މިދިޔަ ޖެނުއަރީ މަހުގެ 19 ވަނަ ދުވަހު އިކޮނިމިކް މިނިސްޓްރީން އިއުލާންކޮށްފައިވާ އެއްގަމު އުޅަނދުގައި މުދާ އުފުލުމުގައި އަމަލުކުރަން ޖެހޭ ގަވައިދުގެ ދެ މާއްދާ އަކަށް އަމަލުކުރަން ފެށުން މިއަހަރުގެ ޖޫން އެއް ވަނަ ދުވަހަށް ބަދަލުކޮށްފި އެވެ. 

މީގެ ކުރިން މި ގަވައިދުގެ ހުރިހާ މާއްދާއަކަށް އަަމަލުކުރުމަށް ހަމަޖެހިފައިވަނީ ފެބްރުއަރީ އެއް ވަނަ ދުވަހުން ފެށިގެން ނެވެ.އެހެން ނަމަވެސް އެއްގަމު އުނޅަދުގައި މުދާ އުފުލުގައި އަމަލުކުރަންޖެހޭ އުސޫލަށް ގެނެސްފައިވާ އިސްލާހުގައި ވަނީ އެ ގަވައިދުގެ ނުވަ ވަނަ މާއްދާ އާއި 11 ވަނަ މާއްދާއަށް އަމަލުކުރަން ފަށާނީ  ޖޫން އެއް ވަނަ ދުވަހުން ފެށިގެން ކަަމަށެވެ.

މި ގަވައިދުގެ ނުވަ ވަނަ މާއްދާގައި ބުނެފައިވަނީ ކުނި އުފުލާގޮތަށް ފަރުމާކުރެވިފައި ހުންނަ އުޅަނދު ފިޔަވައި އެހެން އުޅަނދެއްގައި ކުނި ނުވަތަ އެއާ އެއްފަދަ އެއްޗެއް އުފުލަންވާނީ މަގުމައްޗަށް ނޭޅޭގޮތަށް އަދި އޭގައިހުރި ވަސް މާހައުލަށް ނުފެތުރޭގޮތަށް ސަތަރިއެއް ފަދަ އެއްޗެއް އަޅައި ރަނގަޅަށް ނިވައިކޮށް ބަންދުކޮށްގެން ކަމަށެވެ. މި ގަވައިދުގެ 11 ވަނަ މާއްދާގައި ވަނީ އުޅަނދުގައި މުދަލާއި ތަކެތި އުފުލުމުގެ އަގު ސިޓީތަކުގައި ނަގަންވާނީ އިކޮނޮމިކް މިނިސްޓްރީން ކަނޑައަޅާފައިވާ މިންގަނޑުގައި ކަނޑައަޅާފައިވާ އަގަށްވުރެ ބޮޑުނުވާގޮތަށެވެ.

އެގޮތުން މުދާ އުފުލުމުގައި އަގުތައް އުޅެނީ 40 ރުފިޔާ އާއި 250 ރުފިޔާ އާއި ދެމެދުގަ އެވެ. އަގުތަކުގައި ތަފާތުތައް އުޅެނީ، އުފުލާ މުދަތުގެ ބަރުމިނާ މުދާ އުފުލާ ވަގުތުތަކާ ގުޅުވައިގެންނެވެ. އެހެން ނަމަވެސް މި ދެ މާއްދާ އަށް އަަމަލު ކުރުން މިހާރު ވަނީ ފަސްކޮށްފަ އެެވެ.

އިކޮނޮމިކް މިނިސްޓްރީން އާއްމުކޮށްފައިވާ ގަވާއިދުގައި ވާގޮތުން، މުދާ އުފުލާ އެއްގަމު އުޅަނދުގައި، މުދާ އުފުލަންވާނީ، އެ އުޅަނދެއް ދުއްވާ އިރު ދުއްވާ މީހާއަށް ކުރިއާއި ފަހަތް ފެންނަ ގޮތަށް ކަމަށް ވަނީ އަންގާފަ އެވެ.  ދިއްލަންޖެހޭ ހުރިހާ ބައްތިތައް ފެންނަން ހުންނާނެ ހެން ދިއްލާފަ ހުރުމަށް މި ގަވައިދުގައި ވަނީ ބަޔާންކޮށްފަ އެވެ.

އުޅަނދަށްވުރެ ދިގު ތަކެތި އަރުވައިގެން ދާނަމަ، ފަހަތުން ބޭރަށް ނުކުމެފައި ހުންނަ ބައި، އުޅަނދުގެ ފޮށިގަނޑުގެ ތިންބައިކުޅަ އެއްބަޔަށްވުރެ ދިގުވެގެން ނުވާނެ ކަމަށް މި ގަވައިދުގައި ވަނީ ބަޔާންކޮށްފަ އެވެ. މިފަދަ ތަކެތި އުޅަނދުތަކުގައި އުފުލާ ކަމުގައިވާ ނަމަ ހެނދުނު ހަޔަކުން ހަވީރު ހަޔަކާާ ދެމެދު ތަކެތި އުފުލުމުގައި ތަކެތީގެ ކޮޅުގައި އެއް ފޫޓު ދިގު، އެއް ފޫޓު ފުޅާމިނުގެ ރަތްކުލައިގެ ދިދައެއް ހަރުކޮށްފައި ހުންނަންވާނެ ކަމަށް ގަވައިދުގައި ވަނީ ބަޔާންކޮށްފަ އެވެ.

 މީގެ އިތުރުން ހަވީރު ހަޔަކުން ހެނދުނު ހަޔަކަށް ތަކެތި އުފުލުމުގައި އުޅަނދުން ބޭރަށް ނުކުމެފައި ހުންނަ ބައިގައި ރަތް ނުވަތަ އޮރެންޖް ކުލައިގެ އަލި ފެންނަ ބައްތިއެއް، ތަކެތީގެ ކޮޅުގައި ދިއްލާފައި ހުންނަންވާނެ ކަމަށް ގަވައިދުގައި ވަނީ ކަނޑައަޅާފަ އެވެ.

މުދާ އުފުލާ އުޅަނދުގެ ޑްރައިވަރުގެ ކެބިން ޑްރައިވަރު ފަހަތު ފޮށިގަނޑު ބެލުމަށް ހުންނަ ބިއްލޫރިގަނޑުން ޑްރައިވަރަށް ފަހަތް ނުފެންނަ ވަރަށް މުދާ ބަހައްޓައިގެން ދުއްވުމަކީ މަނާ ކަމެއް ކަަމަށް ގަވައިދުގައި ވަނީ ކަނޑައަޅާފަ އެވެ. މީގެ އިތުރުން މުދާ އަރުވައި ބޭލުމުގައި އާއްމު ޓްރެފިކަށް ދަތިވާ ގޮތަށް މަގު މައްޗަށް މަޑު ނުކުރުމަށް މި ގަވައިދު ބުނެ އެވެ. ސިމެންތި، ގޮދަންފުށް ފަދަ ކުނޑިބުރާ މުދާ އުފުލަންވާނީ، ކުނޑި ނުބުރާނެ ގޮތަށް އެއްޗެއް އަޅައި މުދާތައް ރަނގަޅަށް ނިވައިކޮށް ބަންދުކޮށްގެން ކަމަށް މި ގަވައިދުގާ ވަނީ ބުނެފަ އެވެ. ދެމީހުންނަށް އެރޭގޮތަށް ތައްޔާރުކޮށްފައި ހުންނަ އިންޖީނުލީ އުޅަނދުތަކުގެ ތެރެއިން ދެ ފުރޮޅުލީ އުޅަނދުގައި އެ އުޅަނދަށްވުރެ ދިގު ތަކެއްޗާއި، އެ އުޅަނދަށްވުރެ ފުޅާތަކެއްޗާއި، ފަހަތުގައި އިންނަ މީހަކަށް އެއް އަތުން ނުހިފޭވަރުގެ ބަރުތަކެތި އުފުލުމަކީ މަނާކަމެއް ކަމަށް އިކޮނޮމިކް މިނިސްޓްރީން ހާމަކުރެ އެވެ. އަލިފާން ހިފާ ނުވަތަ ގޮވާ ޒާތުގެ ތަކެތި އުޅަނދުގައި އުފުލާނަމަ، ދުއްވާ މީހާއާއި އޭނާގެ އެހީތެރިޔާ ފިޔަވައި އިތުރު އެހެން އެއްވެސް މީހަކު އެ އުޅަނދަށް އެރުވުމަކީ މަނާކަމެއް ކަަމަށްވެސް ގަަވައިދުގައި ވަނީ ބުނެފަ އެވެ.

މި ގަވައިދުގެ ނުވަ ވަނަ މާއްދާ އަދި 11 ވަނަ މާއްދާ ފިޔަވާ އެހެން ހުރިހާ މާއްދާތަކަށް އަމަލު ކުރަން ފަށާފައިވާ އިރު ގަވައިދާ ހިލާފްވާ ފަރާތްތަކުން 750 ރުފިޔާ އިން ޖޫރިމަނާ ކުރުމަށް ހަމަޖެހިފައިވާ ކަމަށް އިކޮނޮމިކް މިނިސްޓްރީން ހާމަކުރެ އެވެ.