ހުޅުޖެހުމަށާއި މުދަލަށް ގެއްލުންދިނުމަށް ހިތްވަރުދިން ކަމުގެ ތުހުމަތުގައި ހައްޔަރުކުރި ޖުމާންގެ ބަންދަށް އަނެއްކާ ވެސް 15 ދުވަސް ޖަހައިފި
21 ނޮވެމްބަރު 2026 | ހޮނިހިރު 06:39ހުޅުޖެހުމަށާއި މުދަލަށް ގެއްލުންދިނުމަށް ސޯޝަލް މީޑިއާގައި ހިތްވަރުދިން ކަމުގެ ތުހުމަތުގައި ހައްޔަރުކުރި ޖުމާންގެ ބަންދަށް ކްރިމިނަލް ކޯޓުން އަނެއްކާވެސް 15 ދުވަސް ވަނީ އިތުރުކޮށްފައި. ޓެރަރިޒަމްގެ ތުހުމަތު ކުރެވޭ މި މައްސަލައިގައި އޭނާގެ ފޯނު ތަހުލީލުކުރުމަށް ރާއްޖެއިން ބޭރަށް ފޮނުވުމުގެ މަސައްކަތް ފުލުހުން ދަނީ ކުރަމުން. އޭނާ ބަންދުގައި ބަހައްޓަން ނިންމީ މުޖުތަމައުގެ ސަލާމަތަށް ނުރައްކާވެދާނެ ކަމަށް ފެންނާތީ ކަމަށް ކޯޓު އަމުރުގައި ބުނެފައިވޭ


ޓެރަރިޒަމްގެ ތުހުމަތުގައި ހައްޔަރުކުރި، ހއ. ބާރަށް، ކުއްޅަވައްގެ، 26 އަހަރުގެ އަލީ ޖުމާން | މޯލްޑިވްސް ޕޮލިސް ސާރވިސް
ސޯޝަލް މީޑިއާ ޕްލެޓްފޯމް އެކްސް މެދުވެރިކޮށް ހުޅުޖެހުމަށާއި މުދަލަށް ގެއްލުންދިނުމަށް ހިތްވަރުދިންކަމުގެ ތުހުމަތުގައި ހައްޔަރުކުރި ޒުވާނާގެ ބަންދަށް އަނެއްކާ ވެސް 15 ދުވަސް ޖަހައިފި އެވެ.
ޓެރަރިޒަމްގެ ތުހުމަތުގައި ހައްޔަރުކުރީ ހއ. ބާރަށް، ކުއްޅަވައްގެ، 26 އަހަރުގެ އަލީ ޖުމާން އެވެ. އޭނާ ފުރަތަމަ ހައްޔަރުކުރީ 22 އޮކްޓޫބަރު 2026 ގައި ކޯޓު އަމުރެއްގެ ދަށުންނެވެ. އަދި އޭނާގެ ބަންދަށް ފުރަތަމަ 12 ދުވަސް ޖެހުމަށްފަހު އޭގެ ފަހުން 15 ދުވަހަށް ބަންދު ކުރި އެވެ. އަދި ބަންދުގެ މުއްދަތު ހަމަވުމާ ގުޅިގެން މިމަހުގެ 19 ވަނަ ދުވަހު އަނެއްކާ ވެސް އިތުރަށް 15 ދުވަހަށް ބަންދު ކުރުމަށް ކޯޓުން ވަނީ ނިންމާފަ އެވެ.
ކަސްޓޯޑިއަލް ޖަލެއްގައި ބަންދުކުރުމަށް ކްރިމިނަލް ކޯޓުން އަމުރުކޮށްފައިވާއިރު، ޖުމާންގެ މައްޗަށް ތުހުމަތުކޮށްފައިވަނީ ގާނޫނު ނަންބަރު 32/2015 (ޓެރަރިޒަމް މަނާކުރުމުގެ ގާނޫނު) ގެ ދަށުންނެވެ. އޭނާ ބަންދުކުރުމަށް ނިންމީ ޖިނާއީ އިޖުރާއަތުގެ ގާނޫނާއި ގާނޫނުއަސާސީގެ 49 ވަނަ މާއްދާއަށް ރިއާޔަތްކޮށް، ބަންދުން ދޫކޮށްލައިފިނަމަ މުޖުތަމައުގެ ސަލާމަތަށް ނުރައްކަލެއް ކުރިމަތިވެދާނެ ކަމަށް ފެންނާތީ އެވެ. އަދި ޓެރަރިޒަމް މަނާކުރުމުގެ ގާނޫނުގެ 26 ވަނަ މާއްދާގެ (ތ) ގެ ދަށުން، މިފަދަ މައްސަލަތަކުގައި 15 ދުވަހަށްވުރެ އިތުރުނުވާނޭ ގޮތަށް ބަންދު ކަނޑައެޅުމުގެ އިޚްތިޔާރު ފަނޑިޔާރަށް ލިބިދެ އެވެ.
މީގެ އިތުރުން ކްރިމިނަލް ކޯޓުގެ ބަންދު އަމުރުގައި ބުނީ، ދިވެހި ފުލުހުންގެ ޚިދުމަތުން ހުށަހެޅި އިންޓެލިޖެންސް ދެ ރިޕޯޓަކާއި ފުލުހުންގެ ބަޔާނުން، ޖުމާންގެ މައްޗަށް ތުހުމަތުކުރެވޭ ކޮންމެވެސް މިންވަރެއްގެ ހެކި ލިބިފައިވާ ކަމަށެވެ. މީގެ އިތުރުން އެކްސްގައި އޭނާ ބޭނުންކުރާ ކަމަށް ތުހުމަތުކުރެވޭ އެކައުންޓުން ކޮށްފައިވާ ޕޯސްޓްތަކާ ގުޅޭ ރިޕޯޓް ވެސް ފުލުހުން ކޯޓަށް ހުށަހަޅާފައިވާ ކަމަށެވެ.
އަމުރުގައި ފާހަގަކޮށްފައިވާ އިތުރު ކަންކަމުގެ ތެރޭގައި، އެކްސް އެކައުންޓުގައި ހިމެނޭ އެހެން ޕޯސްޓްތަކުން ވެސް އެ އައިޑީއާއި ޖުމާންއާ ގުޅުން އޮތް ކަމަށް ތުހުމަތުކުރެވޭ މިންވަރަށް ފުލުހުން ހެކި ހުށަހަޅާފައިވާ ކަމަށް ބުނެފައިވެ އެވެ. އަދި އެ އެކައުންޓުން ކޮށްފައިވާ ޕޯސްޓުގައި ހިމެނެނީ ހުޅުޖެހުމަށާއި މުދަލަށް ގެއްލުންދިނުމުގެ އަމަލުތައް ހިންގުމަށް ހިތްވަރުދޭ ޒާތުގެ ވާހަކަތަކެއް ކަމަށް ވެސް ކޯޓު އަމުރުގައިވެ އެވެ.
ފުލުހުންގެ ތަހުގީގު ކުރިއަށްދާ ގޮތުގެ މައުލޫމާތު ހިއްސާކުރަމުން އައިއޯ ކޯޓުގައި ބުނީ، ޖުމާން ގެންގުޅުނު ކަމަށް ތުހުމަތުކުރެވޭ އައިޑީގެ މައުލޫމާތު ހޯދުމުގެ މަސައްކަތް ޕްރޮސިކިއުޓަރ ޖެނެރަލްގެ އޮފީހާ ގުޅިގެން ފުލުހުން ކުރަމުންދާ ކަމަށެވެ. އަދި އޭނާގެ ފޯނުގެ ޕާސްވޯޑް ދީފައިނުވާތީ އާއި ފޯނުގެ ލޮކްކޯޑް ކްރެކްކުރެވިފައި ނުވާތީ، ފޯނު ރާއްޖެއިން ބޭރަށް ފޮނުވައިގެން ތަހުލީލުކުރުމުގެ މަސައްކަތް ކުރަމުންދާ ކަމަށް ވެސް އައިއޯ ބުނެފައިވެ އެވެ.
މި މައްސަލަ ފުލުހުން ދަނީ އިތުރަށް ތަހުގީގު ކުރަމުންނެވެ.










