ޓްރަމްޕް މަސައްކަތް ކުރައްވަނީ އީރާނުގެ ސަރުކާރު ވައްޓާލަން: ރޫހާނީ
އީރާނުގެ ސަލާމަތާއި ރައްކާތެރިކަމަކީ އެމެރިކާގެ ކުޅޭ ކުޅޭ އެއްޗެއް ނޫން
އދ. ގެ 73 ވަނަ ޖެނެރަލް އެސެމްބްލީގައި ރައީސް ހަސަން ރޫހާނީ ވާހަކަފުޅު ދައްކަވާފައި ވަނީ އަންގާރަ ދުވަހު
އެމެރިކާގެ ރައީސް ޑޮނަލްޑް ޓްރަމްޕް މަސައްކަތް ކުރައްވަނީ އީރާނުގެ ސަރުކާރު ވައްޓާލަން ކަމަށް ރައީސް ހަސަން ރޫހާނީ ވިދާޅުވެއްޖެއެވެ.
އދ. ގެ 73 ވަނަ ޖެނެރަލް އެސެމްބްލީގައި އޯގާތެރި މީހެއް ކަމަށް ސިފަކުރެއްވި ޓްރަމްޕްގެ ވާހަކަފުޅު ނިންމަވާލެއްވިތާ ދެ ތިން ގަޑިއިރު ފަހުން ވާހަކަފުޅު ދައްކަވަމުން ރޫހާނީ ވިދާޅުވީ ޓްރަމްޕް މަސައްކަތް ކުރައްވަނީ އީރާނުގެ ސަރުކާރު ވައްޓާލުމަށް ކަމަށެވެ.
ފާޅުގައި އީރާނުގެ ސަރުކާރު ވައްޓާލަން ބޭނުންވާ ކަމަށް ބުނާއިރު ގުޅުންތައް ރަނގަޅުކުރަން ވާހަކަ ދައްކަން ބޭނުންވާ ކަމަށް ވެސް އެމެރިކާއިން ބުނުމަކީ އަޖައިބެއް ކަމަށް ރޫހާނީ ވިދާޅުވިއެވެ. އީރާނުގެ ސަލާމަތާއި ރައްކާތެރިކަމަކީ އެމެރިކާއިން ކުޅޭ ކުޅޭ އެއްޗެއްގެ ގޮތުގައި ހެދުމުގެ ފުރުސަތު ނުދޭނެ ކަމަށް ވެސް ރޫހާނީ ވިދާޅުވިއެވެ.
ރޫހާނީ ވިދާޅުވީ ނިއުކްލިއާ އެއްބަސްވުމުން ގަވާއިދާ ޚިލާފަށް އެމެރިކާ ވަކިވުން ބައިނަލްއަގުވާމީ މުޖްތަމައުން ބަލައިނުގަތުމުން އުފާ ކުރައްވާ ކަމަށެވެ.
އީރާނާ ދެކޮޅަށް ދަތިކުރުމުގެ ފިޔަވަޅު އެމެރިކާ އިން އެޅި ނަމަވެސް އެ ގައުމާ އެކު ވިޔަފާރީގެ މުއާމަލާތް ކުރުމަށް ޕޭމަންޓް ސިސްޓަމެއް ގާއިމް ކުރުމަށް ފްރާންސާއި ޖަރުމަނާއި އިނގިރޭސި ވިލާތް، ޗައިނާ އަދި ރަޝިޔާ އިން ވަނީ ނިއު ޔޯކްގައި އެއްބަސްވެފައެވެ.
