އެޕާޓްމަންޓް ކުއްޔަށް ދޭނެ ކަމަށްބުނެ ބޮޑެތި އަދުދުތަކުން ފައިސާ ނަގަމުންދާ މައްސަލަތައް އިތުރުވެއްޖެ: ޕޮލިސް
މިދިއަ އަހަރު އެފަދަ 23 މައްސަލަ ހުށަހަޅާފައިވޭ
ޚިޔާނާތުގެ މައްސަލަތަކަށް ހޭލުންތެރިކުރުވުމުގެ ގޮތުން ކުރިއަށް ގެންދާ ކެމްޕެއިންތަކުގައި ބޭނުންކުރުމަށް ނަގާފައިވާ ފޮޓޯއެއް--
އެޕާޓްމަންޓު ކުއްޔަށް ދޭނެ ކަމަށް ބުނެ ބައެއް ފަރާތްތަކުން މަކަރާއި ހީލަތުން ބޮޑެތި އަދަދުތަކުން އެޑްވާންސްއަށް ފައިސާ އަތުލުމަށްފަހު ތަން ހަވާލުނުކޮށް ފިލާ މައްސަލަތައް އިތުރުވެފައިވާ ކަމަށާއި އެކަންކަމުން ރައްޔިތުން ސަމާލުވުމަށް ފުލުހުން އިލްތިމާސް ކޮށްފި އެވެ.
މޯލްޑިވްސް ޕޮލިސް ސަރވިސްއަށް ހުށަހެޅިފައިވާ މިފަދަ މައްސަލަތަކުގެ ތަފާސް ހިސާބަށް ބަލާއިރު 2014 ވަނަ އަހަރު މިފަދަ ތިން މައްސަލައަކާއި 2015 ވަނަ އަހަރު 15 މައްސަލަ އަދި 2016 ވަނަ އަހަރު 23 މައްސަލައެއް ފުލުހުން ވަނީ ތަހުގީގުކޮށްފައިވެ އެވެ.
މިފަދަ މައްސަލަތައް ހިނގާފައި ހުންނަ ގޮތަށް ބަލާއިރު ކުއްޔަށް ދޭ ފަރާތުން ޖެހިގެން އަންނަ މަހު ތަން ހުސްވުމުން ތަން ހަވާލުކޮށްދޭނެ ކަމަށާއި އެޑްވާންސްކޮށް ދެ މަސް ނުވަތަ ތިން މަސް ދުވަހުގެ ކުލި ދެއްކުމަށް އެދޭކަން ފާހަގަކުރެވެއެވެ. އަދި ފައިސާ ނެގުމަށްފަހު ފިލައިގެން އުޅުމާއި، ކުއްޔަށް ހިފާ ފަރާތަށް ތަން ހަވާލުނުކޮށް އެކި ބަހަނާ ދައްކާފައި ހުންނަކަން ފާހަގަކުރެވޭ ކަމަށް ފުލުހުން ބުނެއެވެ.
ފުލުހުން ބުނީ އޮޅިވާލައިގެން މަކަރާ ހީލަތުން ނުވަތަ ޓެކުމުން ފައިސާ ހޯދާ މައްސަލަތައް ތަކުރާރުވިޔަ ނުދިނުމަށްޓަކައި ރައްޔިތުން ސަމާލު ވުމަށް އެދޭ ކަމަށާއި އެފަދަ މުއާމަލާތެއް ކުރާނަމަ އެ މުއާމަލާތް ކުރާ މީހާއާއި ތަނުގެ މައުލޫމާތު ކޮންމެހެން އެނގެން ޖެހޭ ކަމަށާއި އަދި މާލީގޮތުން މީސްމީހުންނާއެކު އެއްބަސްވުންތައް އެކުލަވާލާއިރު ފުރަތަމަ މަރުހަލާގައި ވެސް ގާނޫނީ ވަކީލުންގެ އެހީތެރިކަން ހޯދުމަކީ ވެސް ރައްކާތެރިކަމުގެ ގޮތުން އެޅިދާނެ ފިޔަވަޅެއް ކަމަށް ފުލުހުން ބުނެއެވެ.
މީގެ އިތުރުން އޮޅުވާލައިގެން ފައިސާ އަތުލުމުގެ ތަފާތު ކަންތައްތައް ވެސް ފާހަގަކުރެވިފައިވާ ކަމަށާއި ތަފާތު ޕްރޮމޯޝަންތަކުގެ ނަމުގައި ފައިސާއާއި ރީލޯޑާއި ރާސްޓަސް ޖަމާކުރުމާއި އޮޅުވާލައިގެން ކޭޝްކާރޑާއި ބޭންކް އެކައުންޓްތަކުގެ މައުލޫމާތު ހޯދުމުގެ މައްސަލަތައް ހިމެނޭ ކަމަށް ވެސް ފުލުހުން ބުނެއެވެ.
