ޝާހިދު ބަންދުގައި ބެހެއްޓުމަށް ކުރި އަމުރަށް ހައިކޯޓުން ވެސް ތާއީދުކޮށްފި
22 ނޮވެމްބަރު 2026 | އާދީއްތަ 09:27ކުޑަކުއްޖަކަށް ޖިންސީ ގޯނާކުރި ކަމުގެ ތުހުމަތުގައި ކުރީގެ ފޮރިން މިނިސްޓަރު އަބްދުﷲ ޝާހިދު 30 ދުވަހަށް ބަންދުކުރަން ކްރިމިނަލް ކޯޓުން ނެރުނު އަމުރަށް ހައިކޯޓުން ތާއީދުކޮށްފި. މި މައްސަލައިގެ ތަހުގީގު ފުލުހުން ކުރިއަށްގެންދާއިރު، މިއީ 2028 ގެ ރިޔާސީ އިންތިޚާބަށް ޝާހިދު ކެމްޕޭން ފައްޓަވާފައިވަނިކޮށް ކުރެވުނު ސީރިއަސް ތުހުމަތެއް


ކުޑަކުއްޖަކަށް ޖިންސީ ގޯނާކުރި ކަމުގެ ތުހުމަތުގައި ހައްޔަރުކޮށްފައިވާ ޝާހިދު | ޕޮލިސް
ކުޑަކުއްޖަކަށް ޖިންސީ ގޯނާކުރި ކަމުގެ ތުހުމަތުގައި ހައްޔަރުކޮށްފައިވާ ކުރީގެ ފޮރިން މިނިސްޓަރު އަބްދުﷲ ޝާހިދު ބަންދުގައި ބެހެއްޓުމަށް ކުރި އަމުރަށް ދިވެހިރާއްޖޭގެ ހައިކޯޓުން ވެސް ތާއީދުކޮށްފި އެވެ.
އުމުރުން 18 އަހަރުން ދަށުގެ ކުޑަކުއްޖަކަށް ޖިންސީ ގޯނާކުރި ކަމުގެ ތުހުމަތުގައި ކޯޓު އަމުރެއްގެ ދަށުން ޝާހިދު ހައްޔަރުކުރުމާ ގުޅިގެން، އޭނާގެ ބަންދާމެދު ގޮތެއް ނިންމުމަށް ކްރިމިނަލް ކޯޓަށް ހާޒިރުކުރުމުން އެ ކޯޓުން ވަނީ އޭނާ 30 ދުވަހުގެ މުއްދަތަށް ބަންދުކުރުމަށް އަމުރުކޮށްފަ އެވެ.
މި ނިންމުން ޝާހިދުގެ ފަރާތުން ހައިކޯޓުގައި އިސްތިއުނާފު ކުރުމުން، ކޯޓުން މައްސަލަ ބެލުމަށްފަހު އާދިއްތަ ދުވަހު ނިންމި ނިންމުމުގައި ވަނީ ދަށު ކޯޓުގެ އަމުރު ބާތިލުކުރަންޖެހޭ ތަނެއް ނެތްކަމަށް ކަނޑައަޅާފަ އެވެ.
ޝާހިދު ހައްޔަރުކޮށް ބަންދުގެ މުއްދަތު ޖަހާފައި މިވަނީ، 2028 ވަނަ އަހަރު ބޭއްވުމަށް ހަމަޖެހިފައިވާ ރިޔާސީ އިންތިޚާބުގެ އެމްޑީޕީ ޕްރައިމަރީގައި ވާދަކުރައްވާނެކަން އޭނާ ރަސްމީކޮށް އިއުލާން ކުރައްވާފައި ވަނިކޮށެވެ. ޝާހިދު ގެންދެވީ އިންތިޚާބުގެ ކެމްޕޭން ހަރަކާތްތައް ފައްޓަވައި، މާލޭގެ އިތުރުން އަތޮޅުތެރޭގެ ރަށްތަކަށް ވަޑައިގެން ރައްޔިތުންނާ ބައްދަލުކުރައްވަމުންނެވެ.
ކުރީގެ ސަރުކާރުގެ ފޮރިން މިނިސްޓަރުގެ މަގާމުގެ އިތުރުން، އދ. ގެ އާންމު މަޖިލީހުގެ ރައީސްކަން ވެސް ކުރައްވާފައިވާ ޝާހިދުގެ މައްޗަށް ކުރެވޭ މި ސީރިއަސް ތުހުމަތުތަކާ ގުޅިގެން ފުލުހުން ދަނީ މައްސަލަ އިތުރަށް ތަހުގީގު ކުރަމުންނެވެ.









