ލ ގަމުގެ ބަނދަރުގެ މަޝްރޫއުން ދޭހަވަނީ ސަރުކާރުން ވަކި ސިޔާސީ ފިކުރަކަށް ނުބަލާކަން:މުއިއްޒު
މިއަހަރުގެ ބަޖެޓުގާ 2.6 ބިލިއަން ރުފިޔާ ވަނީ ރަށްރަށުގެ ބަނދަރާއި މަގު ހެދުމަށް ކަނޑާއަޅާފަ
ލ.ގަން ބަނދަރު ބޮޑުކުރުމުގެ މަސައްކަތް ކުރަނީ
ލ ގަމުގެ ބަނދަރުގެ މަޝްރޫއު ކުރިއަށްދާކަމީ ރައީސް ޔާމީން ސަރުކާރުން ސިޔާސީ ވަކި ފިކުރަކަށް ނުބަލާކަން ކަމަށް ހައުސިިން މިނިސްޓަރ ޑރ މުހައްމަދު މުއިއްޒު ވިދާޅުވެއްޖެ އެވެ.
ރައްޔިތުންގެ މަޖިލީހުގެ ގަމު ދާއިރާ ތަމްސީލްކުރައްވަނީ އެމްޑީޕީގެ މެމްބަރު ފައްޔާޒު އިސްމާއީލެވެ.އެހެންވެ، މުއިއްޒު ވިދާޅުވީ ގަމު ބަނދަރު ތަރައްގީކުރުމަކީ ސަރުކާރުން ވަކި ފިކުރަކަށް ނުބަލާކަމުގެ ވަރުގަދަ ދަލީލެއް ކަމަށެވެ.
ހައުސިން މިނިސްޓަރ ކުރައްވާފައިވާ ޓްވީޓެއްގައިވާ ގޮތުން، ސަރުކާރުން މަސައްކަތް ކުރަނީ ރައްޔިތުންގެ ތަރައްގީއަށް މަސައްކަތް ކުރުމަށް ކަމަށާއި ގަމުގެ ބަނދަރުގެ މަސައްކަތް ކުރިއަށްދާ ދިއުމުން ހާމަކޮށްދެނީ ސަރުކާރުން ސިޔާސީ ފިކުރަށް ބެލުމެއް ނެތި ރައްޔިތުންނަށް ތަރައްގީ ފޯރުކޮށްދިނުމަށް ކުރާ މަސައްކަތް ކަމަށެވެ.
ހައުސިން މިނިސްޓަރ ލ.ގަމުގެ ބަނދަރުގެ މަސައްކަތް ފާހަަގަކޮށް ވާހަކަފުޅުދައްކާފައިވާ އިރު ސަރުކާރުން މިއަހަރުވެސް ގިނަ ރަށްތަކެއްގެ ބަނދަރުގެ މަސައްކަތް ވަނީ ސަރުކާރުގެ ބަޖެޓުގައި ޖަހާފަ އެވެ. އެގޮތުން ތ. މަޑިފުއްޓާ، ފ ނިލަންދޫ އާއި ބ.ތުޅާދޫގެ އިތުރުން ށ.ކަނޑިތީމުގެ ބަނދަރުގެ އިތުރުން ކ.ގާފަރުގެ ބަނދަރުގެ މަޝްރޫއު ހިމެނެ އެވެ.
މި މަޝްރޫއު ތަކަކީ މިހާރުވެސް އަމަލީ މަސައްކަތް ހިނގަމުންދާ މަޝްރޫއުތަކެވެ.
ސަރުކާރުން ޕަބްލިކް ސެކްޓަރ އިންވެސްޓްމެންޓް ޕްރޮގްރާމް (ޕީއެސްއައިޕީ) މަޝްރޫއުތަކަށް މިއަހަރުގެ ބަޖެޓުގައި 7.9 ބިލިއަން ރުފިޔާ ކަނޑައަޅާފައިވާ އިރު 2.6 ބިލިއަން ރުފިޔާ ވަނީ ރަށްރަށުގެ ބަނދަރާއި މަގު ހެދުމަށް ކަނޑާއަޅާފަ އެވެ.
2017 ވަނަ އަހަރަށް ސަރުކާރުން ފާސްކޮށްފައުވަނީ 26.8 ބިލިއަން ރުފިޔާގެ ބަޖެޓެކެވެ.
