންދާ އދގެ ސުލްހަ ބަލަހައްޓާ ފައުޖަށް އަމާޒުކޮށް ދިން ހަމަލާއެއްގައި އެ ފައުޖުގައި ހިމެނޭ ޗާޑުގެ ސިފައިންގެ 10 މީހަކު މަރުވެ އިތުރު 25 މީހަކު ޒަޚަމްވެެއްްޖެ ކަމަށް އެ އިދާރާއިން ބުނެފިއެވެ.
އަލްޤައިދާ އިން އިސްލާމިކް މަޤްރިބް (އޭކިއުއައިއެމް) އިން މޮރިޓޭނިއާގެ އަލް އަޚްބަރު ނޫސް އެޖެންސީއަށް ފޮނުވާފައިވާ ބަޔާނެއްގައި މި ހަމަލާގެ ޒިންމާ ނަގާކަމަށް ބުނެފައިވެއެވެ. އެ ޖަމާއަތުން މި ހަމަލާދީފައި ވަނީ އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ ޗާޑަށް ކުރައްވާ ދަތުރުފުޅުގެ ރައްދެއްގެ ގޮތުންކަމަށެވެ.
މި ހަމަލާ ކުށްވެރިކުރައްވައި އދގެ ސެކްރެޓަރީ ޖެނެރަލް އެންޓޯނިއޯ ގުޓަރެސް ވިދާޅުވީ އެ ހަމަލާގެ ފަހަތުގައި ގިނަ ކަންކަމެއް އެކުލެވިގެންވާނެ ކަމަށެވެ. މާލީގެ އުތުރުގައި އަލްޖީރިއާގެ ސަރަހައްދީ ރޮނގާއި ކައިރީގައި އޮންނަ ކިޑަލްގެ އެއިގެލޮކް ކޭމްޕްގައި ދިން މި ހަމަލާގެ ފަހަތުގައިވާ ފަރާތްތައް އިންސާފުގެ ކުރި މައްޗަށް ގެންދިއުމަށްވެސް ގުޓަރެސްވަނީ ގޮވާލައްވާފައެވެ.
އެ ސަރަހައްދުގައި ދިރިއުޅޭ މީހުން ބުނެފައިވާގޮތުގައި ހަމަލާ ދިން މީހުން އެތަނަށް ގޮސްފައިވަނީ ސައިކަލްތަކެއްގައެވެ
ދި ޔުނައިޓެޑް ނޭޝަންސް މަލްޓިޑައިމެންޝަނަލް އިންޓަރގްރޭޓެޑް ސްޓެބިލައިޒޭޝަން މިޝަން އިން މާލީ(މިނުސްމާ)އިންވަނީ ހަނގުރާމަވެރިންނަށް އަވަސް ރައްދު ހަމަލާއެއް ދިނުމަށްފަހު އެތައް ބަޔަކު މަރާލާފައިވާކަމަށް އދގެ ތަރުޖަމާނު ވިދާޅުވިއެވެ.
