މޯލްޑިވްސް ރިޓަޔަރމަންޓް ޕެންޝަން ސްކީމުން ނަގަމުން ގެންދާ އެޑްމިނިސްޓްރޭޓިވް ފީ ކުޑަކޮށްފި އެވެ.

ފެންޝަން އޮފީހުން ބުނީ، ދިވެހިރާއްޖޭގެ ޕެންޝަނާބެހޭ ޤާނޫނުގެ ދަށުން ގާއިމް ކޮށްފައިވާ މޯލްޑިވްސް ރިޓަޔަރމަންޓް ޕެންޝަން ސްކީމް (އެމްއާރްޕީއެސް) އަކީ މި ސްކީމުގެ ބައިވެރިންގެ އަތުން މެނޭޖްމަންޓް ފީއެއް ނަގައިގެން ހިންގާ ގޮތަށް ހަމަޖެހިފައިވާ ސްކީމެއް ކަމަށެވެ. ޕެންޝަނާބެހޭ ޤާނޫނުގެ 6 ވަނަ މާއްދާގެ (ރ) އިން ބާރު ލިބިގެން އެމްއާރްޕީއެސް ހިންގުމަށްޓަކައި ސްކީމުގެ ބައިވެރިންގެ އަތުން ނެގޭ އެޑްމިނިސްޓްރޭޓިވް ފީ އެއްގެ ގޮތުގައި 31 ޑިސެންބަރު 2014 ގެ ނިޔަލަށް ނަގާފައި ވަނީ ކޮންމެ އަހަރަކު އެބައިވެރިއެއްގެ ރިޓަޔަރމަންޓް ސޭވިންގްސް އެކައުންޓްގައި ހުރި ޖުމްލަ ޢަދަދުގެ %1 ކަމަށް ޕެންޝަން އޮފީހުން ބުންޏެވެ.

ފެންޝަން އޮފީހުން ބުނީ މި ޢަދަދު 01 ޖެނުއަރީ 2015 އިން ފެށިގެން %0.9 އަށް ކުޑަކުރުމަށް ފަހު، 01 ޖެނުއަރީ 2017 އިން ފެށިގެން %0.8 އަށް ކުޑަކުރުމަށް އެ އޮފީހުގެ ބޯޑުން މިހާރުވަނީ ނިންމާފަ ކަމަށެވެ.

އެމްއާރްޕީއެސް ގެ ބައިވެރިންގެ އަތުން ނެގޭ މިފީއަކީ ޕެންޝަން އޮފީސް ހިންގުމަށާއި، ކަސްޓޯޑިއަންގެ ފީ އަށާއި، އަދި މި ސްކީމް ހިންގުމުގެ ނިޒާމަށް ގެންނަންޖެހޭ ތަރައްޤީ ގެނައުމަށް ކުރަންޖެހޭ ޚަރަދުތައް ހަމަޖެއްސުމަށް ނެގޭ ފީއެއް ކަމަށް އެ އޮފީހުން ބުންޏެވެ. މިފީއަކީ އަހަރަކު އެއްފަހަރު މުރާޖަޢާ ކުރަމުން އަންނަ ފީއަކަށް ވުމާއިއެކު، ކުރިއަށްއޮތް ތަނުގައިވެސް މިފީއަށް ބަދަލު ގެންނަން ޖެހިއްޖެ ހިނދެއްގައި ބަދަލު ގެނެވޭނެ ކަމަށްވެސް ޕެންޝަން އޮފީހުން ބުންޏެވެ.